AKP តាកែវ ថ្ងៃទី២៤ ខែមិថុនា ឆ្នាំ២០២៥-- នៅសាលប្រជុំបញ្ជាការដ្ឋានតំបន់ប្រតិបត្តិការសឹករងតាកែវ បានរៀបចំប្រារព្ធពិធីអបអរសាទរខួបលើកទី១៨ ទិវាអតីតយុទ្ធជនកម្ពុជា ២១ ខែមិថុនា ឆ្នាំ២០០៧-២១ ខែមិថុនា ឆ្នាំ២០២៥ ក្រោមអធិបតីភាពឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានកិត្តិយសគណៈកម្មាធិការសមាគមអតីតយុទ្ធជនកម្ពុជាខេត្តតាកែវ ដោយមានការចូលរួមពីអភិបាលរងខេត្តតាកែវ ប្រធានអនុប្រធានមន្ទីរអង្គភាពជុំវិញខេត្ត អភិបាលអភិបាលក្រុង-ស្រុក មន្ត្រីរាជការ កងកម្លាំងប្រដាប់អាវុធ និងអតីតយុទ្ធជនចំនួន៣០០នាក់ 

មានប្រសាសន៍សំណេះសំណាលក្នុងពិធីនោះ ឯកឧត្តម វ៉ី សំណាង បានថ្លែងថា នៅពេលប្រទេសជាតិមានសុខសន្តិភាព មានការអភិវឌ្ឍលើគ្រប់វិស័យ យើងទាំងអស់គ្នាតែងតែរំលឹកដល់គុណនិងវីរភាពដ៏អង់អាចក្លាហាន របស់បងប្អូនអតីតយុទ្ធជនយុទ្ធនារីទាំងអស់ ដែលបានបូជាសាច់ស្រស់ឈាមស្រស់ ប្រឈមមុខនឹងគ្រោះថ្នាក់គ្រប់កាលៈទេសៈ ដើម្បីសង្គ្រោះប្រទេសជាតិ អោយមានការអភិវឌ្ឍ មានសន្តិភាព ដូចសព្វថ្ងៃនេះ។ ទិវាអតីតយុទ្ធជនកម្ពុជា ២១មិថុនា គឺជាទិវាប្រវត្តិសាស្ត្រប្រកបដោយមោទនភាព ចំពោះបងប្អូនអតីតយុទ្ធជននិងប្រជាពលរដ្ឋនៅទូទាំងប្រទេស។ ទិវានេះប្រារព្ធឡើងដើម្បីរំលឹកដល់គំរូវីរភាពដ៏មោះមុត និងគុណបំណាច់ដ៏ធំធេង របស់វីរយុទ្ធជន វីរយុទ្ធនារីនៃកងកម្លាំងប្រដាប់អាវុធ ដែលបានធ្វើពលិកម្មបូជាសាច់ស្រស់ឈាមស្រស់នៅសមរភូមិ ក្នុងបុព្វហេតុរំដោះជាតិមាតុភូមិពីរបបប្រល័យពូជសាសន៍ ប៉ុល ពត ប្រកបដោយស្មារតីស្នេហាជាតិ នៅគ្រប់ដំណាក់កាលនៃប្រវត្តិសាស្ត្រ ជាពិសេសបានរួមចំណែកយ៉ាងសំខាន់ក្នុងកិច្ចការពារបូរណភាពទឹកដី ការកសាងសុខសន្តិភាព និងស្ថិរភាពសង្គម។ ដើម្បីប្រទេសជាតិរបស់យើង សំដៅធានាការអភិវឌ្ឍសេដ្ឋកិច្ច និងសង្គម ជាឧត្តមប្រយោជន៍ជូនជាតិមាតុភូមិឱ្យរស់ឡើងវិញ និងរីកចម្រើនរហូតមកដល់បច្ចុប្បន្ន។

ទន្ទឹមនឹងនេះ ឯកឧត្តមអភិបាលខេត្តបានមានប្រសាសន៍បន្ថែមថា ដើម្បីតបស្នងសងគុណដល់បងប្អូនអតីតយុទ្ធជន រាជរដ្ឋាភិបាលកម្ពុជា នីតិកាលទី៧ បានផ្តោតការយកចិត្តទុកដាក់ខ្ពស់ក្នុងការលើកកម្ពស់ជីវភាពអតីតយុទ្ធជនដែលជានិវត្តជន ជនបាត់បង់សមត្ថភាពការងារ និងជនមានពិការភាព។ តាមរយៈចំណុចអាទិភាពសំខាន់ៗមួយចំនួន គឺសំដៅដល់ការគិតគូរចំពោះអតីតយុទ្ធជន ដែលមានគុណបំណាច់ចំពោះជាតិមាតុភូមិ រួមមាន ការកសាងតំបន់ ប្រវត្តិសាស្ត្រយោធា វិមានរំលឹកគុណនិងស្តូបអនុស្សាវរីយ៍នយោបាយឈ្នះ-ឈ្នះ នៅតាមទីតាំងប្រវត្តិសាស្ត្រនានាជាដើម។ដើម្បីជានិមិត្តរូបជាវត្ថុតាង និងសមិទ្ធផលនានា សម្រាប់ជាថ្នាលបណ្តុះមនសិការ កតញ្ញូ សុខដុម ការចូលរួម និងជាមេរៀនសម្រាប់អ្នកជំនាន់ក្រោយចងចាំ រៀនសូត្រ គោរពដឹងគុណអំពីស្ថាបនិកមគ្គុទេសក៍ឯកនិងប្រតិបត្តិករនយោបាយឈ្នះ-ឈ្នះ របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា។

តាមរបាយការណ៍របស់លោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹករងតាកែវ និងជាប្រធានគណៈកម្មាធិការសមាគមអតីតយុទ្ធជនកម្ពុជាខេត្តតាកែវ បានឱ្យដឹងថា នៅទូទាំងខេត្តតាកែវ មានអតីតយុទ្ធជនកម្ពុជាសរុបចំនួន ៥១២៩នាក់ ក្នុងនោះបានចូលជាសមាជិកសមាគមអតីតយុទ្ធជនកម្ពុជា(ស-អ-ក)ចំនួន៤១១១នាក់ រួមមានជនពិការចំនួន១២៩៤នាក់ និវត្តជនចំនួន១៧៩១នាក់ ជនបាត់បង់សមត្ថភាពការងារចំនួន៥៩នាក់ គ្រួសារពលីចំនួន៩០០គ្រួសារ និងគ្រួសារមរណៈចំនួន៦៧គ្រួសារ។ ដោយមានការយកចិត្តទុកដាក់ខ្ពស់ពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុនី ហ៊ុនម៉ាណែត បានធ្វើការសាងសង់ផ្ទះជូនអតីតយុទ្ធជនក្នុងខេត្តតាកែវបានចំនួន៦៩ខ្នង។បានជួយដល់អតីតយុទ្ធជនកម្ពុជាទាំងអស់ ពេលជួបការលំបាក ជួបគ្រោះថ្នាក់ផ្សេងៗ ទទួលមរណភាព ដោយមិនប្រកាន់ប្រភពដើម សាសនា និន្នាការនយោបាយ និងឋានៈសង្គមឡើយ។

ក្នុងឱកាសនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បាននាំយកអំណោយចែកជូនបងប្អូនអតីតយុទ្ធទាំង៣០០នាក់ ដោយម្នាក់ៗទទួលបាន អង្ករ២៥គីឡូក្រាម ទឹកស៊ីអ៊ីវ១យួរ ទឹកត្រី១យួរ និងថវិកាមួយចំនួនផងដែរ៕

ដោយ អ៊ុច សៀង