AKP  ភ្នំពេញ ថ្ងៃទី២០ ខែមិថុនា ឆ្នាំ២០២៥--

ឯកឧត្តម ហ៊ុន ម៉ានី ឧបនាយករដ្ឋមន្ត្រីរដ្ឋមន្ត្រីក្រសួងមុខងារសាធារណៈបានលើកទឹកចិត្ត ក៏ដូចជាអំពាវនាវដល់ពុកម៉ែ អ៊ុ ពូមីង បងប្អូនទាំងអស់សូមចូលរួមបរិច្ចាគឈាម ដើម្បីជួយសង្រ្គោះជីវិតអ្នកដែលត្រូវការឈាម។

យោងតាមបណ្តាញសង្គមហ្វេសប៊ុករបស់ឯកឧត្តម ហ៊ុន ម៉ានីនៅរសៀលថ្ងៃទី២០ មិថុនា ឆ្នាំ ២០២៥បានឲ្យដឹងថាថ្ងៃនេះត្រូវជាខួបទី៤៨ នៃការចាកចេញរបស់ពុក ដើម្បីទៅស្វែងរកការសង្រ្គោះជាតិ និងប្រជាជន ពីរបបប្រល័យពូជសាសន៍ ឃ្លាតឆ្ងាយពីម៉ែ និងក្រុមគ្រួសារនៅពេលនោះ ដោយយកអាយុជីវិតធ្វើជាដើមទុន ខ្ញុំបានមកចូលរួមបរិច្ចាគឈាម ជាមួយយុទ្ធនាការ «យើងរួមគ្នាបរិច្ចាគឈាម ដើម្បីសង្រ្គោះជីវិត» ដែលសហការរៀបចំដោយរដ្ឋបាលខេត្តសៀមរាប មជ្ឈមណ្ឌជាតិផ្តល់ឈាម សហភាពសហព័ន្ធយុវជនកម្ពុជា និងក្រុមបាល់ទាត់ពិធីករកីឡាកម្ពុជា នៅខេត្តសៀមរាប ដែលជាការបរិច្ចាគ លើកទី ១៥ របស់ខ្ញុំ។ 

ឯកឧត្តមហ៊ុន ម៉ានីបានលើកឡើងទៀតថាឈាមមានសារៈសំខាន់សម្រាប់សង្រ្គោះជីវិត មិនថាអ្នកជំងឺដែលត្រូវការវះកាត់ អ្នករងរបួសដែលត្រូវការឈាម និងស្រ្តីឆ្លងទន្លេដែលបាត់បង់ឈាម ហើយដែលមានតម្រូវការជារៀងរាល់ថ្ងៃ។ 

ឯកឧត្តមបញ្ជាក់ថា៖"ខ្ញុំសូមលើកទឹកចិត្ត ក៏ដូចជាអំពាវនាវដល់ពុកម៉ែ អ៊ុ ពូមីង បងប្អូនទាំងអស់សូមចូលរួមបរិច្ចាគឈាម ដើម្បីជួយសង្រ្គោះជីវិតអ្នកដែលត្រូវការឈាម។ នេះជាអំពើជាកុសលមួយដ៏មានតម្លៃ ដែលបានមគ្គផលខ្ពស់ណាស់ មិនថាយើងមានជំនឿសាសនាណាទេ។ ម្យ៉ាងទៀត នៅពេលបងប្អូនបរិច្ចាគឈាម បងប្អូននឹងនឹកឃើញដល់សមាជិកគ្រួសារ ឬមនុស្សជាទីស្រលាញ់របស់យើង ប្រសិនបើអ្នកត្រូវការឈាមនោះជាពួកគាត់វិញ តើអារម្មណ៍របស់ក្រុមគ្រួសារដែលកំពុងស្រែកដង្ហោយហៅរកជំនួយនោះយ៉ាងណា"៕

ដោយ៖ ប៊ុនរិទ្ធ