AKP ភ្នំពេញ ថ្ងៃទី២៥ ខែមិថុនា ឆ្នាំ២០២៥

ឯកឧត្ដម ង្វៀន មិញវូ (Nguyen Minh Vu) ឯកអគ្គរដ្ឋទូតនៃសាធារណរដ្ឋសង្គមនិយមវៀតណាមប្រចាំនៅ  កម្ពុជាបានលើកឡើងពីការពង្រឹងទំនាក់ទំនងការទូត និងកិច្ចសហប្រតិបត្តិការលើគ្រប់វិស័យជាមួយនឹងកម្ពុជាក្នុងការគាំទ្រគ្នាទៅវិញទៅមកនៅលើវេទិកាតំបន់ និងអន្តរជាតិ ការផ្សព្វផ្សាយសម្រាប់ប្រជាជននៃប្រទេសទាំងពីរ ជាពិសេសយុវជនជំនាន់ក្រោយអំពីប្រពៃណីប្រវត្តិសាស្ត្រនៃសាមគ្គីភាព ការតស៊ូនិងការជួយគ្នាទៅវិញទៅមក ដើម្បីធានាផលប្រយោជន៍រួមនៃប្រទេសទាំងពីរនាពេលអនាគត។ ការលើកឡើងរបស់ឯកឧត្ដមឯកអគ្គរដ្ឋទូតបែបនេះ ក្នុងបទសម្ភាសន៍ជាមួយទីភ្នាក់ងារសារព័ត៌មានកម្ពុជា (AKP) ក្នុងឱកាសខួបលើកទី ៥៨ នៃការបង្កើតទំនាក់ទំនងការទូតរវាងវៀតណាម និងកម្ពុជា។

ឯកឧត្ដម ង្វៀន មិញវូ បានគូសបញ្ជាក់ថា នាពេលខាងមុខ ដើម្បីបន្តរក្សា និងអភិវឌ្ឍន៍ប្រពៃណីដ៏ល្អរវាងវៀតណាម និងកម្ពុជា ប្រទេសយើងទាំងពីរត្រូវបន្តអនុវត្តន៍ទិសដៅសហប្រតិបត្តិការសំខាន់ៗដែលថ្នាក់ដឹកនាំជាន់ខ្ពស់នៃប្រទេសទាំងពីរបានកំណត់ក្នុងកិច្ចប្រជុំកំពូលរវាងបក្សទាំងពីរនៅទីក្រុងហូជីមិញ នាចុងខែ កុម្ភៈ ឆ្នាំ ២០២៥ កន្លងទៅ សហការគ្នាយ៉ាងជិតស្និទ្ធលើគ្រប់វិស័យ រួមទាំងការផ្លាស់ប្តូរព័ត៌មាន គោលជំហរ ទស្សនៈ បទពិសោធន៍ដោះស្រាយបញ្ហា ក៏ដូចជាការគាំទ្រគ្នាទៅវិញទៅមកនៅលើវេទិកាតំបន់និងអន្តរជាតិជំវិញបញ្ហាដែលមានចំណាប់អារម្មណ៍ដូចគ្នា សម្រាប់ធានាផលប្រយោជន៍រួមនៃប្រទេសទាំងពីរ។

ឯកឧត្ដមឯកអគ្គរដ្ឋទូតបានថ្លែងថា ឈរលើមូលដ្ឋាននៃទំនាក់ទំនងទ្វេភាគីរយៈពេល ៥៨ ឆ្នាំនិងក្នុងបរិបទនៃស្ថានការណ៍ក្នុងតំបន់និងពិភពលោកកាន់តែស្មុគស្មាញ និងមិនប្រកដបក្រជា ក៏ដូចជាការពិតជាក់ស្ដែងបានបង្ហាញឱ្យឃើញថា "សន្តិភាពស្ថិរភាពនិងការអភិវឌ្ឍរបស់ប្រទេសមួយក៏ជាសន្តិភាពស្ថិរភាពនិងការអភិវឌ្ឍរបស់ភាគីម្ខាងទៀត" ចំណងសាមគ្គីភាពរវាងប្រទេសទាំងពីរគឺជាទ្រព្យសម្បត្តិដ៏មានតម្លៃដែលត្រូវថែរក្សានិងអភិវឌ្ឍន៍សម្រាប់មនុស្សជំនាន់ក្រោយ។ ឯកឧត្ដមឯកអគ្គរដ្ឋទូតបានបញ្ជាក់យ៉ាងដូច្នេះថា៖ «បង្កើនសហការគ្នាក្នុងការងារអប់រំ និងផ្សព្វផ្សាយសម្រាប់ប្រជាជននៃប្រទេសទាំងពីរ ជាពិសេសយុវជនជំនាន់ក្រោយអំពីប្រពៃណីប្រវត្តិសាស្ត្រនៃសាមគ្គីភាព ការតស៊ូនិងការជួយគ្នាទៅវិញទៅមករវាងប្រជាជននៃប្រទេសទាំងពីរវៀតណាមនិងកម្ពុជា»។

ក្នុងឱកាសនោះ ឯកឧត្ដមឯកអគ្គរដ្ឋទូតវៀតណាមបានបន្ថែមថា ខ្លឹមសារដ៏មានសារសំខាន់មួយទៀត គឺបង្កើនកិច្ចសហប្រតិបត្តិការនិងតភ្ជាប់សេដ្ឋកិច្ចទាំងពីរ ដើម្បីគាំទ្រដល់ការអភិវឌ្ឍរបស់គ្នាទៅវិញទៅមក។ ឯកឧត្ដមឯកអគ្គរដ្ឋទូតបានសង្កត់ធ្ងន់ថា៖ «នៅពេលប្រទេសទាំងពីរដែលមានបានរឹងមាំដូចគ្នា អភិវឌ្ឍន៍ជាមួយគ្នា មានសមាគ្គីភាពមិត្តភាពជាមួយគ្នានោះហើយ យើងប្រាកដជាអាចបោះជំហានឈានទៅមុខយ៉ាងរឹងមាំក្នុងបរិបទសភាពការណ៍ពិភពលោកដែលពោពេញទៅដោយបញ្ហាប្រឈមនាពេលបច្ចុប្បន្ននេះ»៕

ដោយ៖ រិទ្ធី