AKP ភ្នំពេញ ថ្ងៃទី២១ខែមិថុនាឆ្នាំ២០២៥--ឯកឧត្ដម ជា សុមេធី រដ្ឋមន្ដ្រីក្រសួងសង្គមកិច្ច អតីតយុទ្ធជន និងយុវនីតិសម្បទា ព្រមទាំងថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃក្រសួងសង្គមកិច្ច អតីតយុទ្ធជន និងយុវនីតិសម្បទា កាលពីថ្ងៃសុក្រ ទី២០ ខែមិថុនា ឆ្នាំ២០២៥  បានចុះជួបសំណេះសំណាល សួរសុខទុក្ខ និងបាននាំយកនូវអំណោយ ជូនដល់នាយទាហាន នាយទាហានរង និងពលទាហាន នៅសមរភូមិទិសទី៣ យុទ្ធភូមិភាគទី៤ ដែលបាននឹងកំពុងឈរជើងបំពេញតួនាទីភារកិច្ចការពារបូរណភាពទឹកដីនៅតំបន់ការពារព្រំដែនកម្ពុជា-ថៃ ខេត្តឧត្ដរមានជ័យ។ 

ក្នុងដំណើរចុះ សួរសុខទុក្ខនេះ ឯកឧត្ដមរដ្ឋមន្ដ្រី ជា សុមេធី បាននាំយកនូវ   ការផ្តាំផ្ញើនូវការសាកសួរសុខទុក្ខពីសំណាក់ថ្នាក់ដឹកនាំ និងមន្ត្រីរាជការទាំងអស់នៃក្រសួងសង្គមកិច្ច អតីតយុទ្ធជន និងយុវនីតិសម្បទា និងសូមថ្លែង កោតសរសើរចំពោះវីរភាពរបស់កងទ័ពចំពោះការការពារជាតិ និងបូរណភាពទឹកដី និងការលះបង់គ្រប់ យ៉ាងជាមួយនឹងការប្តេជ្ញាចិត្តខ្ពស់ក្នុងការបម្រើជាតិគ្រប់កាលៈទេសៈទាំងអស់ដោយ កងទ័ពទាំងអស់គឺជ ជាកូនចៅ ជាបងប្អូន ជាសាច់ញាតិ របស់ប្រជាពលរដ្ឋយើង និងជាបងប្អូនរួមការងារជាមួយមន្ត្រីរាជការគ្រប់ប្រភេទ ហេតុនេះ យើងសូមគាំទ្រនិងលើកទឹកចិត្តដល់បងប្អូនកងទ័ពយើងគ្រប់កាលៈទេសៈទាំងអស់។    ថ្នាក់ដឹកនាំ មន្ត្រីរាជការ និងប្រជាពលរដ្ឋទូទៅ ស្ម័គ្រចិត្តរួមគ្នាការពារខឿនការពារជាតិ រួមជាមួយកងកំលាំងប្រដាប់អាវុធទាំងអស់ គឺជាចំណុចស្នូលនៃភាពជោគជ័យរបស់យើង  ហើយគាំទ្រចំពោះចំណាត់ការរបស់រាជរដ្ឋាភិបាល ក្នុងការប្តឹងករណីប្រាសាទតាមាន់តូច តាមាន់ធំ តាក្របី និងតំបន់មុំបី ទៅតុលាការ ICJ និងការការពារបូរណភាពទឹកដី ទោះក្នុងតំលៃណាក៏ដោយ  រួមទាំងការប្រើប្រាស់កំលាំងដើម្បីការពារទឹកដី និងការការពារផលប្រយោជន៍ ក៏ដូចជាមុខរបររបស់ប្រជាពលរដ្ឋខ្មែរ។

ឯកឧត្ដម បានសរសើរចំពោះទឹកចិត្តរបស់ប្រជាពលរដ្ឋទូទៅ ដែលបានគាំទ្រចំពោះកងទ័ពរបស់យើងដែលបានស្តែងឱ្យឃើញ តាមរយៈការចូលរួមលើកទឹកចិត្តនានាទៅដល់កងទ័ព៕

ដោយ៖ ពេជ្រ សំអឿន(ប្រភព៖ក្រសួងសង្គមកិច្ច អតីតយុទ្ធជន និងយុវនីតិសម្បទា)