AKP តាកែវ ថ្ងៃទី២៥ ខែមិថុនា ឆ្នាំ២០២៥-- ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានមានប្រសាសន៍ថា កន្លងមកមានការលើកឡើង និងមានការមន្ទិលសង្ស័យ ពីគម្រោងព្រែកជីកហ្វូណនតេជោ ថាដើរដល់ណាហើយឥឡូវនេះ។ ការបោះបង្គោលតម្រាយព្រំដីចំនួន៥៥០បង្គោលក្នុងខេត្តតាកែវដើម្បីសាងសង់ព្រែកជីកហ្វូណនតេជោបានបញ្ចប់ហើយ សបញ្ជាក់ពីកិច្ចខិតខំប្រឹងប្រែងរបស់មន្រ្តីពាក់ព័ន្ធ ជាពិសេសរាជរដ្ឋាភិបាលកម្ពុជា ដែលមានការប្ដេជ្ញាក្នុងការកសាងព្រែកជីកនេះ ឱ្យបានឆាប់ទៅតាមផែនការកំណត់។

ឯកឧត្តមអភិបាលខេត្តបានលើកឡើងដូច្នេះកាលពីថ្ងៃទី២៤ ខែមិថុនា ឆ្នាំ២០២៥ ក្នុងឱកាសអញ្ជើញចុះពិនិត្យផ្ទាល់ទីតាំងបិទបញ្ចប់ ការប្រមូលទិន្នន័យនិយាមការ ការបោះបង្គោលព្រំដី និងចុះសិក្សាប្រមូលព័ត៌មាន គម្រោងព្រែកជីកហ្វូណនតេជោ នៅក្នុងភូមិសាស្រ្តខេត្តតាកែវ បង្គោលបិទបញ្ចប់ចុងក្រោយលេខ៥៥០ ស្ថិតនៅឃុំគោកព្រេចស្រុកគិរីវង់ខេត្តតាកែវ រួមជាមួយថ្នាក់ដឹកនាំក្រសួងសាធារណការ និងដឹកជញ្ជូន ព្រមទាំងមន្ត្រីជំនាញពាក់ព័ន្ធ។

ឯកឧត្តមបានមានប្រសាសន៍ទៀតថា ព្រែកជីកហ្វូណនតេជោនេះជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវទឹកកម្ពុជា ដើម្បីតភ្ជាប់ប្រព័ន្ធផ្លូវទឹកទន្លេមេគង្គនិងប្រព័ន្ធផ្លូវទឹកសមុទ្រ។ព្រែកជីកហ្វូណនតេជោ បង្កើនអធិប្បតេយ្យភាពនៃការដឹកជញ្ជូនតាមផ្លូវទឹករបស់កម្ពុជា។កាត់បន្ថយការចំណាយពេលវេលា ចម្ងាយផ្លូវ ថវិកា នីតិវិធី សម្រាប់នាវានិងទំនិញចេញចូល ធ្វើឱ្យចំណេញ ដើម្បីបង្កើនល្បឿននៃការអភិវឌ្ឍសេដ្ឋកិច្ចជាតិ។ធ្វើសមាហរណកម្មដឹកជញ្ជូនតាមផ្លូវទឹក តាមរយៈការតភ្ជាប់ពហុមធ្យោបាយដឹកជញ្ជូន កាត់បន្ថយការខូចខាតផ្លូវថ្នល់ ការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍លើផ្លូវថ្នល់។

ទន្ទឹមនឹងនេះ ឯកឧត្តមក៏បានអំពាវនាវដល់បងប្អូនប្រជាពលរដ្ឋទាំងអស់ សូមមានការជឿជាក់លើការដឹកនាំរបស់រាជរដ្ឋាភិបាល ក្នុងគម្រោងសាសង់ព្រែកជីកហ្វូណនតេជោនេះ។ហើយនៅពេល ព្រែកជីកហ្វូណនតេជោសាងសង់រួចរាល់ វានឹងផ្តល់អត្ថប្រយោជន៍ជាច្រើន ដល់ប្រទេសកម្ពុជាយើង ជាពិសេសលើវិស័យលើដឹកជញ្ជូន ដោយធ្វើការដឹកទំនិញពីព្រែកជីកនេះ ទៅកាន់សមុទ្របានយ៉ាងឆាប់រហ័ស។ដោយឡែកសម្រាប់ខេត្តតាកែវដែលជាខេត្តឆ្លងកាត់នៃព្រែកជីកហ្វូណនតេជោនេះ ក៏នឹងទទួលបានផ្លែការនៃការរីកចម្រើនសេដ្ឋកិច្ច របស់ខេត្ត កាន់តែច្រើនថែមទៀតជាក់ជាពុំខាន។

សូមបញ្ជាក់ថា គម្រោងព្រែកជីកហ្វូណនតេជោ ឆ្លងកាត់ខេត្តតាកែវ មានប្រវែងប្រមាណ ៥៨គីឡូម៉ែត្រ ដោយឆ្លងកាត់ស្រុកចំនួន៦គឺស្រុកអង្គរបូរី ស្រុកព្រៃកប្បាស ក្រុងដូនកែវ ស្រុកទ្រាំង ស្រុកកោះអណ្ដែត និងស្រុកគិរីវង់ មានឃុំ-សង្កាត់ចំនួន១៧ឃុំ-សង្កាត់ មានបង្គោលតម្រុយសរុប៥៥០បង្គោល។បង្គោលដែលត្រូវបិទបញ្ចប់នៃការបោះបង្គោលព្រំដីគម្រោងព្រែកជីកហ្វូណនតេជោ ក្នុងថ្ងៃទី២៤ ខែមិថុនា ឆ្នាំ២០២៥នេះ គឺបង្គោលលេខ៥៥០ ស្ថិតនៅឃុំគោកព្រេច ស្រុកគិរីវង់ ខេត្តតាកែវ៕

ដោយ អ៊ុច សៀង