AKP ភ្នំពេញ ថ្ងៃទី២៣ ខែមិថុនា ឆ្នាំ២០២៥-- ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ កាលពីថ្ងៃទី២២ ខែមិថុនា ឆ្នាំ២០២៥ អញ្ជើញដឹកនាំក្រុមការងារចុះទៅពិនិត្យស្ថានភាព និងសក្ដានុពលភូមិ ដែលក្រសួងអភិវឌ្ឍន៍ជនបទ គ្រោងធ្វើការអភិវឌ្ឍជាភូមិគំរូគន្លឹះចំនួន២ភូមិ ស្ថិតនៅក្នុងស្រុកអង្គរធំ និងស្រុកពួក ខេត្តសៀមរាប ក្នុងនោះ៖ ទី១. ភូមិកណ្តោលស្ថិតនៅក្នុងឃុំស្វាយចេក ស្រុកអង្គរធំ ដែលមានប្រជាជនសរុបចំនួន ១ ៧៨២នាក់ ស្មើនឹង ៣៧២គ្រួសារ។ ក្នុងភូមិនេះ ប្រជាពលរដ្ឋភាគច្រើនមានជំនាញត្បាញកំប្លោក រំពាក់ ស្លឹកត្នោត សម្រាប់លក់ចេញក្នុង និងក្រៅខេត្ត។ ភូមិក៏មានហេដ្ឋារចនាសម្ព័ន្ធសំខាន់ៗរួមមាន មត្តេយ្យសហគមន៍ សាលាបឋសិក្សា និងអនុវិទ្យាល័យ មណ្ឌលសុខភាព មានសហគមន៍កសិកម្ម និងមានដីស្រះសហគមន៍។ ទី២. ភូមិត្រពាំងធំ ស្ថិតនៅក្នុងឃុំរើល ស្រុកពួក  ដែលមានប្រជាជនសរុបចំនួន១ ៤២១នាក់ ស្មើនឹង២៧៤គ្រួសារ។ ក្នុងភូមិនេះ ប្រជាពលរដ្ឋភាគច្រើនប្រកបរបរត្បាញរំពាក់ រំចេក ឫស្សី ស្លឹកត្នោត ធ្វើជាកន្ត្រក នាល កញ្ជើ សម្រាប់លក់ក្នុងស្រុក និងក្រៅខេត្ត។ ភូមិក៏មានហេដ្ឋារចនាសម្ព័ន្ធសំខាន់ៗរួមមាន៖មជ្ឈមណ្ឌលបណ្តុះបណ្តាលតម្បាញក្នុងសហគមន៍ សាលាបុណ្យក្នុងភូមិ ដីសហគមន៍ ផ្លូវកៅស៊ូពីរជាន់ឆ្លងកាត់ភូមិ ព្រមទាំងមានសេវាទឹកស្អាត អនាម័យជាមូលដ្ឋានគ្រប់គ្រាន់។

ឯកឧត្ដមបានជួបជាមួយអាជ្ញាធរមូលដ្ឋាន និងប្រជាពលរដ្ឋក្នុងសហគមន៍ ដើម្បីស្វែងយល់អំពីតម្រូវការនានាសម្រាប់ការអភិវឌ្ឍនៅក្នុងមូលដ្ឋានរបស់គាត់ និងមានប្រសាសន៍សួរសុខទុក្ខ ប្រកបដោយក្ដីនឹករលឹក និងបានជម្រាបជូនអំពីបេសកកម្មរបស់ក្រសួងអភិវឌ្ឍន៍ជនបទ ក្នុងការអភិវឌ្ឍតំបន់ជនបទឱ្យមានការរីកចម្រើន កាត់បន្ថយភាពក្រីក្រ ក្នុងនោះក៏មានការអភិវឌ្ឍភូមិគំរូគន្លឹះ រួមទាំងសហគមន៍ជនជាតិដើមភាគតិចផងដែរ។      សំណេះសំណាលរួច ឯកឧត្តមរដ្ឋមន្ដ្រី និងក្រុមការងារបានអញ្ជើញទៅពិនិត្យស្ថានភាពជីវភាពរស់នៅរបស់ប្រជាពលរដ្ឋតាមខ្នងផ្ទះ និងសមិទ្ធផលនានានៅក្នុងសហគមន៍។

ក្នុងឱកាសជួបសំណេះសំណាលជាមួយអាជ្ញាធរមូលដ្ឋាន និងប្រជាពលរដ្ឋ ឯកឧត្តមរដ្ឋមន្ដ្រី បានផ្ដល់សម្ភារសម្រាប់ប្រើប្រាស់ក្នុងទីស្នាក់ការគណៈកម្មការអភិវឌ្ឍន៍ភូមទាំងពីរ ដោយភូមិនីមួយៗទទួលបាន តុវែង១ កៅអីចំនួន១២ កុំព្យូទ័រ១គ្រឿង និងថវិកា ២លានរៀលផងដែរ។

បន្ទាប់មកក្រុមការងារបានអញ្ជើញទៅពិនិត្យការដ្ឋានសាងសង់ផ្លូវកា្រលកៅស៊ូពីរជាន់ (DBST) ចំនួន ៣ខ្សែ៖ ខ្សែទី១.  ខ្សែផ្លូវ (ស្វាយចេក-ជប់តាត្រាវ) ជាការដ្ឋានសាងសង់ផ្លូវប្រវែង ១៧,៣០គីឡូម៉ែត្រ ទទឹង៧ម៉ែត្រ និងមានសំណង់សិល្បការ្យមួយចំនួន ក្នុងនោះមានសំណង់លូប្រអប់មុខបី ចំនួន ១កន្លែង ត្រូវបានសាងសង់ដើម្បីវាងស្ពានបុរាណមួយកន្លែង ដោយសារសំណង់បុរាណនោះជាសម្បត្តិបេតិកភណ្ឌរបស់អាជ្ញាធរជាតិអប្សរា និងអង្គការយូណេស្កូ។ ខ្សែផ្លូវនេះបានចាប់ផ្ដើមសាងសង់នៅថ្ងៃទី០៥ ខែកុម្ភៈ ឆ្នាំ២០២៤ គ្រោងនឹងបញ្ចប់នៅក្នុងខែសីហា ឆ្នាំ២០២៥ បច្ចុប្បន្នសម្រេចវឌ្ឍនភាពប្រមាណ ៩៧,៦៥%។ ផ្លូវនេះតភ្ជាប់ពីភូមិគោព្រះថ្មី ឃុំស្វាយចេក ឆ្លងកាត់ឃុំរើល ទៅកាន់ភូមិប្រាសាទ ឃុំជប់តាត្រាវ ស្រុកអង្គរធំ ដែលមានអ្នកទទួលផលដោយផ្ទាល់ ចំនួន ៨ ៥២៦គ្រួសារ និងប្រយោល ចំនួន ២៩ ៩៨៤គ្រួសារ។ ខ្សែទី២.  ខ្សែផ្លូវ (តាត្រាវ - រើល) ជាការដ្ឋានសាងសង់ផ្លូវប្រវែង ១០គីឡូម៉ែត្រ ទទឹង៧ម៉ែត្រ និងមានសំណង់សិល្បការ្យមួយចំនួន បានចាប់ផ្ដើមសាងសង់នៅថ្ងៃទី០៥ ខែកុម្ភៈ ឆ្នាំ២០២៤ គ្រោងនឹងបញ្ចប់នៅក្នុងខែសីហា ឆ្នាំ២០២៥ បច្ចុប្បន្នសម្រេចវឌ្ឍនភាពប្រមាណ ៩៧,៦៥%។ ខ្សែផ្លូវនេះ តភ្ជាប់ពីភូមិតាត្រាវ ឃុំស្វាយចេក ស្រុកអង្គរធំ ទៅកាន់ភូមិរើល ឃុំរើល ស្រុកពួក ដែលមានអ្នកទទួលផលដោយផ្ទាល់ ចំនួន ៩ ៧២៨គ្រួសារ និងប្រយោល ចំនួន ២១ ៣៩១គ្រួសារ។ ខ្សែទី៣.  ខ្សែផ្លូវ (ដូនកែវ - ស្រះ) ជាការដ្ឋានសាងសង់ផ្លូវប្រវែង១២,១០គីឡូម៉ែត្រ ទទឹង៧ម៉ែត្រ និងមានសំណង់សិល្បការ្យមួយចំនួន បានចាប់ផ្ដើមសាងសង់នៅថ្ងៃទី០៥ ខែកុម្ភៈ ឆ្នាំ២០២៤ គ្រោងនឹងបញ្ចប់នៅក្នុងខែសីហា ឆ្នាំ២០២៥ បច្ចុប្បន្នសម្រេចវឌ្ឍនភាពប្រមាណ ៩៣,៣០%។ ខ្សែផ្លូវនេះ តភ្ជាប់ពីភូមិដូនកែវ ឃុំដូនកែវ ទៅកាន់ភូមិស្រះ ឃុំរើល ស្រុកពួក ដែលមានអ្នកទទួលផលដោយផ្ទាល់ ចំនួន ១៣ ៩៤៩គ្រួសារ និងប្រយោល ចំនួន  ១៧ ១៧០គ្រួសារ។

ផ្លូវទាំង៣ខ្សែនេះស្ថិតក្នុងក្របខ័ណ្ឌកម្មវិធីអភិវឌ្ឍន៍ហេដ្ឋារចនាសម្ព័ន្ធជនបទ សម្រាប់កម្ពុជា RID4CAMដែលអនុវត្តដោយក្រសួងអភិវឌ្ឍន៍ជនបទ ដែលប្រើប្រាស់ថវិកាបដិភាគរបស់រាជរដ្ឋាភិបាលកម្ពុជា និងហិរញ្ញប្បទានសហប្រតិបត្តិការពីធនាគារ KfW, ទីភ្នាក់ងារបារាំងសម្រាប់ការអភិវឌ្ឍ (AFD) និងសហភាពអឺរ៉ុប (EU/AIF)។ ខ្សែផ្លូវទាំង៣ខ្សែនេះ បាន និងកំពុងបម្រើផលប្រយោជន៍ដល់ប្រជាពលរដ្ឋដោយផ្ទាល់សរុបចំនួន ២៤ ៤៦១គ្រួសារ និងមានអ្នកទទួលផលប្រយោលចំនួន ៦៨ ៥៤៥គ្រួសារ។ ក្នុងឱកាសចុះពិនិត្យ ឯកឧត្តមរដ្ឋមន្ដ្រី បានណែនាំដល់ទីប្រឹក្សាបច្ចេកទេស និងក្រុមហ៊ុនទទួលការសាងសង់ប្រចាំការនៅការដ្ឋានផ្ទាល់ អនុវត្តឱ្យបានត្រឹមត្រូវតាមបទដ្ឋានបច្ចេកទេស និងពន្លឿនការងារសាងសង់ឱ្យលឿន ស្របតាមកិច្ចសន្យាការងារ ដើម្បីបានបម្រើផលប្រយោជន៍ជូនប្រជាពលរដ្ឋក្នុងមូលដ្ឋាននោះ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)