AKPកំពង់ធំថ្ងៃទី២៥ខែមិថុនាឆ្នាំ២០២៥​-- លោកស្រី​ សុិន​ សុីផាន ប្រធានមន្ទីរកិច្ចការនារី​ខេត្តកំពង់ធំ​តំណាងលោកស្រីលំ​ គន្ធារី​ អភិបាលរងខេត្តនិងជាអនុប្រធានអចិន្ត្រៃយ៍​គណះកម្មាធិការប្រយុទ្ធប្រឆាំងអំពេីជួញដូរមនុស្សខេត្តកំពង់ធំនិងមានការអញ្ជើញចូលរួមពី លោក​ លោកស្រី​ ជាសមាជិកស្ថាប័នអង្គការ​ និងអង្គភាពពាក់ព័ន្ធមួយចំនួនកាលពីថ្ងៃទី២៤ខែមិថុនាឆ្នាំ២០២៥មានបើកកិច្ចប្រជុំឆមាសទី១និងលើកទិសដៅការងារ ឆមាសទី២ ឆ្នាំ២០២៥របស់គណះកម្មាធិការប្រយុទ្ធប្រឆាំងអំពើជួញដូរមនុស្ស(គ.ជ.ប.ជ) ។

លោកស្រី​ សុិន​ សុីផានបានមានប្រសាសន៍ថាក្នុងរយៈពេល០៦ខែឆ្នាំ២០២៥នេះ គណៈកម្មាធិការនិង លេខាធិការដ្ឋានគ.ខ.ប.ជនិងក្រុមការងារទាំង៦ដែលជាសេនាធិការបានខិតខំអនុវត្តតួនាទី ភារកិច្ច ដោយទទួលបាន លទ្ធផលគួរជាទីមោទនៈ។ចំណែកអង្គការដៃគូក៏បានចូលរួមក្នុងការសហការយ៉ាងសកម្មដើម្បីរួមចំណែកអនុវត្តការងារប្រយុទ្ធប្រឆាំងអំពើជួញដូរមនុស្ស ជា ពិសេសបង្ក្រាបជនល្មើសនិងជួយសមាហរណកម្មជនរងគ្រោះនិងនាំជនរងគ្រោះឱ្យគេចផុតពីអំពើជួញដូរមនុស្សផងដែរ។

លោកស្រីប្រធានមន្ទីរក៏បានណែនាំដល់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សត្រូវខិតខំយកចិត្តទុកដាក់សហការក្នុងភាពជាដៃគូឱ្យបានល្អជាមួយអង្គការពាក់ព័ន្ធនានា ជំរុញការផ្សព្វផ្សាយ ការអប់រំ និងការបង្ការទប់ស្កាត់តាមគោលដៅប្រឈមខ្ពស់ រួមមាន៖មណ្ឌលកម្សាន្តសម្រាប់មនុស្សពេញវ័យ ផ្ទះសំណាក់និងសណ្ឋាគារជាដើម។ល។ 

រាជរដ្ឋាភិបាលកម្ពុជានិងថ្នាក់ដឹកនាំគ្រប់លំដាប់ថ្នាក់បានយកចិត្តទុកដាក់និងចាត់វិធានការយ៉ាងម៉ឺងម៉ាត់ដោយសារតែមានជនខិលខូចបានធ្វើសកម្មភាពជួញដូរមនុស្សដោយនាំយកជនបរទេសមកជ្រកកោណ និងធ្វើជាអាជីវកម្ម ជួញដូរមនុស្សនៅក្នុងប្រទេសកម្ពុជា។កន្លងមកធ្លាប់តែមានជន ខិលខូចបាននាំយកជនរងគ្រោះពីប្រទេសកម្ពុជា ហើយជួញដូរនៅក្រៅប្រទេស ដូច្នេះហើយបានជាយើងត្រូវតែមានការចូលរួមសហការ និងបង្ក្រាបជនខិលខូច ប្រភេទនេះឱ្យបានដើម្បីលុបបំបាត់ការជួញដូរមនុស្សនៅប្រទេសកម្ពុជា៕

ដោយ៖ ស៊ុម វណ្ណា