AKP ព្រះវិហារ ថ្ងៃទី២០ ខែមិថុនា ឆ្នាំ២០២៥-- នៅសាលាស្រុកជ័យសែន លោក មុត ភិសិទ្ធនា អភិបាលរងខេត្ត បានអញ្ជើញជាអធិបតីក្នុងកិច្ចប្រជុំផ្សព្វផ្សាយលិខិតបដ្ឋានគតិយុត្ត និងបទប្បញ្ញត្តិបច្ចេកទេសសុវត្ថិភាពស្ថានីយប្រេងឥន្ធនៈ ស្ថានីយឧស្ម័ន្មឥន្ធនៈ នាព្រឹកថ្ងៃទី១៩ ខែមិថុនា ឆ្នាំ២០២៥ ដោយមានការចូលរួមពីតំណាងមន្ទីររ៉ែ និងថាមពល អភិបាលរងស្រុកជ័យសែន មន្ត្រីពាក់ព័ន្ធ និងអាជីករលក់ដូរប្រេងឥន្ធនៈ ក្នុងស្រុកជ័យសែន។

លោក មុត ភិសិទ្ធនា បានមានប្រសាសន៍ថា ខេត្តព្រះវិហារមានប្រជាជនសរុបទូទាំងខេត្តមានចំនួន៥៩,៥៣៥គ្រួសារ ស្មើនឹងចំនួនមនុស្ស២៤២,៥៤៣នាក់។ ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសកម្ពុជាយើងមានការអភិវឌ្ឍន៍រីកចម្រើនលើគ្រប់វិស័យ ដែលធ្វើឱ្យប្រជាពលរដ្ឋមានតម្រូវការប្រើប្រាស់ប្រេង និងឧស្ម័នឥន្ធនៈ មានការកើនឡើងគួរឱ្យកត់សម្គាល់។

លោកអភិបាលរងខេត្តបានមានប្រសាសន៍បន្តថា លទ្ធផលដែលមន្ទីរសម្រេចបាននៅពាក់កណ្តាលឆ្នាំ២០២៥ នៅក្នុងទូទាំងខេត្តព្រះវិហារមានស្ថានីយប្រេងឥន្ធនៈសរុបទាំងអស់ចំនួន១៤០ស្ថានីយ នៅក្នុងនោះដែរស្ថានីយ ដែលមានច្បាប់មានចំនួន១២០ស្ថានីយ ហើយនៅសល់ ចំនួន២០ស្ថានីយទៀតដែល ពុំទាន់មានច្បាប់អនុញ្ញាតដំណើរការលក់នៅឡើយ។ ចំពោះនៅក្នុងស្រុកជ័យសែន មានស្ថានីយប្រេងសរុបមានចំនួន០៩ស្ថានីយ សុទ្ធតែមានច្បាប់អនុញ្ញាតទាំងអស់។ ហេតុនេះការផ្សព្វផ្សាយបានធ្វើឱ្យយើងគ្រប់គ្នាបានយល់ដឹងអំពីច្បាប់ អនុក្រឹត្យ ប្រកាស និងសារាចរណែនាំរបស់ក្រសួង។

លោកបន្ថែមថា អាជ្ញាធរមូលដ្ឋានគ្រប់លំដាប់ថ្នាក់ និងម្ចាស់ស្ថានីយប្រេងឥន្ធនៈ និងស្ថានីយឧស្ម័នឥន្ធនៈទាំងអស់ដែលបានប្រកបអាជីវកម្មលក់ដូរនៅក្នុងស្រុក សូមយកចិត្តទុកដាក់លើហានិភ័យគ្រោះថ្នាក់ពីការអាជីវកម្មនេះឱ្យបានខ្ពស់ ចៀសវាងមានគ្រោះថ្នាក់ដែលកើតចេញពីការធ្វេសប្រហែសបន្តិចបន្តួចយើង ហើយត្រូវចូលរួមសហការ និងអនុវត្តទៅតាមច្បាប់ អនុក្រឹត្យ សារាចរ និងប្រកាសនេះឱ្យទទួលបាននូវជោគជ័យ៕

ដោយ ទិត ស្រ៊