AKP ភ្នំពេញ ថ្ងៃទី២៣ ខែមិថុនា ឆ្នាំ២០២៥--

ឯកឧត្តម យុន ឈុន្នី រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្ដមអភិសន្ដិបណ្ឌិត ស សុខា ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ នាព្រឹកថ្ងៃទី២៣ ខែមិថុនា ឆ្នាំ២០២៥ បានអញ្ជើញចុះជួបសំណេះសំណាលជាមួយកងកម្លាំងនគរបាលខេត្ដកំពង់ស្ពឺ ព្រមទាំងត្រួតពិនិត្យយុទ្ធោបករណ៍ កន្លែងរក្សាទុកអាវុធ កន្លែងស្នាក់នៅរបស់កងកម្លាំងអន្ដរាគមន៍ និងពិនិត្យជាក់ស្ដែងលើកម្លាំងកងអនុសេនាតូច កម្លាំងគាំទ្រអន្ដរាគមន៍ មធ្យោបាយបម្រើឱ្យកិច្ចការអន្ដរាគមន៍ ប្រយុទ្ធសង្រ្គោះ ដោយមានការចូលរួមពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ ស្នងការរង នាយការិយាល័យ ទាំង៣១ អធិការនគរបាល ក្រុង ស្រុកទាំង៩ ព្រមទាំងកងកម្លាំងអនុសេនាតូចគាំទ្រ កម្លាំងអន្ដរាគមន៍គាំទ្ររបស់ស្នងការដ្ឋានខេត្ដកំពង់ស្ពឺ សរុបប្រមាណជាង៥០០នាក់។

ក្នុងឱកាសនោះ ឯកឧត្តម យុន ឈុន្នី ក្នុងនាមឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានកោតសរសើរដល់កងកម្លាំងនៃស្នងការដ្ឋាននគរបាលខេត្ដកំពង់ស្ពឺ ដែលបានខិតខំប្រឹងប្រែងយកចិត្តទុកដាក់ក្នុងការរៀបចំហ្វឹកហាត់ និងត្រៀមកងកម្លាំងក្នុងការជួយថែរក្សាសន្តិសុខ សុវត្ថិភាព សណ្ដាប់ធ្នាប់ និងបម្រើកិច្ចការងារជូនដល់សង្គមជាតិ ក៏ដូចជាបងប្អូនប្រជាពលរដ្ឋនៅក្នុងខេត្តកំពង់ស្ពឺ។ 

ទន្ទឹមនឹងនេះ ឯកឧត្តមបានណែនាំដល់កងកម្លាំងទាំងអស់ត្រូវផ្ដោតលើការពង្រឹងស្មារតីទំនួលខុសត្រូវ ការបង្ការ និងទប់ស្កាត់រាល់បទល្មើសគ្រប់ប្រភេទ ពង្រឹងការអនុវត្តការងារសន្តិសុខ សណ្ដាប់ធ្នាប់សាធារណៈ ត្រូវបន្តហ្វឹកហាត់ជាប្រចាំដើម្បីបង្កើនសមត្ថភាព និងត្រូវសហការគ្នាឱ្យកាន់តែល្អក្នុងកិច្ចការការពារសន្តិសុខ សុវត្ថិភាពជូនប្រជាពលរដ្ឋ ស្របតាមទិសដៅរបស់រាជរដ្ឋាភិបាល ក៏ដូចទិសដៅយុទ្ធសាស្រ្តរបស់ថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិ៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)