AKP ភ្នំពេញ ថ្ងៃទី២៤ ខែមិថុនា ឆ្នាំ២០២៥-- ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអនុញ្ញាតឱ្យលោកស្រី Alissar Chaker តំណាងប្រចាំប្រទេសកម្មវិធីអភិវឌ្ឍន៍សហប្រជាជាតិប្រចាំនៅព្រះរាជាណាចក្រកម្ពុជា ព្រមទាំងសហការី ចូលជួបសម្តែងការគួរសម និងជម្រាបលា ក្នុងឱកាសដែលលោកស្រីនឹងត្រូវចប់បេសកកម្មការងារនៅព្រះរាជាណាចក្រកម្ពុជា នាខែកក្កដា ឆ្នាំ២០២៥ខាងមុខនេះ។

មានប្រសាសន៍សំណេះសំណាលនារសៀលថ្ងៃទី២៤ ខែមិថុនា ឆ្នាំ២០២៥ នៅទីស្តីការក្រសួង ឯកឧត្តមរដ្ឋមន្ត្រី និងលោកស្រីតំណាងអង្គការ UNDP បានលើកឡើងពីកិច្ចសហប្រតិបត្តិការដ៏ល្អកន្លងមករវាងរាជរដ្ឋាភិបាលកម្ពុជា និងអង្គការ UNDP ជាពិសេសក្នុងក្របខណ្ឌជាមួយក្រសួងផែនការ ដោយអង្គការ UNDP ពិតជាបានដើរតួនាទីយ៉ាងសំខាន់ឧបត្ថម្ភគាំទ្រដល់ការងាររៀបចំផែនការយុទ្ធសាស្ត្រអភិវឌ្ឍន៍ជាតិ ក្របខ័ណ្ឌគោលដៅអភិវឌ្ឍន៍សហស្សវត្សរ៍កម្ពុជា ២០០០-២០១៥,ក្របខ័ណ្ឌគោលដៅអភិវឌ្ឍប្រកបដោយចីរភាព២០១៦-២០៣០,ការតាមដានត្រួតពិនិត្យស្តីពីលទ្ធផលនៃការសម្រេចបានគោលដៅអភិវឌ្ឍប្រកបដោយចីរភាពនៅកម្ពុជា តាមរយៈការរៀបចំរបាយការណ៍ត្រួតពិនិត្យថ្នាក់ជាតិដោយស្ម័គ្រចិត្ត,សហការនិងគាំទ្រការងារគណនា និងវិភាគពីភាពក្រីក្ររបស់ប្រជាជនកម្ពុជា, កម្មវិធីកំណត់អត្តសញ្ញាណកម្មគ្រួសារក្រីក្រនៅកម្ពុជា ក្នុងនោះ UNDPបានផ្តល់នូវតាប្លេត សម្រាប់ឃុំ សង្កាត់ និងការចំណាយលើប្រព័ន្ធគ្រប់គ្រងតាប្លេត សម្រាប់ប្រមូលទិន្នន័យការកំណត់អត្តសញ្ញាណកម្មគ្រួសារក្រីក្រ រៀបចំប្រព័ន្ធដាក់ពិន្ទុ និងបញ្ជីសំណួរ កសាងសមត្ថភាពមន្រ្តីថ្នាក់ជាតិ ថ្នាក់ក្រោមជាតិ អំពីយន្តការតាមដានត្រួតពិនិត្យ វាយតម្លៃ, ប្រព័ន្ធគ្រប់គ្រងទិន្នន័យគ្រួសារក្រីក្រ និងអភិវឌ្ឍន៍ប្រព័ន្ធគ្រប់គ្រងមតិជំទាស់ និង សំណូមពរនៃកម្មវិធីអត្តសញ្ញាណកម្មគ្រួសារក្រីក្រ និងបានគាំទ្រដល់ការពង្រីកវិសាលភាពដល់គ្រួសារងាយរងហានិភ័យទាំងជំនួយបច្ចេកទេស និងវគ្គបណ្តុះបណ្តាលនីតិវិធី ដល់អ្នកអនុវត្តផងដែរ។

ក្នុងឱកាសនោះ ឯកឧត្តមរដ្ឋមន្ត្រីបានថ្លែងអំណរគុណដល់អង្គការ UNDP ដែលបានផ្តល់ជំនួយបច្ចេកទេសក្នុងការរៀបចំផែនការយុទ្ធសាស្ត្រអភិវឌ្ឍន៍ជាតិ ដែលបានទទួលការឯកភាពពីគណៈរដ្ឋមន្ត្រី, ការអនុម័តយល់ព្រមពីរដ្ឋសភា ព្រឹទ្ធសភា និងត្រូវបានប្រកាសឱ្យប្រើច្បាប់ស្តីពីការអនុម័តយល់ព្រមលើផែនការយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាល នីតិកាលទី៧ នៃរដ្ឋសភា កាលពីថ្ងៃទី១២ ខែមិថុនា ឆ្នាំ២០២៥ កន្លងទៅ។

ក្រៅពីកិច្ចសហប្រតិបត្តិការខាងលើ លោកស្រី Alissar Chaker មានប្រសាសន៍ថា អង្គការ UNDP បានគាំទ្រដល់វិទ្យាស្ថានជាតិស្ថិតិ នៃក្រសួងផែនការ  លើជំនួយបច្ចេកទេសក្នុងការធ្វើជំរឿន អង្កេតនានា សំដៅជួយដល់ដំណើរការគិតគូរពីភាពក្រីក្រនៅកម្ពុជាឱ្យបានប្រសើរឡើង ជាមួយគ្នានេះ UNDP បានជួយដល់រាជរដ្ឋាភិបាលកម្ពុជា តាមរយៈក្រសួងផែនការ ដើម្បីត្រៀមខ្លួនចាកចេញដោយរលូនពីក្រុមប្រទេសអភិវឌ្ឍតិចតួច(LDCs) នៅឆ្នាំ២០២៩ខាងមុខនេះផងដែរ ជាពិសេសលើការប្រើប្រាស់ប្រព័ន្ធបច្ចេកវិទ្យាAI ជាជំនួយដល់ការរៀបចំផែនការ គោលនយោបាយ និងទិន្នន័យសំខាន់ៗផងដែរ។

ទន្ទឹមនឹងនេះ ឯកឧត្តមរដ្ឋមន្ត្រីបានថ្លែងអំណរគុណចំពោះអង្គការ UNDP ដែលបានឧបត្ថម្ភគាំទ្រដល់ក្រសួងផែនការ ធ្វើឱ្យសម្រេចបាននូវសមិទ្ធិផលសំខាន់ៗជាច្រើនជូនរាជរដ្ឋាភិបាលកម្ពុជា ជាពិសេសការឈានឆ្ពោះទៅសម្រេចឱ្យបានក្នុងក្របខណ្ឌគោលដៅអភិវឌ្ឍប្រកបដោយចីរភាព២០១៦-២០៣០ ហើយឯកឧត្តមរដ្ឋមន្ត្រីសង្ឃឹមថា តំណាងអង្គការUNDP ដែលបន្តវេនពីលោកស្រីនឹងបន្តកិច្ចសហប្រតិបត្តិការប្រកបដោយផ្លែផ្កានេះជាមួយក្រសួងផែនការ ជូនដល់រាជរដ្ឋាភិបាលកម្ពុជា និងអង្គការសហប្រជាជាតិ។

ជាមួយគ្នានេះដែរ លោកស្រី Alissar Chaker បានថ្លែងអំណរគុណដល់ឯកឧត្តមរដ្ឋមន្ត្រី  និងសហការី នៃក្រសួងផែនការដែលបានធ្វើការងារគ្នាយ៉ាងជិតស្និទកន្លងមក ដែលលោកស្រីបានសិក្សាស្វែងយល់បានច្រើន ជាមួយនឹងលទ្ធផលសម្រេចបានជាមួយគ្នា ហើយលោកស្រីក៏សង្ឃឹមដែរថា តំណាងរបស់អង្គការ UNDP ថ្មី នឹងបន្តកិច្ចសហប្រតិបត្តិការដ៏ល្អនេះ ដើម្បីរួមគ្នាសម្រេចឱ្យបានក្របខណ្ឌគោលដៅអភិវឌ្ឍប្រកបដោយចីរភាព ២០១៦-២០៣០៕

ដោយ៖ ពេជ្រ សំអឿន (ប្រភព៖ ក្រសួងផែនការ)