AKP សៀមរាប ថ្ងៃទី២៣ ខែមិថុនា ឆ្នាំ២០២៥--
សម្ដចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជាបានបង្ហាញសង្ឃឹមថា ការបិទ ការបើកដោយឯកតោភាគីរបស់ថៃ គួរគិតគូរពីអត្ថប្រយោជន៍របស់ប្រជាពលរដ្ឋ ជាពិសេសអ្នកលក់ដូរនៅតាមព្រំដែន អ្នកធ្វើពាណិជ្ជកម្មនៅតាមព្រំដែន ហើយនៅពេលដែលភាគីថៃសម្រេចបើកពេលណា កម្ពុជានឹងបើកវិញ ៥ម៉ោងតាមក្រោយ។ ការលើកឡើងរបស់សម្ដេចធិបតីនាយករដ្ឋមន្រ្ដីបែបនេះ ក្នុងបិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា នាព្រឹកថ្ងៃទី២៣ ខែមិថុនា ឆ្នាំ២០២៥ នៅខេត្តសៀមរាប។
សម្ដេចធិបតី ហ៊ុន ម៉ាណែត បានថ្លែងថា ការបើកព្រំដែននេះ សម្ដេចក៏ពិបាកនិយាយ និងមិនដឹងថា តើជាគោលនយោបាយរបស់រាជរដ្ឋាភិបាលថៃ ឬយ៉ាងណា ព្រោះរាជរដ្ឋាភិបាលថៃតែងតែចង់សុំហើយសុំទៀត ចរចាទ្វេភាគីដើម្បីបើកព្រំដែន។ សម្ដេចធិបតីនាយករដ្ឋមន្រ្ដីបានបញ្ជាក់ថា៖ «អ្នកឯងបិទជាឯកតោភាគី បើចង់បើកវិញ ថៃបើកឯកតោភាគីទៅ ហើយយើងនឹងបើកវិញ៥ម៉ោងក្រោយ តែប៉ុណ្ណឹង។ ប៉ុន្ដែវាពិបាក ខ្ញុំមិនយល់ថា  រាជរដ្ឋាភិបាលថៃសូម្បីតែនៅក្នុងការដឹកនាំ ថ្ងៃទី១៥ នាយករដ្ឋមន្រ្ដីថៃ ចុចទូរស័ព្ទមកខ្ញុំ សុំធ្វើម៉េចយើងចរចាគ្នា បើកទ្វេភាគីទៅច្រកព្រំដែនទ្វេភាគីឡើងវិញទៅ ដើម្បីកុំឱ្យប៉ះពាល់ដល់ប្រជាជន»។

សម្ដេចធិបតីបានបន្ដថា កម្ពុជាក៏មិនចង់បិទដែរ ប៉ុន្ដែពេលដែលថៃបិទ មិនបានពិគ្រោះយោបល់ជាមួយកម្ពុជាទេ ហើយបើកក៏មិនចាំបាច់ពិគ្រោះយោបល់ទេ ខណៈកម្ពុជាសម្បទានណាស់ បើអ្នកឯងបើក កម្ពុជានឹងបើកវិញ៥ម៉ោងក្រោយយ៉ាងយូរ។ សម្ដេចធិបតីបានបន្ថែមថា៖ «ត្រង់នេះគឺជាសម្បទានហើយ ព្រោះកម្ពុជាមានសិទ្ធិបិទជាអចិន្រ្ដៃយ៍ទោះអ្នកឯងធ្វើម៉េចក៏មិនបានដែរ តែយើងធ្វើសម្បទានដល់ប៉ុណ្ណឹង។ អ្នកឯងបិទដោយមិនពិគ្រោះយោបល់ជាមួយយើងទះកំភ្លៀងប៉ាំងហើយ បន្ទាប់មកសុំអង្គុយចរចាគ្នាយកស្មើគ្នា។ ខ្ញុំសង្ឃឹមថា ការបិទ ការបើកដោយឯកតោភាគីរបស់ថៃនេះ គួរគិតគូរពីអត្ថប្រយោជន៍របស់ប្រជាពលរដ្ឋ ជាពិសេសអ្នកលក់ដូរនៅតាមព្រំដែន អ្នកធ្វើពាណិជ្ជកម្មនៅតាមព្រំដែន។ អីចឹងបើនៅក្នុងដៃរបស់កងទ័ពថៃហើយ ខ្ញុំបានឱ្យបាល់ទៅអ្នកឯងស៊ុតហើយ  ឱ្យតែអ្នកឯងសម្រេចបើកពេលណាយើងតាម ៥ម៉ោងតាមក្រោយពេលហ្នឹង ដើម្បីយើងឆ្លើយតបដោះស្រាយបញ្ហា ហើយកុំមកចោទកម្ពុជា។» 
ជាមួយគ្នានេះ សម្ដេចធិបតី ហ៊ុន ម៉ាណែត បានមានប្រសាសន៍ទៀតថា ការបញ្ចូនសារនេះទៅកាន់ប្រជាជនកម្ពុជា និងប្រជាជនថៃ ដែលចង់ឱ្យស្ថានភាពច្រកព្រំដែនបើកទៅដូចដើមវិញ គឺត្រូវឱ្យកងទ័ពថៃបើកទៅបើកជាឯកតោភាគីមុនទៅ កម្ពុជានឹងបើកឡើងវិញ ហើយបញ្ហានឹងដោះស្រាយងាយដូចបកចេក។ «អីចឹងវាអាស្រ័យទៅលើកងទ័ពថៃ អីចឹងពេលដែលរដ្ឋាភិបាលថៃ នាយករដ្ឋមន្រ្ដីតែងតែសុំចរចាបើកច្រកវិញ មេទ័ពថៃនៅខាងក្រោមបិទ បើកៗបន្ដទៀត។ នៅពេលមានម្នាក់មកចង់ចរចាជាមួយយើង ហើយមានម្នាក់ទៀតបន្ដវ៉ៃយើងរហូត បិទ បើកឯកតោភាគីតើឆន្ទៈពិតប្រាកដនៅកន្លែងណា ឱ្យខ្ញុំជឿងទេ និងជឿអ្នកណាឥឡូវ និយាយជាមួយខាងលើខាងក្រោមអត់ស្ដាប់។ អីចឹងឱ្យតែមានឯកភាពផ្ទៃក្នុងទៅ សម្រាប់កម្ពុជា ខ្ញុំមិនចង់ដឹងផ្ទៃក្នុងអ្នកឯងឯកភាព ឬមិនឯកភាពនោះទេ ខ្ញុំចង់ដឹងជាក់ស្ដែងនៅលើដី នៅពេលណាដែលប៉ារ៉ាស់ហ្នឹងបើកដូចដើមវិញ មិនថា រដ្ឋាភិបាលបើក ឬក៏យោធាបើក អ្នកណាក៏ដោយឱ្យតែមានអំណាចពិតប្រាកដនៅថៃធ្វើការបើកពិតប្រាកដទៅ កម្ពុជានឹងបើកវិញ អ្វីៗនឹងទៅដូចដើមវិញ»។ នេះគឺជាការលើកឡើងបន្ថែមរបស់សម្ដេចធិបតីនាយករដ្ឋមន្រ្ដី។
សម្ដេចធិបតីនាយករដ្ឋមន្រ្ដីបានណែនាំទៅក្រសួងការពារជាតិថា បើយើងចង់ចរចាកងទ័ព ព្រំដែនបើកសិន ហើយបានចេញគោលការណ៍ច្បាស់ទៅក្រសួងការពារជាតិ ដរាបណាព្រំដែនមិនបើកឡើងវិញទេ គ្មានការជួបជជែកគ្នាជាផ្លូវការ ABC, JBC នោះទេ ខណៈ ABC ដឹកនាំដោយភូមិភាគនិងភូមិភាគរវាងប្រទេសទាំងពីរ និង JBC គឺដឹកនាំដោយរដ្ឋមន្រ្ដីក្រសួងការពារជាតិ។ សម្ដេចធិបតីបានអះអាងថា៖ «អីចឹងដើម្បីចាប់ផ្ដើមការចរចានិយាយគ្នាឡើងវិញ ទី១ ត្រូវរៀបចំបុរេលក្ខខណ្ឌឱ្យសមស្រប បង្កើតទំនុកចិត្ដគ្នាឡើងវិញព្រោះរឿងព្រំដែនមិនមានទំនុកចិត្ដគ្នាផងហ្នឹង ទៅនិយាយរឿងទាហានយ៉ាងម៉េច ហើយត្រូវបញ្ជាក់ពីឆន្ទៈទាំងសងខាងដោយមិនចាំបាច់ចរចា ដោយបើកឱ្យប្រជាជនធ្វើដំណើរធម្មតាចាប់ពីម៉ោង៦៖០០នាទីព្រឹក រហូតបិទនៅម៉ោង១០យប់ ដូចដើមវិញ។ ប៉ុន្ដែខ្ញុំសូមបញ្ជាក់ថា អត់មានការចរចារទ្វេភាគីទេរឿងបើកនេះ អ្នកឯងបិទមុន បើកមុនចុះខ្ញុំឱ្យសិទ្ធិ យើងចាំបើក៥ម៉ោងក្រោយ ព្រោះយើងចង់បានភាពល្អជូនប្រជាពលរដ្ឋយើងឡើងវិញនោះទេ។ រឿងទាហានដូចគ្នា ជួបចរចាអត់មានរឿងអ្វីត្រូវជជែកនោះទេ បើអ្នកឯងចង់ដកៗទៅ រឿងលក្ខខណ្ឌនៅខាងមុខ យើងគ្មានត្រៀមវ៉ៃអ្នកណានោះទេ ប៉ុន្ដែកុំមករករឿងយើង កុំមកបង្កើតបញ្ហា»៕

ដោយ៖ រិទ្ធី