AKP កំពង់ឆ្នាំង ថ្ងៃទី២៧ ខែតុលា ឆ្នាំ២០២៦--លោក ឈឹម វុទ្ធា អភិបាលរងខេត្តកំពង់​ឆ្នាំង បានដឹកនាំកិច្ចប្រជុំត្រួតពិនិត្យ និងកែសម្រួលសេចក្តីព្រាងរបាយការណ៍ប្រចាំខែតុលា និងលើកទិសដៅបន្ត របស់រដ្ឋបាលខេត្តនៅថ្ងៃទី២៦ ខែតុលា ឆ្នាំ២០២៦ ដោយមានការអញ្ជើញចូលរួមពី លោកនាយករដ្ឋបាលសាលាខេត្ត កងកម្លាំងប្រដាប់អាវុធ លោក លោកស្រីតំណាងមន្ទីរអង្គភាពជុំវិញខេត្តផងដែរ។

ក្នុងឱកាសនោះលោក ឈឹម វុទ្ធា បានមានប្រសាសន៍ថា លទ្ធផលដែលយើងសម្រេចបានគឺពិតជាមិន​អាចកាត់ផ្ដាច់​បាន​​ពីការខិត​ខំប្រឹងប្រែង អស់ពីកម្លាំ​ងកាយចិត្តដោយឈរលើ​ស្មារតីទទួល​ខុសត្រូវខ្ពស់​ក្នុងការការពារ​ ថែរក្សា​បាននូវសុខសន្តិភាព សន្តិសុខសណ្ដាប់ធ្នាប់សង្គមបានល្អប្រសើររបស់​កងកម្លាំងប្រដាប់​អាវុធគ្រប់​ប្រភេទ ក្នុងការ ការពារបូរណភាពទឹកដីពីការឈ្លានពានរបស់ប្រទេសសៀម និងបង្ការទប់ស្កាត់​បង្ក្រាបបានជាបន្តបន្ទាប់​នូវបទល្មើសផ្សេងៗ ដែលកើតមាន​នៅក្នុងខេត្ត និងដោយមាន​ការខិតខំប្រឹងប្រែង​យកចិត្តទុកដាក់ខ្ពស់របស់​អាជ្ញាធរគ្រប់ថ្នាក់មន្ទីរ​អង្គភាពជុំវិញខេត្តក្នុង​ការអនុវត្តតួនាទី​ភារកិច្ចរបស់ខ្លួន ។

ទន្ទឹមនឹងនេះលោកបានបន្តថា មន្ត្រីពាក់ព័ន្ធទាំងអស់ ចូលរួមយ៉ាងសកម្មក្នុងការការពារនិងតាមដានយកចិត្តទុកដាក់ទប់ស្កាត់មិនឱ្យកើតមានឆបោកតាមប្រព័ន្ធអនឡាញ ដែលជាបញ្ហាប្រឈមជាសកលមួយ ដោយទាមទារវិធីសាស្ត្ររួម និងការឆ្លើយតបជាសកលក្នុងកិច្ចសហប្រតិបត្តិការអន្តរជាតិនិងការសម្របសម្រួលថ្នាក់ជាតិ ប្រចាំសប្ដាហ៍ដើម្បីតាមដានវឌ្ឍនភាពការងារបង្ក្រាបបទល្មើសធបោកតាមមប្រព័ន្ធបច្ចេកវិទ្យាអ៊ីនធឺណិត (Onllne Scams) ឱ្យមានប្រសិទ្ធភាព។

លោកអភិបាលរងបានបញ្ជាក់ទៀតថា ដោយសារដោយសារដំណាច់ខែតុលានេះ មានសេសសល់ការងារមួយ​ចំនួន មានការពាក់គងគ្នានិងខែកន្លងមក និងការងារ​ថ្មីៗជាច្រើនទៀត​កំពុងរង់ចាំ​ដែលទាមទារនូវ​បទពិ​សោធន៍​ភាពឆ្នៃប្រឌិត​ឱ្យកាន់តែស៊ីជម្រៅ និងរស់រវើក​ថែម​ទៀតនោះ​ដែលទាមទារ​ឱ្យអាជ្ញាធរដែនដី​គ្រប់ជាន់ថ្នាក់ភាគី​ពាក់​ព័ន្ធទាំងអស់ ត្រូវខិតខំរួមគ្នា​ធ្វើការវាយតម្លៃ​បញ្ហាប្រឈម​​មូលហេតុនៃបញ្ហាប្រឈម និងជម្រើសនានា​សម្រាប់ជាដំណោះស្រាយ ជាមូលដ្ឋាន​លើក​​កម្ពស់​​ប្រសិទ្ធភាព​អនុវត្តន៍ទិសដៅ និងភារកិច្ចដើម្បីយកមកអនុវត្តបន្តទៅមុខទៀត៕

ដោយ៖បៃ ស៊ីថុន