AKP ភ្នំពេញ ថ្ងៃទី២២ ខែមិថុនា ឆ្នាំ២០២៥​ --  ក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ បានចុះហត្ថលេខាងលើកិច្ចព្រមព្រៀងដើម្បីធ្វើឱ្យប្រសើរឡើងនូវកិច្ចសហប្រតិបត្តិការក្នុងការចែករំលែកទិន្នន័យផ្នែកឧតុនិយម និងទិន្នន័យផ្នែកកសិកម្ម​ កាលពីព្រឹកថ្ងៃទី២០ ខែមិថុនា​ ឆ្នាំ២០២៥។ កិច្ចសហប្រតិបត្តិការនេះ មានគោលបំណងគាំទ្រដល់កសិករក្នុងការរៀបចំផែនការកសិកម្មកាន់តែមានប្រសិទ្ធិភាពឆ្លើយតបនឹងការប្រែប្រួលអាកាសធាតុ។

តាមរយៈគម្រោង​ «ភាពជាដៃគូរវាងរដ្ឋ សហគមន៍ និងវិស័យឯកជន ដើម្បីកសិកម្មមានលក្ខណៈភាតរបរិស្ថាននិងជីវភាពប្រជាជនមានភាពធន់នៅខាងជើងបឹងទន្លេសាប»(គម្រោង គជ់) ទិន្នន័យពីស្ថាប័នខាងលើ នឹងត្រូវយកទៅប្រើប្រាស់ដើម្បីបង្កើតជាព័ត៌មានណែនាំពាក់ព័ន្ធនឹងកសិឧតុនិយម (ការធ្វើកសិកម្មដោយព្យាករណ៍លើអាកាសធាតុ)។ ព័ត៌មានណែនាំនេះ នឹងផ្តល់ដល់កសិករនូវការព្យាករណ៍អាកាសធាតុជាក់លាក់ និងការណែនាំបច្ចេកទេសកសិកម្មដើម្បីជួយកសិករសម្របខ្លួនជាមួយនឹងលក្ខខណ្ឌអាកាសធាតុដែលប្រែប្រួល។

លោកស្រី រេប៊ែកកា ប៊ែល (Rebekah Bell) តំណាងអង្គការស្បៀង និងកសិកម្មនៃសហប្រជាជាតិ ប្រចាំកម្ពុជា បាននិយាយថា «គម្រោងគជ់ ដែលទទួលបានការគាំទ្រហិរញ្ញវត្ថុពីមូលនិធិអាកាសធាតុបៃតង និងជំនួយបច្ចេកទេសពីអង្គការស្បៀង និងកសិកម្មនៃសហប្រជាជាតិ នឹងជួយដល់កសិករដែលមានទំហំផលិតកម្មតូច នូវចំណេះដឹង និងបច្ចេកវិទ្យាដែលធន់នឹងអាកាសធាតុ និងជួយឱ្យមាននិរន្តរភាពដល់ផលិតផលកសិកម្មនៅលើទីផ្សារ»។

ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងគជ់ បានគូសបញ្ជាក់ពីសារៈសំខាន់នៃកិច្ចព្រមព្រៀងថា  «កិច្ចសហប្រតិបត្តិការនេះ បានបង្ហាញពីភាពរឹងមាំនៃកិច្ចសហការរវាងក្រសួងនិងក្រសួង ដែលធានាដល់និរន្តរភាពនៃការងារលើសពីរយៈពេលនៃគម្រោង។ ប្រសិទ្ធភាពនៃការចែករំលែកទិន្នន័យផ្នែកកសិឧតុនិយម នឹងជួយដល់កសិករដែលមានទំហំផលិតកម្មតូច និងតួអង្គខ្សែច្រវាក់តម្លៃទាំងអស់ ដើម្បីកាត់បន្ថយហានិភ័យដែលបង្កដោយការប្រែប្រួលអាកាសធាតុ ឈានដល់ការចូលរួមចំណែកដល់ដំណើរការអភិវឌ្ឍសេដ្ឋកិច្ចកម្ពុជា។»

ឯកឧត្តមសាស្ត្រាចារ្យបណ្ឌិត អឿង ចន្ថា អនុរដ្ឋលេខាធិការក្រសួងធនធានទឹក និងឧតុនិយម បានគូសបញ្ជាក់ថា «តាមរយៈកិច្ចព្រមព្រៀងចែករំលែកទិន្នន័យនេះ ដៃគូពាក់ព័ន្ធនឹងអាចប្រើប្រាស់ទិន្នន័យតាមតម្រូវការរៀងខ្លួន។ គម្រោងគជ់ នឹងប្រើប្រាស់ទិន្នន័យទាំងនេះ ដើម្បីបង្កើតជាព័ត៌មានប្រឹក្សាពីកសិឧតុនិយម ដែលផ្តល់ប្រយោជន៍ដល់កសិករក្នុងតំបន់គោលដៅរបស់គម្រោង រួមមានខេត្តកំពង់ធំ ខេត្តព្រះវិហារ ខេត្តសៀមរាប និងឧត្តរមានជ័យ» ដោយជួយពួកគេក្នុងការធ្វើការងារកសិកម្មបើទោះជាមានការប្រែប្រួលអាកាសធាតុ។

លោក​ ដានីញែល ម៉េត​ (Daniel​ Mate) មន្ត្រីជាន់ខ្ពស់នៃគម្រោងគជ់ បានមានប្រសាសន៍ថា៖ «កិច្ចសហប្រតិបត្តិការដ៏រឹងមាំរវាងស្ថាប័នរដ្ឋាភិបាល ឆ្លុះបញ្ចាំងពីភាពជាម្ចាស់របស់រដ្ឋលើការគ្រប់គ្រងគម្រោង ដែលនឹងធានាដល់ការផ្តល់លទ្ធផលផ្លែផ្ការបស់គម្រោង ដល់កសិករ បើទោះជាគម្រោងនឹងត្រូវបញ្ចប់ក៏ដោយ»។

កិច្ចសហប្រតិបត្តិការនេះជាជំហានសំខាន់មួយទៀតក្នុងដំណើរឆ្ពោះទៅជួយកសិករកម្ពុជាក្នុងការគ្រប់គ្រងដំណើរការកសិកម្មឆ្លើយតបនឹងអាកាសធាតុ និងជួយលើកកម្ពស់ជីវភាពរបស់ពួកគាត់នៅក្នុងបរិបទនៃការប្រែប្រួលអាកាសធាតុ៕

ដោយ៖ យា​ ចិន្តា​ខន្តី​ (ប្រភព៖ អង្គការ​ FAO កម្ពុជា)