AKP បន្ទាយមានជ័យ ថ្ងៃទី២៦ ខែមិថុនា ឆ្នាំ២០២៥--ប្រតិភូសភាពាណិជ្ជកម្មខេត្តបន្ទាយមានជ័យ បាត់ដំបង និងសៀមរាប ដឹកនាំដោយ អ្នកឧកញ៉ា ភួ វាសនា អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្មខេត្តបាត់ដំបង រួមជាមួយ ឧកញ៉ា អ៊ឹង វណ្ណម៉ៅ អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្មខេត្តបន្ទាយមានជ័យ បានដឹកនាំសប្បុរសជន និងសមាជិកសមាជិកាសភាពាណិជ្ជកម្ម ចុះសួរសុខទុក្ខ និងនាំយកគ្រឿងឧបភោគបរិភោគ ព្រមទាំងថវិកាមួយចំនួន ទៅប្រគល់ជូនកងកម្លាំងប្រដាប់អាវុធ ដែលកំពុងឈរជើងការពារបូរណភាពទឹកដី នៅស្រុកបន្ទាយអំពិល ខេត្តឧត្តរមានជ័យ។ ពិធីប្រគល់អំណោយនេះបានធ្វើឡើងនៅសឹករងខេត្តឧត្តរមានជ័យ សង្កាត់ក្រុងសំរោង ខេត្តឧត្តរមានជ័យ កាលពីថ្ងៃទី២៥ ខែមិថុនា ឆ្នាំ២០២៥។

ក្នុងដំណើរចុះសួរសុខទុក្ខនេះក៏មានការចូលរួមពីលោក សុខ ណារ៉េត អភិបាលស្រុកក្រឡាញ់ ខេត្តសៀមរាប រួមជាមួយលោក លោកស្រីសមាជិក សមាជិកា និងអាជីវករ ម្ចាស់សហគ្រាសជាច្រើនរូបផងដែរ។ ការបរិច្ចាគនេះគឺជាការបង្ហាញពីទឹកចិត្តគាំទ្រ និងដឹងគុណយ៉ាងជ្រាលជ្រៅ ចំពោះវីរភាព និងការលះបង់របស់កងទ័ព ដែលបានពលីកម្លាំងកាយចិត្ត ដើម្បីការពារអធិបតេយ្យភាពជាតិ។

អំណោយដែលបានប្រគល់ជូនសម្ភារគ្រឿងឧបភោគ បរិភោគ និងថវិកាដែលត្រូវបាននាំយកទៅប្រគល់ជូនកងកម្លាំងរួមមាន មីជាតិ ចំនួន ១០០កេស សាច់ក្រក ចំនួន ២០គីឡូក្រាម, ស្ករគ្រាប់ ចំនួន ៤កេស ថ្នាំពេទ្យចំនួន១០ប្រអប់ ទឹកស៊ីអ៊ីវចំនួន១០០យួរ ទឹកត្រី ចំនួន១០០យួរ សៀងផ្អែម ចំនួន ៦០គីឡូក្រាម សៀងប្រៃ ចំនួន ៤០គីឡូក្រាម ឆៃប៉ូវផ្អែម ចំនួន៤០គីឡូក្រាម ទឹកសុទ្ធ ចំនួន ២០០យួរ អង្ករ ចំនួន ២០០០គីឡូក្រាម កាហ្វេ ចំនួន ៤កេសធំ តង់ ២x៣ម៉ែត្រ ចំនួន ១១០តង់ ធូបមូស ចំនួន ៤កេស ពងទា ចំនួន ៩០០គ្រាប់ ត្រីងៀត ចំនួន ៩៧គីឡូក្រាមនំធុង ចំនួន ១០ធុង និងថវិកា ចំនួន១៨,៦០០,០០០រៀល។ សម្ភារ និងថវិកាទាំងអស់នេះ ត្រូវបានបែងចែកទៅកាន់គោលដៅសំខាន់ពីរ កងពលតូចថ្មើរជើងលេខ៤២ ប្រចាំទិសទី៣ ប្រាសាទតាមាន់ ស្ថិតក្នុងឃុំគោកមន ស្រុកបន្ទាយអំពិល ខេត្តឧត្តរមានជ័យ និងកងវរសេនាតូចលេខ៤៤៤ តំបន់ប្រតិបត្តិការឧត្តរមានជ័យ ប្រចាំការទិសប្រាសាទតាក្របី ស្ថិតនៅក្នុងភូមិសែនមនោរម្យ២ ឃុំគោកខ្ពស់ ស្រុកបន្ទាយអំពិល ខេត្តឧត្តរមានជ័យ។

ក្នុងឱកាសនោះ អ្នកឧកញ៉ា ភួ វាសនា បានថ្លែងថា «យើងខ្ញុំពិតជាមានកិត្តិយស និងសប្បាយរីករាយណាស់ ដែលបានមកដល់ទីនេះ ដើម្បីសួរសុខទុក្ខបងប្អូនកងកម្លាំងទាំងអស់គ្នា។ ការលះបង់របស់បងប្អូនក្នុងការការពារបូរណភាពទឹកដី គឺជាគំរូវីរភាពដ៏ថ្លៃថ្លា ដែលប្រជាពលរដ្ឋគ្រប់រូបគួរចងចាំ និងដឹងគុណ។ អំណោយទាំងនេះ គ្រាន់តែជាចំណែកតូចមួយ ដែលបង្ហាញពីការយកចិត្តទុកដាក់ និងទឹកចិត្តស្រឡាញ់រាប់អានពីសំណាក់សភាពាណិជ្ជកម្ម និងសប្បុរសជនទាំងអស់ ដើម្បីរួមចំណែកសម្រាលការលំបាក និងជាកម្លាំងចិត្តដល់បងប្អូនក្នុងការបំពេញភារកិច្ច។»

ជាការឆ្លើយតប តំណាងកងទ័ពបានសម្តែងនូវការដឹងគុណយ៉ាងជ្រាលជ្រៅ ចំពោះទឹកចិត្តសប្បុរសធម៌របស់គណៈប្រតិភូសភាពាណិជ្ជកម្ម និងសប្បុរសជនទាំងអស់។ តំណាងកងទ័ពបានគូសបញ្ជាក់ថា«អំណោយដ៏ថ្លៃថ្លាទាំងនេះ គឺជាកម្លាំងចលករដ៏ធំធេងសម្រាប់ពួកយើង ក្នុងការបន្តបំពេញភារកិច្ចការពារជាតិមាតុភូមិ ដោយគ្មានការរារែក។ ការគាំទ្រនេះ ពិតជាបានឆ្លុះបញ្ចាំងពីសាមគ្គីភាព និងការរួបរួមគ្នារវាងកងទ័ព និងប្រជាពលរដ្ឋ។»

សកម្មភាពសប្បុរសធម៌នេះបានបង្ហាញយ៉ាងច្បាស់ពីស្មារតីសាមគ្គីភាព រវាងវិស័យឯកជន និងកងកម្លាំងប្រដាប់អាវុធ ក្នុងការរួមចំណែកថែរក្សាសន្តិភាព និងបូរណភាពទឹកដី។ នេះមិនត្រឹមតែជាការផ្តល់ជំនួយសម្ភារប៉ុណ្ណោះទេ ប៉ុន្តែថែមទាំងជាការផ្តល់កម្លាំងចិត្ត និងក្តីសង្ឃឹមដល់វីរកងទ័ព ដែលកំពុងឈរជើងនៅតំបន់ព្រំដែន ដើម្បីបុព្វហេតុជាតិមាតុភូមិ៕

ដោយ ឈុន សារ៉ាត