AKP ភ្នំពេញ ថ្ងៃទី២៥ ខែមិថុនា ឆ្នាំ២០២៥ -- ឯកឧត្តម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង ព្រមទាំងសហការី បានអញ្ជើញចុះពិនិត្យមើលការងារបង្កបង្កើនផលដំណាំស្រូវវស្សា បន្លែ និងការចិញ្ចឹមសត្វ នៅភូមិទ័ពស្រូវ និងភូមិផ្លូវគោ ក្នុងខេត្តកំពង់ឆ្នាំង កាលពីថ្ងៃទី២៤ ខែមិថុនា ឆ្នាំ២០២៥។

ក្នុងឱកាសនោះ ឯកឧត្តមរដ្ឋលេខាធិការបានឱ្យដឹងថា ពេលនេះ ក្រុមការងារកំពុងចុះពិនិត្យមើលការដាំដុះដំណាំបន្លែរបស់កសិករ ស សាម៉ន ស្ថិតនៅភូមិទ័ពស្រូវ ឃុំបន្ទាយព្រាល ស្រុករលាប្អៀរ ខេត្តកំពង់ឆ្នាំង និងចុះទៅមើលការចិញ្ចឹមសត្វមាន់ ជ្រូក ស្ថិតនៅភូមិផ្លូវគោ ឃុំបន្ទាយព្រាល ស្រុករលាប្អៀរ ខេត្តកំពង់ឆ្នាំងផងដែរ។

ជាមួយគ្នានេះ ក្រុមការងារក៏បានចុះពិនិត្យការងារបង្កបង្កើនផលស្រូវវស្សារបស់ប្រជាកសិករនៅឃុំបន្ទាយព្រាល ស្រុករលាប្អៀរ ខេត្តកំពង់ឆ្នាំង ហើយជារួមការងារបង្កបង្កើនផលស្រូវវស្សារបស់ប្រជាកសិករក្នុងខេត្តកំពង់ឆ្នាំង  អនុវត្តបានផ្ទៃដីដាំដុះ ១៣០ ៨៥១ហិកតា ស្មើនឹង ៩០.២៤% លើផែនការ ១៤៥ ០០០ហិកតា ក្នុងនោះស្រូវស្រាល ២៧ ៤១៩ហិកតា ស្រូវកណ្តាល ៥៤ ១៨៥ហិកតា និងស្រូវធ្ងន់ ៤៩ ២៤៧ហិកតា  បើប្រៀបធៀបឆ្នាំ២០២៤ លឿនជាង ២០ ៩២៥ហិកតា៕

ដោយ៖ ពេជ្រ សំអឿន (ប្រភព៖ ក្រសួងកសិកម្ម រុក្ខាប្រមាញ់ និងនេសាទ)