AKP ភ្នំពេញ ថ្ងៃទី១៦ ខែកញ្ញា ឆ្នាំ២០២៦-- ឯកឧត្តម ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំរៀបចំនិងត្រួតពិនិត្យសេចក្ដីព្រាងរបាយការណ៍ស្ដីពីសមិទ្ធផលក្នុងវិស័យអភិវឌ្ឍន៍ជនបទ រយៈពេល ០៣ឆ្នាំ នៅក្នុងនីតិកាលទី៧ នៃរដ្ឋសភា នារសៀលថ្ងៃពុធ ទី១៦ ខែកញ្ញា ឆ្នាំ២០២៦ នៅទីស្ដីការក្រសួង ដោយមានការចូលរួមពី ឯកឧត្តមរដ្ឋលេខាធិការប្រចាំការ ឯកឧត្ដម លោកជំទាវ ជាថ្នាក់ដឹកនាំក្រសួង ព្រមទាំងលោក លោកស្រីប្រធាន និងមន្ដ្រីជំនាញ គ្រប់នាយកដ្ឋាននៃក្រសួងអភិវឌ្ឍន៍ជនបទ។

អង្គប្រជុំបានពិនិត្យ និងពិភាក្សាយ៉ាងល្អិតល្អន់លើសេចក្ដីព្រាងរបាយការណ៍ដែលនាយកដ្ឋានជំនាញបានរៀបចំ ព្រមទាំងបានផ្ដល់ធាតុចូលដ៏មានសារៈសំខាន់មួយទៀត ដែលធ្វើឱ្យរបាយការណ៍សមិទ្ធផលនេះ កាន់តែមានលក្ខណៈគ្រប់ជ្រុងជ្រោយ។

ឯកឧត្តមរដ្ឋមន្ដ្រីបានគូសបញ្ជាក់ថា តាមរយៈរបាយការណ៍សមិទ្ធផលដែលសម្រេចបានទាំងនេះ គឺជាការឆ្លុះបញ្ចាំងអំពីប្រសិទ្ធភាព ដែលក្រសួងអភិវឌ្ឍន៍ជនបទបាននិងកំពុងអនុវត្តនូវមុខងារ និងភារកិច្ចរបស់ខ្លួនប្រកបដោយការទទួលខុសត្រូវ ដើម្បីចូលរួមចំណែកធ្វើឱ្យសម្រេចនូវគោលដៅនៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្នុងនីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិត និងថាមវន្ដរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)