AKP ភ្នំពេញ ថ្ងៃទី២៤ ខែមិថុនា ឆ្នាំ២០២៥--កីឡាករ-កីឡាការិនីជម្រើសជាតិយូដូ ៤ នាក់ ដឹកនាំដោយគ្រូបង្វឹកម្នាក់នឹងត្រូវចូលរួមប្រកួតកីឡាសាកលវិទ្យាល័យ រដូវក្ដៅពិភពលោក លើកទី៣២ ឆ្នាំ២០២៥ ពីថ្ងៃទី១៦-២៧ ខែកក្កដា ឆ្នាំ២០២៥ នៅទីក្រុង Rhine-Ruhr ប្រទេសអាល្លឺម៉ង់។

លោក ម៉ារ វង្សវិបុល គ្រូបង្វឹកជម្រើសជាតិយូដូកម្ពុជាបានគូសបញ្ជាក់ថា ការប្រកួតកីឡាសាកលវិទ្យាល័យរដូវក្ដៅពិភពលោក លើកទី៣២ ឆ្នាំ២០២៥ ប្រទេសអាល្លឺម៉ង់ គឺប្រភេទកីឡាយូដូកម្ពុជាទទួលបានការអនុញាតពីក្រសួងអប់រំ យុវជន និងកីឡា ដោយសហព័ន្ធមានកីឡាករ ២នាក់ និងកីឡាការិនី ២នាក់ ដឹកនាំដោយគ្រូបង្វឹកម្នាក់ គឺរូបលោកនឹងចូលរួមប្រកួតប្រជែងក្នុងព្រឹត្តិការណ៍។ លោកបន្ថែមថា កីឡាករ-កីឡាការិនីទាំង៤នាក់ ដែលគ្រោងនឹងបញ្ជូនទៅចូលរួមប្រកួតនេះត្រូវបានសម្រិតសម្រាំងជាអត្តពលិកឆ្នើមៗប្រចាំសហព័ន្ធ ដោយត្រូវបានប្រមូលផ្តុំហ្វឹកហាត់យ៉ាងសកម្មអស់រយៈពេល ៥ខែមកហើយ បន្ទាប់ពីទទួលដំណឹងពីក្រសួងអប់រំ  យុវជន និងកីឡា។ 

លោក ម៉ារ វង្សវិបុល បន្ថែមថា ការប្រកួតកីឡាសាកលវិទ្យាល័យរដូវក្ដៅពិភពលោក ឆ្នាំ២០២៥ នេះពិតជា សំខាន់ណាស់សម្រាប់ប្រភេទកីឡាយូដូកម្ពុជា ក្នុងការវាស់ស្ទង់ និងបង្កើនគុណភាពបច្ចេកទេសរបស់កីឡាករ កីឡាការិនីកម្ពុជា ក្នុងការត្រៀមខ្លួនឆ្ពោះទៅចូលរួមប្រកួតកីឡា ស៊ីហ្គេម លើកទី៣៣ នៅប្រទេសថៃ ដែលគ្រោងនឹងរៀបចំពីថ្ងៃទី៩-២០ ខែធ្នូ ឆ្នាំ២០២៥។

គួរបញ្ជាក់ថា ការប្រកួតកីឡាសាកលវិទ្យាល័យរដូវក្តៅពិភពលោក លើកទី៣២ ឆ្នាំ២០២៥ ដែលត្រូវបានរៀបចំឡើងរៀងរាល់៤ឆ្នាំម្តង ដូចព្រឹត្តិការណ៍កីឡាអូឡាំពិកហ្គេមដែរនោះ គ្រោងនឹងធ្វើឡើងពីថ្ងៃទី១៦-២៧ ខែកក្កដា ឆ្នាំ២០២៥ នៅទីក្រុង Rhine-Ruhr ប្រទេសអាល្លឺម៉ង់ ដែលមានជាង១០០ប្រទេសចូលរួមមកពីជុំវិញពិភពលោក ខណៈកម្ពុជាត្រៀមបញ្ជូនប្រតិភូកីឡា ៣៤រូបលើ៦ប្រភេទកីឡា ដូចជា គុនដាវ អត្តពលកម្ម ហែលទឹក យូដូ វាយសី និងតេក្វាន់ដូ WT។ ប្រតិភូកីឡាកម្ពុជានឹងដឹកនាំដោយឯកឧត្តម កែ ប៊ុនខៀង រដ្ឋលេខាធិការ ក្រសួងអប់រំ យុវជន និងកីឡា ទទួលបន្ទុកជាប្រធានប្រតិភូ ឯកឧត្តម ប៉ុន សុខ អគ្គនាយកនៃអគ្គនាយកដ្ឋានកីឡាទទួលបន្ទុកអនុប្រធានប្រតិភូ និងឯកឧត្តម ព្រំ ប៊ុណ្ណយី ទីប្រឹក្សាក្រសួងក្រសួងអប់រំ ទទួលបន្ទូក នាយបេសកកម្ម អមដោយមន្ត្រីអប់រំជាច្រើនរូបទៀត៕

ដោយ ហេង ណាលីន