AKP សៀមរាប ថ្ងៃទី២៣ ខែមិថុនា ឆ្នាំ២០២៥–សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានកិត្តិយសសហភាពសហព័ន្ធយុវជនកម្ពុជាមានប្រសាសន៍ថា ពិតណាស់ចលនាយុវជនដែលរស់នៅក្នុងស្មារតីបម្រើបុព្វហេតុជាតិ មាតុភូមិ គឺមានតាំងពីយុវជនជំនាន់មុន រហូតដល់យុវជនជំនាន់បច្ចុប្បន្ន ដោយមិនបានកាត់ផ្តាច់ពីសង្គមយើងនោះទេ ទាំងក្នុងដំណាក់កាលសង្គ្រាម ក្នុងដំណើរការនៃការកសាងសង្គមជាតិរហូត ដល់បច្ចុប្បន្ននេះ ជាពិសេសនៅក្នុងដំណាក់កាលចុងក្រោយនេះយុវជនយើងបានរួបរួមគ្នាជាធ្លុងមួយ ពួតដៃពួនជ្រុំកសាងសហគមន៍សហស្សសម័យកម្ពុជា ដោយឈរលើអភិក្រមស្ម័គ្រចិត្ត និងបានបន្តស្មារតីនៃការឯកភាពជាតិ សាមគ្គីភាព និងបំប្លែងកម្លាំងស្ម័គ្រចិត្តទៅជាចលនាជាតិក្នុងស្មារតីខ្មែរតែមួយ ដើម្បីចូលរួមជាមួយរាជរដ្ឋាភិបាលជាបន្តបន្ទាប់ ធ្វើឱ្យកម្ពុជាបានចាកចេញពីឋានៈជាប្រទេសដែលមានការអភិវឌ្ឍតិចតួច មកជាប្រទេសមានចំណូលមធ្យម មានសុខសន្តិភាព ស្ថេរភាពនយោបាយ សុខុមាលភាពសង្គម និងមានកំណើនសេដ្ឋកិច្ចប្រកបដោយចីរភាព និងបរិយាបន្ន។ ការលើកឡើងរបស់សម្តេចធិបតី នាយករដ្ឋមន្ត្រី នៃកម្ពុជាដូចនេះ ក្នុងពិធីបិទកិច្ចប្រជុំគណៈកម្មាធិការកណ្ដាលសហភាពសហព័ន្ធយុវជនកម្ពុជារយៈពេល៤ថ្ងៃ នៅសណ្ឋាគារសុខាសៀមរាប នាព្រឹកថ្ងៃទី២៣ ខែមិថុនា ឆ្នាំ២០២៥។

ក្នុងឱកាសនេះសម្តេចនាយករដ្ឋមន្ត្រីបានសម្តែងនូវកត្តញូដ៏ជ្រាលជ្រៅបំផុតចំពោះអតីតយុវជនកម្ពុជា ដែលបានស្ម័គ្រចិត្តតស៊ូលះបង់សាច់ស្រស់ ឈាមស្រស់ ដោយបានចាប់ផ្តើមចលនាតស៊ូរំដោះជាតិនៅ ថ្ងៃទី០២ ខែធ្នូ ឆ្នាំ១៩៧៨ ដើម្បីសង្គ្រោះប្រទេសកម្ពុជាឱ្យរួចផុតពីជ្រោះមរណៈ ពីក្រញាំដៃ ប៉ុល ពត និង បានបន្តការពារ ស្តារកសាង អភិវឌ្ឍន៍ប្រទេសឱ្យមានការរីកចម្រើនលើគ្រប់វិស័យ ដោយសម្តេចធបិតី នាយករដ្ឋមន្ត្រីបានគូសបញ្ជាក់ថា គំរូវីរភាព ស្មារតី និងឆន្ទៈនេះ គឺជាគុណតម្លៃដ៏វិសេសវិសាល ដែលបានបន្តមកដល់បច្ចុប្បន្ននេះ។

សម្ដេចមហាបវរធិបតី ហ៊ុន ម៉ាណែត មានប្រសាន៍ថា កាលពីថ្ងៃទី២៨ ខែឧសភា ឆ្នាំ២០២៥ កន្លងទៅមរណភាពរបស់យើង ព្រិន្ទបាលឯក សួន រោន នៅក្នុងកិច្ចការពារព្រំដែន និងបូរណភាពទឹកដី គឺពិតជាបានបង្ហាញនូវគំរូវីរភាព និងពលិកម្មដ៏ថ្លៃថ្លារបស់យុវជនក្នុងបុព្វហេតុជាតិ និងប្រជាជន។ ក្នុងនាមរាជរដ្ឋាភិបាលជាថ្មីម្តងទៀត សម្តេចធិបតី នាយករដ្ឋមន្ត្រី សូមចូលរួមរំលែកទុក្ខយ៉ាងក្រៀមក្រំបំផុតជូនចំពោះក្រុមគ្រួសារសពលោក សួន រោន ដែលបានទទួលមរណភាពដោយសារការបាញ់ប្រហារដោយរំលោភបំពានពីសំណាក់ទាហានថៃមកលើទីតាំងឈរជើងរបស់កម្ពុជានៅក្នុងដែនអធិបតេយ្យភាពរបស់ខ្លួននៅព្រំដែន កម្ពុជា-ថៃ តំបន់មុំបី ដែលក្នុងន័យនេះសម្តេចប្រមុខរាជរដ្ឋាភិបាលក៏សូមយកឱកាសនេះដើម្បីធ្វើការថ្លែងអំណរគុណ កោតសរសើរ និងវាយតម្លៃខ្ពស់ចំពោះស្មារតីអង់អាចក្លាហានរបស់កងកម្លាំងប្រដាប់អាវុធរបស់យើង ទាំងកងទ័ព ទាំងកងនគរបាលជាតិ ដែលកំពុងឈរជើងក្នុងការការពារបូរណភាពទឹកដី ជាពិសេសនៅតាមបណ្តោយព្រំដែន  កម្ពុជា-ថៃ ដែលកំពុងមានបញ្ហាប្រឈមដាក់គ្នានោះ៕

ដោយ៖ ចាន់ សុភឿន