AKP សៀមរាប ថ្ងៃទី២៣ ខែមិថុនា ឆ្នាំ២០២៥-- ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងឯកឧត្តម ប្រាក់ សោភ័ណ អភិបាលខេត្តសៀមរាប កាលពីថ្ងៃទី២២ ខែមិថុនា ឆ្នាំ២០២៥ បានដឹកនាំគណ:ប្រតិភូដាក់កម្រងផ្កា និងគោរពវិញ្ញាណក្ខន្ធសពលោកឧត្តមសេនីយ៍ត្រី គាត ប៊ុនថាន អនុប្រធាននាយកដ្ឋានទទួលបន្ទុកអង្គភាពនគរបាលការពារបេតិកភណ្ឌប្រចាំតំបន់អង្គរ ដែលបានទទួលមរណភាពកាលពីថ្ងៃទី២០ ខែមិថុនា ឆ្នាំ២០២៥ ក្នុងជន្មាយុ ៥១ឆ្នាំ ដោយរោគាពាធ។

ស្ថិតក្នុងវេលាដ៏សោកសង្រេងនោះ ឯកឧត្តម នាយឧត្តមសេនីយ៍ ទៀ សីហា និងឯកឧត្តម ប្រាក់ សោភ័ណ ក្នុងនាមកងយោពលខេមរភូមិន្ទ និងក្រុមប្រឹក្សាខេត្ត គណៈអភិបាលខេត្ត កងកម្លាំងប្រដាប់អាវុធគ្រប់ប្រភេទ មន្ត្រីរាជការ ព្រមទាំងប្រជាពលរដ្ឋទូទាំងខេត្តសៀមរាប បានសម្តែងនូវសមានទុក្ខដ៏ក្តុកក្តួល សោកស្តាយ អាឡោះអាល័យជាទីបំផុត និងចូលរួមរំលែកនូវមរណទុក្ខដ៏សែនក្រៀមក្រំនេះ ជាមួយលោកស្រី ទៀវ ថាវី និងក្រុមគ្រួសារនៃសព ចំពោះការបាត់បង់ លោកឧត្តមសេនីយ៍ត្រី គាត ប៊ុនថាន ថាជាការបាត់បង់ដ៏ធំធេង មិនត្រឹមតែចំពោះក្រុមគ្រួសារប៉ុណ្ណោះទេ តែក៏ជាការបាត់បង់នូវឥស្សរជនខ្មែរម្នាក់ ដែលតែងតែធ្លាប់បានយកចិត្តទុកដាក់ និងលះបង់នូវកាយពល បញ្ញាស្មារតី ក្នុងបុព្វហេតុសកម្មភាពមនុស្សធម៌ សន្តិភាព និងការអភិវឌ្ឍសង្គមជាតិ ពិសេសបានចូលរួមថែរក្សាការពារនូវសម្បត្តិបេតិភណ្ឌដែលជាដួងព្រលឹងរបស់ខ្មែរបានគង់វង្សរហូតមកដល់សព្វថ្ងៃនេះ។

សូមបញ្ជាក់ថា សពលោកឧត្តមសេនីយ៍ត្រី គាត ប៊ុនថាន បានតម្កល់ទុកដើម្បីធ្វើបុណ្យតាមប្រពៃណីទំនៀមទម្លាប់នៅគេហដ្ឋាននៃសព ស្ថិតក្នុងភូមិដកពោធិ៍ សង្កាត់ស្លក្រាម ក្រុងសៀមរាប ខេត្តសៀមរាប។ គណៈប្រតិភូក៏បានប្រគល់នូវលិខិតចូលរួមរំលែកទុក្ខ ក្នុងនាមរដ្ឋបាលខេត្ត និងបច្ច័យមួយចំនួន ដើមី្បចូលរួមក្នុងពិធីបុណ្យសព សម្រាប់គ្រួសារយកទៅប្រើប្រាស់ក្នុងពិធីបុណ្យនេះផងដែរ៕

ដោយ ហង្ស សៀក