AKP ភ្នំពេញ ថ្ងៃទី២៦ ខែមិថុនា ឆ្នាំ២០២៥-- លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា រសៀលថ្ងៃទី២៥ ខែមិថុនា ឆ្នាំ២០២៥ បានអញ្ជើញជាអធិបតីក្នុងពិធីប្រគល់សញ្ញាបត្រជូនដល់សិស្សសាលាអន្តរជាតិ វេសវីយូកម្ពុជា ដោយបានកោតសរសើរចំពោះឪពុកម្តាយ អាណាព្យាបាលសិស្ស ដែលបានខិតខំប្រឹងប្រែងក្នុងការវិនិយោគលើវិស័យអប់រំសម្រាប់បុត្រធីតារបស់ខ្លួន និងបានគូសបញ្ជាក់ថា គ្មានអ្វីដែលទទួលបានផលចំណេញជាងការវិនិយោគលើវិស័យអប់រំនោះទេ ថ្វីដ្បិតតែការបណ្ដុះបណ្ដាលធនធានមនុស្សត្រូវប្រើរយៈពេលវែង ហើយត្រូវចំណាយថវិកាច្រើន ប៉ុន្តែនេះគឺជាការវិនិយោគមួយដែលទទួលបានផលចំណេញច្រើនបំផុតលើសពីការវិនិយោគផ្សេងៗទៀត។

លោកជំទាវរដ្ឋលេខាធិការបានលើកឡើងថា ក្រសួងអប់រំ យុវជន និងកីឡាបានបន្តដាក់ចេញឱ្យអនុវត្តផែនការយុទ្ធសាស្ត្រវិស័យអប់រំ ២០២៤-២០២៨ រយៈពេល៥ឆ្នាំ ដើម្បីឆ្លើយតបទៅនឹងអាទិភាពកំណែទម្រង់អប់រំ និងយុទ្ធសាស្ត្របញ្ចកោណដំណាក់កាលទី១ ដែលមានមុំទី១ផ្តោតលើការអភិវឌ្ឍមូលធនមនុស្ស "ការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា" និងមុំទី៥ផ្ដោតលើការ អភិវឌ្ឍវិទ្យាសាស្ត្របច្ចេកវិទ្យាឌីជីថល ដែលជាកត្តាគន្លឹះដើម្បីនាំកម្ពុជាទៅសម្រេចចក្ខុវិស័យរបស់រាជរដ្ឋាភិបាល និងការអភិវឌ្ឍប្រកបដោយចីរភាព ក្នុងនោះក្រសួងបានសម្រួចអាទិភាពគោលនយោបាយអប់រំដោយផ្ដោតតែមួយចំណុចគឺ ធានាឲ្យប្រជាពលរដ្ឋកម្ពុជាគ្រប់រូបទទួលបានការអប់រំប្រកបដោយគុណភាព សមធម៌ និងបរិយាបន្នពោរពេញដោយចំណេះដឹង បំណិន វិន័យសីលធម៌ និងឥរិយាបទល្អ ព្រមទាំងសុខភាពល្អ កាយសម្បទារឹងមាំ និងការសិក្សាពេញមួយជីវិត។

លោកជំទាវបណ្ឌិត គឹម សេដ្ឋានី បានគូសបញ្ជាក់ថា បច្ចុប្បន្ននេះក្រសួងអប់រំ យុវជន និងកីឡាបានដាក់ចេញនូវអាទិភាពកំណែទម្រង់គន្លឹះចំនួន៨ ដែលក្នុងនោះមាន៤ ជាវិធានការគន្លឹះរបស់ប្រមុខរាជរដ្ឋាភិបាល រួមមាន៖ ១.ការពង្រឹងអភិបាលកិច្ចសាលារៀន  ២.ការពិនិត្យកែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបទរបស់សិស្ស ដោយផ្ដោតជាសំខាន់លើការអប់រំចរិយាធម៌ និងការអភិវឌ្ឍយុវជន ដើម្បីលើកកម្ពស់បំណិនសតវត្សទី២១ សំដៅឆ្លើយតបទៅនឹងគោលដៅនៃការអប់រំគឺ  វិជ្ជាសម្បទា បំណិនសម្បទា ជាពិសេសសុខភាព និងឥរិយាបទល្អ ៣.ការលើកកម្ពស់សុខភាពសិក្សា ដោយយកចិត្តទុកដាក់លើសុខភាពរបស់សិស្សតាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលា ដែលជាផ្នែកមួយនៃការលើកកម្ពស់សុវត្ថិភាព សង្គមសមធម៌ សុខភាពសិក្សា ការអភិវឌ្ឍសេដ្ឋកិច្ចមូលដ្ឋាន ៤.ការជំរុញ និងលើកទឹកចិត្តការចូលរួមរបស់មាតាបិតាអ្នកណាព្យាបាល និងសហគមន៍ក្នុងការអប់រំ ស្របតាមពាក្យស្លោកភាពជាដៃគូររដ្ឋ និងសហគមន៍ដើម្បីការអប់រំ ៥.ការអប់រំឌីជីថលដោយសង្កត់ធ្ងន់លើការរួមបញ្ចូលបច្ចេកវិទ្យាទៅក្នុងការសិក្សាដើម្បីបរិត្តកម្មសេដ្ឋកិច្ចសង្គមឌីជីថល និងការត្រៀមខ្លួនទទួលយក និងទាញយកអត្ថប្រយោជន៍ឱ្យបានកម្រិតអតិបរិមាពីការរីកចម្រើនបច្ចេកវិទ្យា៦.ការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សា ៧.ការកសាងប្រព័ន្ធ និងការអភិវឌ្ឍសមត្ថភាព និង៨.ការអភិវឌ្ឍការអប់រំកាយ និងកីឡា៕

ដោយ៖ ចាន់ សុភឿន (ប្រភព៖ ក្រសួងអប់រំ)