AKP សៀមរាប ថ្ងៃទី២២ ខែមិថុនា ឆ្នាំ២០២៥--ក្រុមប្រឹក្សាគណៈទន្តពេទ្យខេត្តសៀមរាប កាលពីថ្ងៃទី២១ ខែមិថុនា ឆ្នាំ២០២៥ បានរៀបចំទិវា អភិវឌ្ឍវិជ្ជាជីវទន្តសាស្ត្រលើកទី៣ នៅខេត្តសៀមរាប  គោលបំណងបង្កើនចំណេះដឹង ដល់ទន្តបណ្ឌិត ទាំងអស់នូវចំណេះដឹងផ្នែកពត់ទំរង់ធ្មេញ និងផ្នែកដាំបង្គោលក្នុងឆ្អឹងថ្គាម ដោយមានវាគ្មិនជាតិ និងអន្តរ ជាតិមកធ្វើបទបង្ហាញ។

លោក ស្រេង ធា ប្រធានក្រុមប្រឹក្សាគណៈទន្ដពេទ្យខេត្ដសៀមរាប បានថ្លែងថា នៅក្នុងខេត្តសៀម រាបមានមន្ទីរព្យាបាលមាត់ធ្មេញមាន១១កន្លែង បន្ទប់ពិគ្រោះជំងឺមាត់ធ្មេញមាន៨៨កន្លែង និងបន្ទប់ថែទាំ មាត់ ធ្មេញមានជាង៤០កន្លែង។ ដូចនេះអ្នកប្រកបវិជ្ជាជីវៈទន្តសាស្ត្រទាំងអស់ គប្បីចូលរួមយ៉ាងសកម្ម អភិវឌ្ឍន៍ចំណេះដឹងជំនាញជានិរន្ដ  ដោយគោរពប្រតិបត្តិ តាមក្រមសីលធម៌ទន្ដពេទ្យ ដើម្បីលើកស្ទួយ វិស័យទន្តសាស្ត្រនៅកម្ពុជាឱ្យកាន់តែមានការគាំទ្រពីអតិថិជននិងអ្នកជំងឺ។ 

លោកបានបន្តថា នៅថ្ងៃនេះ គណៈទន្តពេទ្យខេត្តសៀមរាបនិងក្រុមហ៊ុនUnidentបានបង្ហាញពីវិធីពត់ទំរង់ធ្មេញនិងដាំបង្គោលធ្មេញក្នុងឆ្អឹងថ្គាម ប្រកបដោយសុវត្ថិភាព ក្នុង គោលបំណង ដើម្បីចែករំលែកចំណេះដឹង និងបច្ចេកទេសថ្មីៗជូន ដល់ទន្ដពេទ្យដើម្បីបង្កើនចំណេះជំនាញបន្ថែម។ ព្រោះថា បច្ចេកទេសពត់ទំរង់ធ្មេញ និងដាំបង្គោលធ្មេញ ក្នុងឆ្អឹងថ្គាមប្រកបដោយសុវត្ថិភាព គឺពិតជាមានសារៈសំខាន់ណាស់សម្រាប់សុខភាព ប្រសិនជាទន្តពេទ្យ ធ្វើមិនបានត្រឹមត្រូវ វាបង្កឱ្យអ្នកជំងឺមានគ្រោះថ្នាក់ ដូចនេះយើងត្រូវសិក្សាឱ្យបានច្បាស់ ដើម្បីយើងធ្វើទៅ មានគុណភាពនិងមានសុវត្ថិភាពនិងមានជឿជាក់និងទុកចិត្តពីអ្នកជំងឺ។ ហើយការក្រេបយកចំណេះដឹង ទាំងនេះជាមធ្យោបាយ ដ៏មានគុណភាព ប្រសិទ្ធភាព ស័ក្ដិសិទ្ធិភាព និងមានទំនុកចិត្តក្នុងការប្រកបរកស៊ី ក្នុងវិស័យសុខាភិបាល ទាំងផ្នែករដ្ឋ និងឯកជន។

លោកបន្ថែមថា សុវត្ថិភាពរបស់លោកគ្រូ អ្នកគ្រូពេទ្យ គឺកើតចេញពីការគោរពច្បាប់ក្រមសីល ធម៌វិជ្ជាជីវៈនិងដែនកំណត់របស់ខ្លួន។ ហើយនៅក្នុងទិវាអភិវឌ្ឍវិជ្ជាជីវទន្តសាស្ត្រលើកទី៣ នៅខេត្តសៀម រាបនាពេលនេះ គឺមានវាគ្មិនជាតិ និងអន្តរជាតិ ដែលមានបទពិសោធន៍ច្រើន និងមានឯកទេស ប្រកប ដោយចក្ខុវិស័យខ្ពស់ក្នុងការអភិវឌ្ឍសមត្ថភាព និងជំនាញបែបទំនើបកម្ម វិទ្យាសាស្ត្រទាន់សម័យ ដល់ សមាជិកគណៈទន្តសាស្ត្រដើម្បីជាការពង្រីកនូវសមត្ថភាព និងចំណេះដឹងរបស់ខ្លួនទៅបំពេញ បន្ថែមនូវអ្វី ដែលខ្វះខាត។

លោករំពឹថា អ្នកពាក់ព័ន្ធទាំងអស់ នឹងទទួលបានចំណេះដឹងថ្មីៗ បទពិសោធន៍ថ្មី ហើយនឹងផ្តល់ ការចែករំលែកនូវបទពិសោធន៍ និងចំណេះដឹងថ្មីនេះ បន្តដល់ទន្តពេទ្យទន្តបណ្ឌិតផ្សេងទៀត ដែល មិនបានចូលរួមនៅពេលនេះយកទៅអភិវឌ្ឍន៍ ចំណេះដឹងរបស់ខ្លួនបានរីក ច្រើនប្រកបទៅដោយ ផ្លែផ្កា និងមានប្រសិទ្ធភាពខ្ពស់ក្នុងបម្រើសេវា៕

ដោយ៖ ឃុត សៅ