AKP កំពង់ចាម ថ្ងៃទី២៦ ខែមិថុនា ឆ្នាំ២០២៥ -- លោកស្រី ប៉ាង ដានី អភិបាលរងខេត្ត និងជាអនុប្រធានអចិន្ត្រៃយ៍សាខាតំណាងដ៏ខ្ពង់ខ្ពស់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នៅព្រឹកថ្ងៃទី២៦ ខែមិថុនា ឆ្នាំ២០២៥ បានអញ្ជើញប្រគល់ផ្ទះមនុស្សធម៌ទី២៦របស់ខេត្ត ជូនស្ត្រីមេម៉ាយពិការភាព ទុរគតជនគ្មានទីពឹង ឈ្មោះ ស៊ាង សុផល អាយុ ៤៦ឆ្នាំ រស់នៅភូមិទួលបេង ឃុំក្រឡា ស្រុកកំពង់សៀម ខេត្តកំពង់ចាម។

ថ្លែងទៅកាន់បងប្អូនប្រជាពលរដ្ឋចូលរួមក្នុងកម្មវិធីប្រគល់ផ្ទះមនុស្សធម៌របស់ខេត្ត លោកស្រីអភិបាលរងខេត្តបានលើកឡើងថា ផ្ទះមនុស្សធម៌របស់ខេត្តគឺជាកម្មវិធីក្រោមកិច្ចសហការ រវាងសាខាកាកបាទក្រហមកម្ពុជាខេត្ត សាលាគណខេត្ត និងការផ្តល់ថវិកាបដិភាគពីសាខា និង ឯកឧត្តម អ៊ុន ចាន់ដា អភិបាលខេត្ត សម្រាប់ជួយដល់ទុរគតជន ជនពិការ ចាស់ជរាគ្មានទីពឹង ស្ត្រីមេម៉ាយ និងជនទីទ័លក្រ ជាកម្មវិធីមនុស្សធម៌កាកបាទក្រហមកម្ពុជាក្រោមការដឹកនាំរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  ប្រធានកាកបាទក្រហមកម្ពុជា សម្រាប់ជួយដល់ ទុរគតជន  ជនពិការ ចាស់ជរាគ្មានទីពឹង ស្ត្រីមេម៉ាយ និងជនទីទ័លក្រ ដោយមិនប្រកាន់និន្នាការនយោបាយឡើយ ដោយឈរលើទិសស្លោក "ទីណា ប្រជាពលរដ្ឋមានទុក្ខលំបាក ទីនោះមានកាកបាទក្រហមកម្ពុជាត្រូវទៅដល់ និងជួយពួកគាត់"។

ក្នុងពិធីប្រគល់ និងជូនផ្ទះថ្មី  លោកស្រី ប៉ាង ដានី ក៏បាននាំយកសម្ភារជាគ្រឿងឧបភោគ បរិភោគជូនដល់ម្ចាស់ផ្ទះថ្មី រួមមាន អង្ករ៥០គក្រ, ត្រីខ២០កំប៉ុង ទឹកត្រី១២ដប ទឹកស៊ីអ៊ីវ ១២ដប, មី ២កេស, ឃីត ២សម្រាប់, សាប៊ូ ១០ដុំ និងថវិកា ២០០,០០០រៀល។ ចំពោះលោកតា លោកយាយ ដែលចូលរួមក្នុងពិធីប្រគល់-ទទួលផ្ទះថ្មីនេះចំនួន ១០នាក់ ក្នុងម្នាក់ទទួលបានអង្ករ ត្រីខ មី ទឹកត្រី ទឹកស៊ីអ៊ីវ និងឃីត ព្រមទាំងថវិកាចំនួន ២០,០០០រៀលផងដែរ៕

ដោយ ឆាយ ម៉ុត