AKP កំពង់ស្ពឺ ថ្ងៃទី២៤ ខែមិថុនា ឆ្នាំ២០២៥ -- ឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងលោកជំទាវ ម៉េង វ៉ាន់ដានីន  ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ បានអញ្ជើញជាអធិបតី ក្នុងពិធីបើកកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅការងារបន្តឆ្នាំ២០២៥ របស់សមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពង់ស្ពឺ នាថ្ងៃទី២៤ ខែមិថុនា ឆ្នាំ២០២៥ ដោយមានការអញ្ជើញចូលរួមឯកឧត្តមអភិបាលរងខេត្ត លោកជំទាវ លោកស្រី ថ្នាក់ដឹកនាំ សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្ត ប្រធានមន្ទីរ អង្គភាពជុំវិញខេត្ត អភិបាល អភិបាលរង ក្រុង ស្រុក និងសមាជិក សមាជិការសរុបប្រមាណជា ៤០០នាក់ ពិធីនេះដែរប្រារព្ធធ្វើនៅសាលប្រជុំរដ្ឋបាលខេត្តកំពង់ស្ពឺ។‎

ថ្លែងក្នុងពិធីនោះ ឯកឧត្តម ជាម ច័ន្ទសោភ័ណ បានលើកឡើងថា ក្រោមការដឹកនាំរបស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី រាជរដ្ឋាភិបាលកម្ពុជា បាននិងកំពុងជំរុញការលើកកម្ពស់គុណតម្លៃស្ត្រីនិងក្មេងស្រី តាមរយៈការពង្រឹងសមត្ថភាពស្ត្រីឱ្យក្លាយជាអ្នកដឹកនាំតាមក្រសួង ស្ថាប័នរបស់ជាតិ ដោយបានទទួលស្គាល់ថា «ស្ត្រីគឺជាឆ្អឹងខ្នងដ៏រឹងមាំនៃសេដ្ឋកិច្ច និងសង្គមជាតិរបស់យើងទាំងអស់គ្នា»។

ឯកឧត្តមអភិបាលខេត្តបានមានប្រសាសន៍ថា កិច្ចប្រជុំនេះក៏មានគោលបំណងគូសបញ្ជាក់អំពីសារៈសំខាន់នៃការទទួលបាននិងអនុវត្តសិទ្ធិ ការលើកកម្ពស់សមភាពយេនឌ័រ និងការបង្កើនភាពអង់អាចដល់ស្ត្រីនិងក្មេងស្រីគ្រប់រូបនៅទូទាំងខេត្តកំពង់ស្ពឺ និងបានផ្តោតសំខាន់ក្នុងការ ធ្វើការរួមគ្នា ប្រកបដោយសហថាមពលទាញយកអត្ថប្រយោជន៍ពីភាគលាភយេនឌ័រ តាមរយៈអភិក្រមជីវភាពនៃ ប្រព័ន្ធតួអង្គតែមួយ ដើម្បីជំរុញកំណើនសេដ្ឋកិច្ចនិងលើកកម្ពស់សុខុមាលភាពសង្គម។

ទន្ទឹមនឹងនេះ ឯកឧត្តមបណ្ឌិតបានជំរុញឱ្យសមាជិកសមាគមនារី អនុសាខាមន្ទីរអង្គភាព និងក្រុង ស្រុក ត្រូវធ្វើសេចក្តីសម្រេចកែសម្រួលបំពេញបន្ថែម និងបន្តផ្សព្វផ្សាយអំពីគោលការណ៍ លក្ខន្តិកៈរបស់សមាគមនារីកម្ពុជាដើម្បីសន្តិភាព និងអភិវឌ្ឍន៍ ជូនសមាជិក និងអនុសាខាឱ្យបានជ្រួតជ្រាបដល់ស្ត្រីទូទៅ។ លទ្ធផលដែលទទួលបានខាងលើនេះ ដោយសារការខិតខំប្រឹងប្រែងរបស់ថ្នាក់ដឹកនាំសាខា និងអនុសាខាសមាគមន៍នារីកម្ពុជា ដើម្បីសន្តិភាព និងអភិវឌ្ឍន៍ និងជួយការងារសង្គម ការងារមនុស្សធម៌ ការងារអភិវឌ្ឍសមាគមតាមមូលដ្ឋាន និងមុខសញ្ញាដែលទទួលខុសត្រូវ មិនខ្លាចនឿយហត់ នឹងបន្តឈានទៅពង្រីកសមាជិកថ្មីបន្ថែមទៀតឱ្យធានាបានទាំងបរិមាណនិងគុណភាព ជាពិសេសឱ្យសមាជិកម្នាក់ៗយល់ដឹងពីភារកិច្ច និងកាតព្វកិច្ចរបស់ខ្លួន ក្នុងការជួយសង្គមជាតិឱ្យរឹងមាំទៅអនាគត។

ឯកឧត្តមបានអំពាវនាវ និងស្នើសុំដល់អាជ្ញាធរគ្រប់លំដាប់ថ្នាក់មន្ទីរ អង្គភាព គ្រឹះស្ថានឯកជន សង្គមស៊ីវិល អង្គការជាតិ និងអន្តរជាតិពាក់ព័ន្ធនានា សូមបង្កើនការយកចិត្តទុកដាក់លើកកម្ពស់តួនាទីស្ត្រី និងក្មេងស្រី ក្នុងបរិវត្តកម្មឌីជីថល ដើម្បីពន្លឿនកិច្ចអភិវឌ្ឍសេដ្ឋកិច្ច សង្គមប្រកបដោយបរិយាបន្នអាចធ្វើឱ្យពួកគេបានចូលរួមយ៉ាងសកម្ម និងប្រកបដោយសុវត្ថិភាពក្នុងវិស័យ សេដ្ឋកិច្ច និងសង្គមឌីជីថល ក្នុងការអភិវឌ្ឍជំនាញវិជ្ជាជីវៈ ការប្រកបមុខរបរ និងអាជីវកម្មជាដើម។ ជាពិសេសលោកជំទាវថ្នាក់ដឹកនាំ និងសមាជិក សមាជិកា សមាគមនារី ត្រូវយកចិត្តទុកដាក់លើចំណុចមួយចំនួនដូចជា៖ បន្តការខិតខំប្រឹងប្រែងគ្រប់សកម្មភាព ពង្រឹងរបៀបរបបធ្វើការ ការទទួល ខុសត្រូវទៅដល់ថ្នាក់ដឹកនាំឲ្យកាន់តែទូលំទូលាយ និងស៊ីជម្រៅទៅតាមគោលនយោបាយ របស់រាជរដ្ឋាភិបាលកម្ពុជា ទិសដៅយុទ្ធសាស្ត្រ និងផែនការសកម្មភាពរបស់ខេត្ត ក៏ដូចជាផែនការសមាគមនារីកម្ពុជាដើម្បីសន្តិភាពនិងអភិវឌ្ឍន៍។ ត្រូវការពារផលប្រយោជន៍របស់ស្ត្រី និងពង្រឹងសមត្ថភាពដល់ថ្នាក់ដឹកនាំ និងមន្ត្រីជាស្ត្រីតាមរយៈការបណ្តុះបណ្តាលជំនាញ ជាពិសេសការប្រើប្រាស់ប្រព័ន្ធ ព័ត៌មានវិទ្យាដើម្បីស្ត្រីមានលទ្ធភាពបំពេញការងារប្រកបដោយគុណភាព និងប្រសិទ្ធភាព ក្នុងយុគសម័យឌីជីថល។ ពង្រឹងរចនាសម្ព័ន្ធ និងពង្រីកសមាជិកសមាគមនារីក្នុងខេត្តឱ្យបានច្រើន និងខិតខំចលនារកធនធាន និងថវិកាសម្រាប់គាំទ្រដល់សកម្មភាពនារី។ ពង្រឹងសាមគ្គីភាព មិត្តភាព រក្សាទំនាក់ទំនងជិតស្និតរវាងថ្នាក់ដឹកនាំ និង មន្ត្រីគ្រប់លំដាប់ថ្នាក់ទាំងអស់ក្នុងខេត្តដើម្បីបង្កើនប្រសិទ្ធភាព និងគុណភាពការងារ។ ត្រូវឈ្វេងយល់រាល់ចំណុចសកម្ម និងបញ្ហាប្រឈម ដែលកើតមាននៅក្នុងជួរស្ត្រីជាថ្នាក់ដឹកនាំ និងក្នុងស្រទាប់មហាជនជានារី និងមានវិធានការដោះស្រាយ។ ពង្រឹង និងថែរក្សានូវស្មារតីសាមគ្គីភាពឯកភាពគ្នាអំពីទស្សនៈគោលជំហរ នយោបាយសតិអារម្មណ៍ឱ្យកាន់តែរឹងមាំផងដែរ៕

ដោយ លឹម សាន្ត