AKPកំពង់ធំថ្ងៃទី២៤ ខែមិថុនា ឆ្នាំ២០២៥ -- លោកស្រី លំ គន្ធារី អភិបាលរងខេត្តកំពង់ធំជំរុញដល់អាជ្ញាធរពាក់ព័ន្ធក្នុងការអនុវត្តការងារសេវាសង្គមឱ្យកាន់តែរឹងមាំនិងឆ្លើយតបទៅនឹងតម្រូវការបច្ចុប្បន្នរបស់ប្រជាពលរដ្ឋមូលដ្ឋាន ការលើកឡើងរបស់លោកស្រីអភិបាលស្រុកនៅ ក្នុងពិធីបើកវគ្គបណ្ដុះបណ្ដាលស្ដីពីការពង្រឹងសមត្ថភាពដល់គណៈកម្មាធិការពិគ្រោះយោបល់កិច្ចការស្ត្រីនិងកុមារខេត្ត ក្រុង ស្រុក គណៈកម្មាធិការទទួលបន្ទុកកិច្ចការនារី និងកុមារឃុំ សង្កាត់និងសមាសភាពពាក់ព័ន្ធលើកលើការអនុវត្តការងារសេវាសង្គមនាព្រឹកថ្ងៃទី២៤ខែមិថុនា ឆ្នាំ២០២៥ នៅសាលាខេត្តកំពង់ធំដោយមានការអញ្ជើញចូលរួមពីលោកជំទាវ សៀង លី សមាជិកក្រុមប្រឹក្សាខេត្តលោកស្រី ហុក ផល្លី លោក គៀង សេងគី ប្រធានសមាគមក្រុមប្រឹក្សាថ្នាក់មូលដ្ឋានខេត្ត លោក លោកស្រី ជាក្រុមប្រឹក្សាក្រុង ស្រុក ឃុំ សង្កាត់ មន្ត្រីពាក់ព័ន្ធប្រមាណជិត៤០០ នាក់។

ពិធីនេះប្រព្រឹត្តទៅនៅថ្ងៃទី ២៤-២៥ ខែ មិថុនា ឆ្នាំ២០២៥ សហការរៀបចំពីគណៈកម្មាធិការពិគ្រោះយោបល់កិច្ចការស្ត្រី និងកុមារ (គ.ក.ស.ក) ខេត្ត ក្រុមប្រឹក្សាថ្នាក់មូលដ្ឋានខេត្តកំពង់ធំ។

លោក គៀង សេងគី ប្រធានសមាគមក្រុមប្រឹក្សាថ្នាក់មូលដ្ឋានខេត្ត បានលើកឡើងថាវគ្គបណ្ដុះបណ្ដាលនេះអាចបង្កើនការយល់ដឹងអំពីសូចនាកររបស់បញ្ហាសេវាសង្គម គាំទ្រ និងលើកទឹកចិត្តដល់អ្នកចូលរួមចេះរៀបចំផែនការសកម្មភាពនិងប្រើប្រាស់ថវិកាសេវាសង្គមឱ្យចំគោលដៅមានប្រសិទ្ធភាព ព្រមទាំងមានសមត្ថភាព រៀបចំលើការគ្រោងផែនការសកម្មភាពនិងថវិកាឃុំ សង្កាត់។អាចកំណត់ប្រមូលបញ្ហាសេវាសង្គម តាមរយៈផែនទីសេវាសង្គម ដើម្បីដាក់បញ្ចូលទៅក្នុងផែនការ អភិវឌ្ឍន៍និងកម្មវិធីវិនិយោគបីឆ្នាំរំកិលឃុំសង្កាត់និងអាចបង្កើនការយល់ដឹងដល់អ្នកចូលរួមពីរបៀបនៃការកំណត់បញ្ហា តាមរយៈផែនទីសេវាសង្គមភូមិ និង ការរៀបចំតារាងវិភាគបញ្ហា តម្រូវការនិងដំណោះស្រាយដោយសមស្របសម្រាប់សេវាសង្គម។

លោកស្រី លំ គន្ធារី បានមានប្រសាសន៍បញ្ជាក់ថាការបើកវគ្គបណ្ដុះបណ្ដាលស្ដីពីការពង្រឹងសមត្ថភាពដល់គណៈកម្មការធិការពិគ្រោះយោបល់កិច្ចការស្ត្រីនិងកុមារក្នុងគោលបំណងលើកកម្ពស់ចំណេះដឹងនិងសមត្ថភាពរបស់គណៈកម្មាធិការពិគ្រោះយោបល់កិច្ចការស្ត្រីនិងកុមារ (គ.ក.ស.ក) ខេត្ត ក្រុង ស្រុក ឃុំ សង្កាត់ និងសមាសភាពពាក់ព័ន្ធក្នុងការអនុវត្តការងារសេវាសង្គមឱ្យកាន់តែរឹងមាំនិងឆ្លើយតបទៅនឹងតម្រូវការបច្ចុប្បន្នរបស់ប្រជាពលរដ្ឋនៅមូលដ្ឋានឱ្យកាន់តែមានភាពល្អប្រសើរឡើង។

លោកស្រីបន្តថាដើម្បីបំពេញបេសកកម្មការពារនិងជំរុញសិទ្ធិរបស់ស្ត្រីកុមារនិងក្រុមបុគ្គលងាយរងគ្រោះដោយផ្ដោតលើការផ្ដល់សេវាសាធារណៈយ៉ាងសកម្មឱ្យរឹងរឹតតែមានគុណភាព គុណផលប្រកបដោយពេញចិត្តរបស់បងប្អូនប្រជាពលរដ្ឋក្នុងនោះយើងត្រូវយល់ដឹងអំពីសាវតា លិខិតបទដ្ឋានពាក់ព័ន្ធនិងសមាសភាពរបស់គណៈកម្មាធិការពិគ្រោះយោបល់កិច្ចការស្ត្រី និងកុមារ(គ.ក.ស.ក)និងគណៈកម្មាធិការទទួលបន្ទុកកិច្ចការនារី និងកុមារ (គ.ក.ន.ក)។

លោកស្រីលំ គន្ធារីបានបន្ថែមថាវគ្គបណ្តុះបណ្តាលនេះមានមេរៀនអំពី បច្ចេកទេសនិងជំនាញក្នុងការផ្តល់សេវាសង្គម ករណីអនុវត្តនិងការចែករំលែកបទពិសោធន៍ពិត ការគ្រប់គ្រង ការចាត់តាំង និងការកំណត់មុខសញ្ញាចំណាយ ថវិកាសេវាសង្គមនិងអនាម័យបរិស្ថាន នៃមូលនិធីក្រុង ស្រុកនិងមូលនិធិឃុំ សង្កាត់ ដែលផ្សាភ្ជាប់ទៅនឹងការអនុវត្តការងារសេវាសង្គមនៅថ្នាក់ខេត្ត ក្រុង ស្រុក និងឃុំ សង្កាត់។ ការគ្រោងថវិកា និងការអនុវត្តថវិកាសេវាសង្គម ឃុំសង្កាត់ក្នុងបរិបទនៃការអនុវត្តលើ “ការលើកកម្ពស់តម្លាភាពនិងគណនេយ្យភាពនៃការគ្រប់គ្រងថវិកាថ្នាក់ ក្រោមជាតិ” ដែលបានក្លាយជាកិច្ចការសំខាន់មួយ ដើម្បីធានាថាការប្រើប្រាស់ធនធានរដ្ឋ ត្រូវបានអនុវត្តដោយ យុត្តិធម៌ មានភាពស្មើភាព និងឆ្លើយតបតាមតម្រូវការពិតប្រាកដរបស់ប្រជាពលរដ្ឋ។

លោកជំទាវ សៀង លី ក្នុងនាម គណៈកម្មាធិការពិគ្រោះយោបល់កិច្ចការស្ត្រី និងកុមារ (គ.ក.ស.ក) ខេត្តមានចំណាប់អារម្មណ៍ទៅលើវគ្គបណ្ដុះបណ្ដាលនេះដោយជំរុញឱ្យសិក្ខាកាមរៀបចំផែនការ សេវាសង្គមលើចំណុចមួយចំនួនដូចជាការ លើកកម្ពស់សុខមាលភាពមាតានិងទារក អាហារូបត្ថម្ភ ពង្រឹងនិងពង្រីកការអប់រំកុមារតូច ការលើកកម្ពស់គុណភាពអប់រំបឋមសិក្សានិងមធ្យមសិក្សា។ លើកកម្ពស់កិច្ចការស្ត្រីកុមារ សុខភាពយេនឌ័រ កិច្ចអន្តរាគមន៍គាំទ្រនិងជំរុញអនុវត្តកិច្ចការងារសង្គម ពង្រឹងការយល់ដឹងទប់ស្កាត់ការរីករាលដល់ជំងឺឆ្លងនិងមិនឆ្លងពង្រឹងការលើកកម្ពស់គណនេយ្យភាពសង្គមទឹកស្អាត អនាម័យ ការគ្រប់គ្រងសំណល់រឹង រាវនិងការបម្រែបម្រួលអាកាសធាតុ៕

ដោយ៖ ស៊ុម វណ្ណា