AKP កំពង់ស្ពឺ ថ្ងៃទី២២ ខែមិថុនា ឆ្នាំ២០២៥-- លោក ចឹក បូរិនប្រធានមន្ទីរការងារបណ្តុះបណ្តាលវិជ្ជាជីវៈខេត្តកំពង់ស្ពឺ លោកសំអឿន សុបញ្ញា អភិបាលស្រុកបសេដ្ឋ ក្រុមការងារស្រុក-ឃុំ និង ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានចុះជួបសំណេះសំណាលសួរសុខទុក្ខបងប្អូនប្រជាពលរដ្ឋ ដែលបានត្រឡប់មកពីធ្វើការងារនៅប្រទេសថៃ សរុប ១០០នាក់ ស្រី ៤២នាក់នៅវត្តមង្គលបរពិត ស្ថិតក្នុងឃុំផុង ស្រុកបសេដ្ឋ ខេត្តកំពង់ស្ពឺ។

ក្នុងឪកាសជំនួបកាលពីថ្ងៃទី២១ខែមិថុនាឆ្នាំ២០២៥លោក ចឹក បូរិនបានលើកទឹកចិត្តឱ្យបងប្អូនដែលវិលត្រឡប់មកមាតុភូមិវិញទាំងអស់បន្តមានក្តីសង្ឃឹម និងជឿជាក់លើរាជរដ្ឋាភិបាលដែលតែងតែយកចិត្តទុកដាក់ និងជួយដោះស្រាយរាល់បញ្ហាប្រឈមរបស់ប្រជាពលរដ្ឋ។

ដោយលោកថ្លែងថា វត្តមានរបស់ខ្ញុំនិងមន្ត្រីពាក់ព័ន្ធនៅថ្ងៃនេះ គឺដើម្បីនាំមកនូវក្ដីស្រឡាញ់ និងការយកចិត្តទុកដាក់របស់រាជរដ្ឋាភិបាល ក៏ដូចជាក្រសួង ដើម្បីធានាថាបងប្អូនជនរងគ្រោះទាំងអស់ទទួលបានការគាំទ្រ និងការជួយសង្គ្រោះប្រកបដោយប្រសិទ្ធភាព។"
រាជរដ្ឋាភិបាលនឹងបន្តខិតខំប្រឹងប្រែងស្វែងរកនូវឱកាសការងារ ក៏ដូចជាធានានូវលក្ខខណ្ឌការងារសមរម្យសម្រាប់បងប្អូនពលករទាំងអស់ដែលវិលត្រឡប់មកស្រុកកំណើតក៍ដូចជាមាតុភូមិវិញៗ

លោក ចឹក បូរិនបានមានប្រសាសន៍បន្តថា នាពេលនេះយើងបានអញ្ជើញ តំណាងរោងចក្រ សហគ្រាស ចំនួន ៥ ព្រមទាំងក្រុមហ៊ុនសាងសង់លំនៅដ្ឋាន ប៉េង ហួត ចូលរួមផងដែរ។ រោងចក្រ សហគ្រាស និងក្រុមហ៊ុនសាងសង់លំនៅដ្ឋានខាងលើនេះ មានតម្រូវការកម្លាំងពលកម្មរាប់ពាន់នាក់ ហើយនៅជិតផ្ទះបងប្អូនទៀតផង រោងចក្រ សហគ្រាស ព្រមទាំងក្រុមហ៊ុនសាងសង់ខាងលើ បានជម្រាបជូនអំពីអត្ថប្រយោជន៍ផ្សេងៗ និងលក្ខខណ្ឌការងារល្អៗ ជាច្រើន ជូនដល់ កម្មករនិយោជិត។ 

បន្ទាប់ពីបញ្ចប់ការសំណេះសំណាល និងផ្សព្វផ្សាយឱកាសការងាររួចមក រោងចក្រ សហគ្រាស និងក្រុមហ៊ុនសាងសង់ខាងលើ បានធ្វើការសម្ភាស នឹងយល់ព្រមទទួលយកបងប្អូនចូលធ្វើការងារទាំងអស់គ្នាទៅតាមជម្រើសរបស់បងប្អូនផ្ទាល់។ លោកសំអឿន សុបញ្ញា បានលើកឡើងថាអាជ្ញាធរ ស្រុកបសេដ្ឋបានត្រៀមលក្ខណៈជាស្រេច ដើម្បីទទួល និងសម្របសម្រួលដល់ការវិលត្រឡប់របស់ពលករឱ្យបានរលូន និងមានសុវត្ថិភាព។ 

លោក អភិបាលស្រុកបានណែនាំឱ្យអាជ្ញាធរពាក់ព័ន្ធទាំងអស់ត្រូវបង្កើនកិច្ចសហប្រតិបត្តិការ និងការត្រៀមបង្ការ ដើម្បីផ្តល់ជំនួយចាំបាច់ដល់ពលករដែលវិលត្រឡប់មកវិញ ជាពិសេសអ្នកដែលកំពុងជួបការលំបាក។ ជាមួយគ្នានេះអាជ្ញាធរស្រុក ឃុំ និងសមត្ថកិច្ច បានត្រៀមខ្លួនរួចរាល់ក្នុងជួយរៀបចំឯកសារផ្សេងៗជូនបងប្អូន ក្នុងករណីមានការបាត់បង់ចំពោះ បងប្អូនប្រជាពលរដ្ឋវិញ គឺបានបង្ហាញអារម្មណ៍កក់ក្តៅ សប្បាយរីករាយចំពោះ រាជរដ្ឋាភិបាល ដែលបានចាត់ឱ្យ អាជ្ញាធរស្រុក ឃុំ ក្រសួង មន្ទីរជំនាញ ចុះសួរសុខទុក្ខ នឹងផ្តល់ការងារធ្វើទាន់ពេលវេលា ព្រមទាំងសម្រួលការងារឲ្យពួកគាត់ជាច្រើន។ បច្ចុប្បន្ននេះ អ្នកដែលត្រឡប់មកពីប្រទេស ថៃ ដែលទើបមកដល់ស្រុកកំណើត គឺបានចូលធ្វើការងារជាបណ្តើរៗហើយ៕

ដោយ៖លឹម សាន្ត