AKP កំពង់ធំ ថ្ងៃទី២២ ខែមិថុនា ឆ្នាំ២០២៥-- សម្តេចព្រះមហាសុមេធាធិបតីកិត្តិបណ្ឌិត អំ លីមហេង សម្តេចព្រះសង្ឃនាយក គណៈមហានិកាយនៃព្រះរាជាណាចក្រកម្ពុជា ព្រះអគ្គាធិការនៃអគ្គាធិការដ្ឋានពុទ្ធិកសិក្សាជាតិនិងជាព្រះចៅអធិការវត្តមុនីសុវណ្ណ ហៅចំពុះក្អែក អមព្រះរាជដំណើរដោយព្រះឃោសធម្ម លន់ សុគន្ធា ព្រះអគ្គាធិការរង អគ្គាធិការដ្ឋានពុទ្ធិកសិក្សាជាតិ ព្រះរាជគណៈ ព្រះមន្ត្រីសង្ឃមួយចំនួនផ្សេងៗទៀត ទ្រង់បន្តយាងពិនិត្យវឌ្ឍនភាពការងារពុទ្ធិកសិក្សាខេត្តកំពង់ធំនៅសាលាពុទ្ធិកវិទ្យាល័យព្រះសត្ថាបារមីកំពង់ធំ ស្ថិតក្នុងភូមិក្តី សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំកាលពីថ្ងៃទី២១ខែមិថុនាឆ្នាំ២០២៥។

ស្ថិតក្នុងវរោកាសនោះសម្តេចជាអម្ចាស់ទ្រង់បានសាកសួរសុខទុក្ខ កោតសរសើរ ក្រើនរំលឹកណែនាំនិងលើកទឹកព្រះទ័យចំពោះ ព្រះមេគណ ព្រះមន្ត្រីសង្ឃនិងគណៈគ្រប់គ្រងសាលាពុទ្ធិកសិក្សាគ្រប់កម្រិតទូទាំងខេត្តកំពង់ធំទាំងមូលសូមឱ្យបន្តយកព្រះទ័យទុកដាក់ខ្ពស់ក្នុងការបណ្តុះបណ្តាលអប់រំដល់ភិក្ខុ សាមណេរ ជាសមណសិស្ស ឱ្យគោរពប្រតិបត្តិតាមគោលការណ៍ណែនាំរបស់អគ្គាធិការដ្ឋានពុទ្ធិកសិក្សាជាតិ ដោយផ្តោតទៅលើគុណភាពជាគោល កុំយកតែបរិមាណនិងត្រូវប្រកាន់ខ្ជាប់នូវព្រះវិន័យដែលជាគ្រឿងលម្អរបស់សមណសក្យបុត្ត។

សម្តេចជាអម្ចាស់ទ្រង់មានព្រះរាជបន្ទូលថា ប្រទេសជាតិរីកចម្រើនអាស្រ័យលើមេដឹកនាំនិងការកសាងមូលធនមនុស្សប្រកបដោយចំណេះដឹង។ព្រះពុទ្ធសាសនាស្ថិតស្ថេរគង់វង្សទៅបានអាស្រ័យលើសាវ័កគោរពប្រតិបត្តិវិន័យបានខ្ជាប់ខ្ជួន។ សូមថ្វាយព្រះពរសម្តេចជាអម្ចាស់ សូមមាននូវ ព្រះជន្មយឺនយូរព្រះរាជសុខភាពល្អបរិបូរណ៍ គង់ប្រថាប់ជាម្លប់ សម្រាប់ដឹកនាំ វិស័យព្រះពុទ្ធសាសនាឱ្យមានការរុងរឿងតរៀងទៅ។

ក្នុងនោះសម្តេចម្ចាស់បានប្រគេន-ជូនបច្ច័យ ដល់គណគ្រប់គ្រងសាលានិងបានប្រគេនបច្ច័យសម្រាប់ទ្រទ្រង់សាលា និងប្រគេនសមណសិស្សគង់សិក្សារៀនសូត្រក្នុងវត្តឥន្ទ្រីយ៍សំវរៈហៅវត្តកំពង់ធំចំនួន២២៥អង្គសរុបបច្ច័យចំនួន ១១លាន៥សែនរៀល។

សូមរំលឹកផងដែរថាសម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេចព្រះសង្ឃនាយក គណៈមហានិកាយនៃព្រះរាជាណាចក្រកម្ពុជានិងជាព្រះចៅអធិការវត្តមុនីសុវណ្ណ ហៅចំពុះក្អែក ទ្រង់យាងបំពេញព្រះរាជបេសកកម្ម សាកសួរសុខទុក្ខនិងប្រោសព្រះរាជទានព្រះរាជអំណោយជូនដល់គ្រួសារកងទ័ព នាយទាន នាយទាហានរងនិងពលទាហាន ដែលឈរជើងនៅសមរភូមិមុខ តាមបណ្តាខេត្តមួយចំនួនដែលមានព្រំដែនជាប់ប្រទេសថៃអស់រយៈពេល២យប់៣ថ្ងៃ៕

ដោយ៖ ស៊ុម វណ្ណា