AKP បន្ទាយមានជ័យ ថ្ងៃទី២២ ខែឧសភា ឆ្នាំ២០២៦-- នៅក្នុងយុគសម័យដែលទីផ្សារការងារទាមទារខ្លាំងនូវជំនាញបច្ចេកទេស និងវិជ្ជាជីវៈ កិច្ចសហប្រតិបត្តិការត្រីភាគីរវាងគ្រឹះស្ថានអប់រំបណ្តុះបណ្តាល គ្រឹះស្ថានសិក្សាចំណេះទូទៅ និងវិស័យឯកជន ត្រូវបានមើលឃើញថាជាយុទ្ធសាស្ត្រគន្លឹះមិនអាចខ្វះបាន។ ជាក់ស្តែង នាព្រឹកថ្ងៃសុក្រ ទី២២ ខែឧសភា ឆ្នាំ២០២៦ ពិធីចុះអនុស្សរណៈនៃការយោគយល់គ្នា (MOU) ដ៏មានសារៈសំខាន់មួយ ត្រូវបានរៀបចំឡើងរវាង វិទ្យាស្ថានពហុបច្ចេកទេសខេត្តបន្ទាយមានជ័យ ក្រុមហ៊ុន កូមិនខ្មែរ និងវិទ្យាល័យហ៊ុនសែនខ្លាកូនក្នុងគោលបំណងរួមគ្នាអភិវឌ្ឍធនធានមនុស្សឱ្យមានសមត្ថភាពស្របតាមតម្រូវការទីផ្សារការងារជាក់ស្តែង។

ពិធីដ៏មានអត្ថន័យនេះត្រូវបានប្រារព្ធឡើងនៅសាលប្រជុំវិទ្យាស្ថានពហុបច្ចេកទេសខេត្តបន្ទាយមានជ័យ ក្រោមអធិបតីភាពរបស់លោក យឹម សំណាង អភិបាលរងខេត្ត និងជាតំណាងរបស់ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ។ កម្មវិធីនេះក៏មានការអញ្ជើញចូលរួមពីលោកស្រី សំរិទ្ធ សូរ្យជាតិ នាយកវិទ្យាស្ថានពហុបច្ចេកទេសខេត្តបន្ទាយមានជ័យ លោក-លោកស្រីតំណាងក្រុមហ៊ុន កូមិនខ្មែរ ព្រមទាំងលោកនាយកវិទ្យាល័យ និងអ្នកពាក់ព័ន្ធជាច្រើនរូបទៀត។

ការចុះហត្ថលេខាលើ MOU នាពេលនេះ មិនមែនគ្រាន់តែជាទម្រង់បែបបទរដ្ឋបាលនោះទេ ប៉ុន្តែវាគឺជាការបើកទំព័រថ្មីមួយនៃការបង្កើត «ស្ពានចម្លង» ដ៏រឹងមាំសម្រាប់សិស្ស-និស្សិតនៅក្នុងខេត្តបន្ទាយមានជ័យ ដោយផ្តោតលើចំណុចសំខាន់ៗការតម្រង់ទិស និងការយល់ដឹងពីជំនាញ (វិទ្យាល័យហ៊ុនសែនខ្លាកូន)ជួយឱ្យសិស្សានុសិស្សនៅកម្រិតចំណេះទូទៅអាចមើលឃើញពីឱកាស និងសារៈសំខាន់នៃជំនាញបច្ចេកទេសតាំងពីមុនបញ្ចប់បាក់ឌុប។ ការបណ្តុះបណ្តាលប្រកបដោយគុណភាព (វិទ្យាស្ថានពហុបច្ចេកទេសខេត្ត) ធានាថាកម្មវិធីសិក្សាត្រូវបានធ្វើបច្ចុប្បន្នភាព និងឆ្លើយតបចំៗទៅនឹងអ្វីដែលក្រុមហ៊ុនឯកជនចង់បាន។ ឱកាសអនុវត្តផ្ទាល់ និងការងារ (ក្រុមហ៊ុន កូមិនខ្មែរ) បើកទ្វារទទួលសិស្ស-និស្សិតឱ្យចុះកម្មសិក្សាការងារជាក់ស្តែង និងផ្តល់ឱកាសការងារភ្លាមៗក្រោយបញ្ជប់ការសិក្សា។

នៅក្នុងឱកាសនោះ លោក យឹម សំណាង អភិបាលរងខេត្តបន្ទាយមានជ័យ បានពាំនាំនូវការសាកសួរសុខទុក្ខពីសំណាក់ឯកឧត្តម អ៊ុ រាត្រី និងបានសម្តែងនូវការកោតសរសើរយ៉ាងខ្លាំងចំពោះគំនិតផ្តួចផ្តើមនៃកិច្ចសហប្រតិបត្តិការនេះ។លោកអភិបាលរងខេត្តបានសង្កត់ធ្ងន់ថាការអភិវឌ្ឍន៍ធនធានមនុស្ស គឺជាអាទិភាពគន្លឹះរបស់រាជរដ្ឋាភិបាល។ កិច្ចសហប្រតិបត្តិការត្រីភាគីនៅថ្ងៃនេះ គឺជាគំរូដ៏ល្អមួយក្នុងការជួយជម្រុញ និងលើកកម្ពស់គុណភាពអប់រំបច្ចេកទេស និងវិជ្ជាជីវៈ (TVET) នៅក្នុងខេត្តរបស់យើង។ វានឹងជួយកាត់បន្ថយគម្លាតរវាងការបណ្តុះបណ្តាល និងតម្រូវការប្រើប្រាស់កម្លាំងពលកម្ម ពោលគឺរៀនចប់មានការងារធ្វើភ្លាម ដោយមិនបារម្ភពីការបាត់បង់ឱកាសនោះឡើយ។

ជាមួយគ្នានោះ លោកក៏បានជំរុញឱ្យភាគីទាំងបីបន្តសហការគ្នាឱ្យបានស្អិតរមួត និងអនុវត្តតាមខ្លឹមសារនៃអនុស្សរណៈនេះឱ្យមានប្រសិទ្ធភាពខ្ពស់ ដើម្បីជាប្រយោជន៍ដល់យុវជននៅក្នុងខេត្តទាំងមូល។

លោកស្រី សំរិទ្ធ សូរ្យជាតិ នាយកវិទ្យាស្ថានពហុបច្ចេកទេសខេត្តបន្ទាយមានជ័យ រួមទាំងតំណាងក្រុមហ៊ុន កូមិនខ្មែរ និងនាយកវិទ្យាល័យហ៊ុនសែនខ្លាកូន បានបង្ហាញនូវការប្តេជ្ញាចិត្តយ៉ាងមុតមាំក្នុងការរួមគ្នាចែករំលែកធនធាន បទពិសោធន៍ និងបច្ចេកវិទ្យាទៅវិញទៅមក។

កិច្ចសហប្រតិបត្តិការនេះរំពឹងថា នឹងក្លាយជាកាតាលីករដ៏មានឥទ្ធិពលមួយក្នុងការទាក់ទាញសិស្សានុសិស្សឱ្យមកចាប់អារម្មណ៍លើការរៀនជំនាញបច្ចេកទេសកាន់តែច្រើន ដែលជាកម្លាំងចលករយ៉ាងសំខាន់ក្នុងការជំរុញកំណើនសេដ្ឋកិច្ច និងការវិនិយោគនៅក្នុងខេត្តបន្ទាយមានជ័យ នាពេលបច្ចុប្បន្ន និងទៅអនាគត៕

ដោយ ឈុន សារ៉ាត