AKP ភ្នំពេញ ថ្ងៃទី  ២៥ ខែ មិថុនា ឆ្នាំ ២០២៥--
ពិព័រណ៍សៀវភៅដ៏ធំមួយដែលនឹងត្រូវរៀបចំឡើងនៅសាលបុរីរុងរឿង ស្ថិតក្នុងភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វារ ក្នុងរាជធានីភ្នំពេញ ដែលនឹងចាប់ផ្តើមពីថ្ងៃទី២៦ ខែមិថុនា ដល់ថ្ងៃទី ០៦ ខែ កក្កដា ឆ្នាំ ២០២៥ ត្រូវបានគេរំពឹងថានឹងទទួលបានការចាប់អារម្មណ៍ពីយុវជន យុវនារី ដែលជាសិស្ស និស្សិត និងពលរដ្ឋកម្ពុជាគ្រប់ទិសទីដែលចូលចិត្តអានសៀវភៅ។
ថ្លែងក្នុងសន្និសីទសារព័ត៌មាននារសៀលថ្ងៃទី ២៥ ខែ មិថុនា ឆ្នាំ ២០២៥ នៅទីស្ដីការក្រសួងព័ត៌មាន ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មានបានថ្លែងថា ពិព័រណ៍លក់សៀវភៅ Big Bad Wolf Books នេះ នឹងមានការដាក់តាំងបង្ហាញលក់ចំនួនជាងមួយលានក្បាល ហើយច្រើនជាង ២០ ០០០ ចំណងជើង។ ឯកឧត្ដមបានបញ្ជាក់ថា ការតាំងពិព័រណ៍លក់សៀវភៅនេះដែរធ្វើឡើងដើម្បីលើកទឹកចិត្តឱ្យប្រជាពលរដ្ឋអានសៀវភៅ ដែលសៀវភៅទាំងអស់នេះនឹងបានផ្តល់នូវប្រភពសំខាន់ៗដែលជាចំណេះដឹងទៅឱ្យដល់ប្រជាពលរដ្ឋ សិស្ស និស្សិត។

ក្រៅពីនេះក៏ជាប្រភពស្រាវជ្រាវដល់យុវជនដែលអាចនាំមកនូវចំណេះដឹងថ្មីៗបន្ថែមទៀតក្រៅពីប្រទេសកម្ពុជា ក៏ដូចជាលំហប្រភពនៃចំណេះដឹងក្នុងប្រទេសដទៃៗទៀតផងដែរ។ ឯកឧត្តមរដ្ឋមន្រ្ដីបានថ្លែងបញ្ជាក់ថា៖ «នេះជាដំណើរនៃចំណេះដឹង ដើម្បីផ្តល់នូវជម្រើសទៅឱ្យប្រជាពលរដ្ឋ និងពិសេសយុវជន និងកុមារ ដែលសម្បូរសៀវភៅអាន ។ ប្រៀបធៀបទៅនឹងជំនាន់ទស្សវត្ស ៨០ និង៩០ មិនសូវសម្បូរសៀវភៅអានបែបនេះទេ ប៉ុន្តែបច្ចុប្បន្នសម្បូរសៀវភៅអាន សម្បូរសៀវភៅភាសា ពិសេសបរទេសទាំងនេះក៏នឹងផ្តល់នូវចំណេះដឹងទូទៅដល់ប្រជាពលរដ្ឋ»។
ជាមួយគ្នានេះ ឯកឧត្តម  នេត្រ ភក្រ្តា បានលើកឡើងផងដែរថា ការអានសៀវភៅច្រើនធ្វើឱ្យក្មេងៗមិនចាំបាច់ចំណាយក្នុងការទៅមើលបណ្តាញសង្គមច្រើន ដែលបានត្រឹមតែដឹង តែមិនបានផ្តល់ចំណេះដឹងនោះឡើយ ហើយមានតែការអានសៀវភៅប៉ុណ្ណោះដែលយើងទទួលបានចំណេះដឹង ពិតប្រាកដ ។ ឯកឧត្ដមបានបន្ថែមថា ហេតុនេះបានជាក្រសួងព័ត៌ជំរុញលើកទឹកចិត្តឱ្យមានការអាន ហើយដែលការអាននេះ នឹងបានជួយពង្រឹងដល់កុមារមានចំណេះដឹងរឹងមាំ បន្ថែមទៀត។ ឯកឧត្តមរដ្ឋមន្រ្តីបានគូសបញ្ជាក់ឱ្យដឹងថា៖ «ឱកាសពិព័រណ៍សៀវភៅនេះគឺជាបណ្តុំនៃសៀវភៅផ្សេងៗដ៏ច្រើនដែលយុវជន សិស្សានុសិស្ស និស្សិត ក៏ដូចជាពលរដ្ឋគួរនាំគ្នារកទិញពីព្រោះថាយើងមិនចាំបាច់ចំណាយពេលទៅបរទេសរកទិញទេ ដោយសៀវភៅទាំងនេះត្រូវបានប្រមូលផ្តុំលក់នៅទីនេះស្រាប់ទៅហើយ ដែលនេះជាការរុញសៀវភៅមកដល់ដៃបងប្អូនប្រជាពលរដ្ឋកម្ពុជាតែម្តង»។

លោកស្រី  Jacqueline Ng សហស្ថាបនិករបស់ Big Bad Wolf Books បានបញ្ជាក់ឱ្យដឹងថា ពិព័រណ៍សៀវភៅនេះដែរនឹងមានការបញ្ចុះតម្លៃរហូតដល់៩៥ភាគរយ ក្នុងនេះដែរតម្លៃសៀវភៅទាបបំផុតចាប់ពី១ដុល្លារ ក្នុងមួយក្បាល។ លោកស្រីបានបន្ដថា ចាប់ពីថ្ងៃចន្ទដល់ថ្ងៃសុក្រ សិស្ស-និស្សិតទាំងអស់នឹងទទួលបានការបញ្ចុះតម្លៃ៥ភាគរយលើសៀវប្រភេទមួយចំនួន ។ លោកស្រីបានឱ្យដឹងថា ដើម្បីទទួលបានការបញ្ចុះតម្លៃនេះ ពួកគេគ្រាន់តែបង្ហាញកាតសិស្ស និស្សិត ឬស្លៀកពាក់ឯកសណ្ឋានសិស្ស និស្សិតរបស់គេនៅពេលគិតលុយ។ លោកស្រីអះអាងថា៖ «កម្មវិធីបញ្ចុះតម្លៃនេះ ស័ក្តិសមបំផុតសម្រាប់ក្រុមសិស្ស និស្សិត និងអ្នកអានវ័យក្មេង ក្នុងការបង្កើត  បណ្ណាល័យផ្ទាល់ខ្លួន»។

លោកស្រី  Jacqueline Ng បានបញ្ជាក់បន្ថែមទៀតថា ពិព័រណ៍សៀវភៅនេះគឺជាលើកទី៤ហើយនៅកម្ពុជា និងសម្រាប់សៀវភៅដែលបាននាំយកមកលក់នេះកន្លងមកត្រូវបានលក់ចេញបានប្រមាណជាង៦០ភាគរយ ដែលនេះបង្ហាញថាការអានសៀវភៅក្នុងស្រទាប់យុវជនមានការកើនឡើងបន្តបន្ទាប់។
សូមបញ្ជាក់ថា ពិព័រណ៍លក់សៀវភៅនេះនឹងចាប់ផ្តើមពីថ្ងៃចន្ធ ដល់ថ្ងៃព្រហស្បតិ៍ចាប់ពីម៉ោង ១០ព្រឹកដល់ម៉ោង១០យប់ និងថ្ងៃសុក្រដល់ថ្ងៃអាទិត្យ ចាប់ពីម៉ោង១០ព្រឹកដល់ម៉ោង១២យប់ នៅផ្សាររុងរឿង ស្ថិតនៅក្នុងភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វារ ក្នុងរាជធានីភ្នំពេញ៕

ដោយ៖ មករា រូបថត៖ ខឹម សុវណ្ណារ៉ា