AKP កំពង់ធំ ថ្ងៃទី២៦ ខែមិថុនា ឆ្នាំ២០២៥-- ឯកឧត្តម នួន ផារ័ត្ន អភិបាលខេត្តកំពង់ធំ បានស្នើដល់អង្គការសង្គមទាំងអស់ធ្វើសកម្មភាពរបស់ខ្លួនស្របតាមច្បាប់ និងលិខិតបទដ្ឋានគតិយុត្តិនានា ដែលជាមូលដ្ឋានគ្រឹះដ៏សំខាន់ក្នុងការធានានូវនិត្យានុកូលភាពនៃការអនុវត្តសិទ្ធិសេរីភាពរបស់ខ្លួនក្រោមក្របខ័ណ្ឌនីតិរដ្ឋ និងចៀសវាងដាច់ខាតការធ្វើសកម្មភាពណាមួយដែលបង្កផលប៉ះពាល់ដល់សន្តិសុខ សុវត្ថិភាពស្ថិរភាព និងសណ្តាប់ធ្នាប់សាធារណៈរបស់សង្គមជាតិ។

ឯកឧត្តមបានមានប្រសាសន៍ដូចនេះ ក្នុងឱកាសអញ្ជើញជាអធិបតីក្នុងវេទិកាថ្នាក់ខេត្តស្តីពីកិច្ចសន្ទនាពិគ្រោះយោបល់ភាពជាដៃគូរវាងរដ្ឋបាលថ្នាក់ក្រោមជាតិជាមួយសមាគម អង្គការមិនមែនរាជរដ្ឋាភិបាលនិងសហគមន៍នានាក្នុងមូលដ្ឋានខេត្តកំពង់ធំនៅសាលប្រជុំសាលាខេត្តកាលពីថ្ងៃទី២៥ ខែមិថុនា ឆ្នាំ២០២៥។

ឯកឧត្តម នួន ផារ័ត្ន បានបញ្ជាក់ថា វេទិកានេះគឺជាថ្នាលមួយដ៏សំខាន់សម្រាប់គ្រប់ភាគីពាក់ព័ន្ធជួបប្រាស្រ័យទាក់ទងនិងផ្លាស់ប្តូរទស្សនៈយោបល់គ្នាទៅវិញទៅមកលើកិច្ចការសំខាន់ៗ សំដៅជំរុញនិងលើកកម្ពស់សិទ្ធិសេរីភាពនៃអង្គការសង្គមស៊ីវិលក៏ដូចជាពិនិត្យអំពីវឌ្ឍនាភាព ចែករំលែកបទពិសោធល្អៗ ដែលបានពីការអនុវត្តជាក់ស្តែងការលើកកម្ពស់ការយល់ដឹងអំពីគោលការណ៍ និងការអនុវត្តច្បាប់និងលិខិតបទដ្ឋានគតិយុត្តពាក់ព័ន្ធនឹងសមាគមនិងអង្គការមិនមែនរដ្ឋាភិបាលការប្រមូលសំណើ និងសំណូមពរចាំបាច់របស់អង្គការសង្គមស៊ីវិលនិងអាជ្ញាធរមូលដ្ឋានពាក់ព័ន្ធ ដើម្បីយកមកពិនិត្យ និងដោះស្រាយ។

ទន្ទឹមនឹងនេះ ឯកឧត្តមបានស្នើដល់អាជ្ញាធរ និងអង្គភាពពាក់ព័ន្ធនានាបន្តយកចិត្តទុកដាក់សម្របសម្រួលផ្តល់កិច្ចសហការនិងបង្កលក្ខណៈងាយស្រួលតាមគ្រប់រូបភាពដល់សមាគម និងអង្គការមិនមែនរដ្ឋាភិបាលដែលបានចុះបញ្ជីត្រឹមត្រូវតាមច្បាប់ក្នុងការធ្វើសកម្មភាពនៅខេត្តកំពង់ធំ៕

ដោយ ស៊ុម វណ្ណា