AKP ខេត្តបន្ទាយមានជ័យ ថ្ងៃទី២១  ខែមិថុនា ឆ្នាំ២០២៥–ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា កាលពីរសៀលថ្ងៃសុក្រ ២០ មិថុនា ២០២៥ បានដឹកនាំគណៈប្រតិភូអញ្ជើញចុះសួរសុខទុក្ខ និងចែកអំណោយដល់បងប្អូនជនរងគ្រោះនៅមជ្ឈមណ្ឌលសំចត និងស្តារនីតិសម្បទាជនរងគ្រោះប៉ោយប៉ែត។ ក្នុងឱកាសនោះដែរ ឯកឧត្តមរដ្ឋមន្ត្រីក៏បានចុះពិនិត្យដោយផ្ទាល់ពីស្ថានភាពបងប្អូនពលករខ្មែរដែលបានវិលត្រឡប់មកពីប្រទេសថៃនៅច្រកព្រំដែនប៉ោយប៉ែត។
វត្តមានរបស់ឯកឧត្តមរដ្ឋមន្ត្រី ជា សុមេធី នាពេលនេះ ក៏មានការចូលរួមពីឯកឧត្ដម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ព្រមទាំងថ្នាក់ដឹកនាំក្រសួងសង្គមកិច្ច អតីតយុទ្ធជន និងយុវនីតិសម្បទាផងដែរ។ ការចុះសួរសុខទុក្ខនេះបានឆ្លុះបញ្ចាំងពីការយកចិត្តទុកដាក់ខ្ពស់របស់រាជរដ្ឋាភិបាល ក៏ដូចជាក្រសួងសង្គមកិច្ច ទៅលើសុខុមាលភាពរបស់ប្រជាពលរដ្ឋ ជាពិសេសជនរងគ្រោះ និងពលករដែលកំពុងជួបប្រទះការលំបាក។

នៅមជ្ឈមណ្ឌលសំចត និងស្តារនីតិសម្បទាជនរងគ្រោះប៉ោយប៉ែត ឯកឧត្តមរដ្ឋមន្ត្រី ជា សុមេធី បានសម្តែងនូវការសោកស្តាយ និងចូលរួមរំលែកទុក្ខចំពោះការលំបាកដែលបងប្អូនជនរងគ្រោះបានជួបប្រទះ។ ឯកឧត្តមបានលើកទឹកចិត្តឱ្យបងប្អូនទាំងអស់បន្តមានក្តីសង្ឃឹម និងជឿជាក់លើរាជរដ្ឋាភិបាលដែលតែងតែយកចិត្តទុកដាក់ និងជួយដោះស្រាយរាល់បញ្ហាប្រឈមរបស់ប្រជាពលរដ្ឋ។

ឯកឧត្តមបានថ្លែងថា "រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តែងតែគិតគូរអំពីសុខុមាលភាពរបស់ប្រជាពលរដ្ឋគ្រប់រូប ដោយមិនទុកនរណាម្នាក់ចោលនោះទេ។ វត្តមានរបស់ខ្ញុំនៅថ្ងៃនេះ គឺដើម្បីនាំមកនូវក្ដីស្រឡាញ់ និងការយកចិត្តទុកដាក់របស់រាជរដ្ឋាភិបាល ក៏ដូចជាក្រសួង ដើម្បីធានាថា បងប្អូនជនរងគ្រោះទាំងអស់ទទួលបានការគាំទ្រ និងការជួយសង្គ្រោះប្រកបដោយប្រសិទ្ធភាព។"
     ក្នុងឱកាសនោះដែរ ឯកឧត្តមរដ្ឋមន្ត្រី រួមជាមួយឯកឧត្ដម អ៊ុ រាត្រី និងគណៈប្រតិភូ បានឧបត្ថម្ភអំណោយមួយចំនួនដូចជា គ្រឿងឧបភោគបរិភោគ សម្ភារៈប្រើប្រាស់ប្រចាំថ្ងៃ និងថវិកាមួយចំនួន ដល់បងប្អូនជនរងគ្រោះ ដើម្បីជួយសម្រាលបន្ទុកជីវភាពរបស់ពួកគាត់។

បន្ទាប់ពីជួបសំណេះសំណាលជាមួយជនរងគ្រោះ ឯកឧត្តមរដ្ឋមន្ត្រី ជា សុមេធី ក៏បានបន្តដំណើរចុះពិនិត្យមើលស្ថានភាពបងប្អូនពលករខ្មែរដែលបានវិលត្រឡប់មកពីប្រទេសថៃ តាមច្រកព្រំដែនអន្តរជាតិប៉ោយប៉ែត។ ក្នុងដំណើរទស្សនកិច្ចនេះ ក៏មានការចូលរួមពីឯកឧត្តម សាន គឹមហុង អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម លៀម សុដា អភិបាលរងខេត្តបន្ទាយមានជ័យ ព្រមទាំងមន្ត្រីពាក់ព័ន្ធជាច្រើនរូប។
ឯកឧត្តមរដ្ឋមន្ត្រីបានសង្កត់ធ្ងន់ពីសារៈសំខាន់នៃការត្រៀមលក្ខណៈជាស្រេច ដើម្បីទទួល និងសម្របសម្រួលដល់ការវិលត្រឡប់របស់ពលករឱ្យបានរលូន និងមានសុវត្ថិភាព។ ឯកឧត្តមបានណែនាំឱ្យអាជ្ញាធរពាក់ព័ន្ធទាំងអស់ត្រូវបង្កើនកិច្ចសហប្រតិបត្តិការ និងការត្រៀមបង្ការ ដើម្បីផ្តល់ជំនួយចាំបាច់ដល់ពលករដែលវិលត្រឡប់មកវិញ ជាពិសេសអ្នកដែលកំពុងជួបការលំបាក។

ឯកឧត្តម ជា សុមេធី បានថ្លែងបន្តថា "យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះបងប្អូនពលករទាំងអស់ដែលបានចូលរួមចំណែកក្នុងការអភិវឌ្ឍសេដ្ឋកិច្ចជាតិ។ រាជរដ្ឋាភិបាលនឹងបន្តខិតខំប្រឹងប្រែងស្វែងរកនូវឱកាសការងារ ក៏ដូចជាធានានូវលក្ខខណ្ឌការងារសមរម្យសម្រាប់បងប្អូនពលករនៅទាំងក្នុង និងក្រៅប្រទេស។ ចំពោះបងប្អូនដែលបានវិលត្រឡប់មកវិញ យើងខ្ញុំសូមលើកទឹកចិត្តឱ្យបងប្អូនទាំងអស់ទទួលបានការបណ្តុះបណ្តាលជំនាញវិជ្ជាជីវៈបន្ថែម ដើម្បីងាយស្រួលក្នុងការស្វែងរកការងារសមរម្យនៅកម្ពុជា ឬទទួលបានការគាំទ្រផ្នែកអាជីវកម្មខ្នាតតូច។"

ដំណើរទស្សនកិច្ចរបស់ឯកឧត្តមរដ្ឋមន្ត្រី ជា សុមេធី នាពេលនេះ បានបង្ហាញឱ្យឃើញយ៉ាងច្បាស់ពីការប្តេជ្ញាចិត្តរបស់រាជរដ្ឋាភិបាលក្នុងការលើកកម្ពស់ជីវភាព និងសុខុមាលភាពរបស់ប្រជាពលរដ្ឋកម្ពុជាគ្រប់រូប៕

ដោយ៖ ឈុន សារ៉ាត