AKP ភ្នំពេញ ថ្ងៃទី១០ ខែកញ្ញា ឆ្នាំ២០២៦ -- វិមានក្រឹមឡាំងបាននិយាយកាលពីថ្ងៃពុធថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងសមភាគីអាម៉េរិក លោក ដូណាល់ ត្រាំ បានពិភាក្សាគ្នាអំពីគំនិតនៃការរៀបចំកិច្ចប្រជុំត្រីភាគីជាមួយលោក ស៊ី ជីនពីង ប្រធានាធិបតីចិន នៅក្នុងកិច្ចប្រជុំកំពូលនាពេលខាងមុខនៅខែវិច្ឆិកា។

កិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ត្រូវបានគ្រោងនឹងរៀបចំនៅទីក្រុងសិនជិន ប្រទេសចិន នៅថ្ងៃទី១៨-១៩ខែវិច្ឆិកា ឆ្នាំ២០២៦។

រុស្ស៊ីបានបង្ហាញថា លោក ពូទីន នឹងចូលរួម បើទោះបីជាសេតវិមានមិនទាន់បានប្រកាសថា តើលោក ត្រាំ នឹងនៅទីនោះឬក៏អត់ក៏ដោយ។

នៅពេលសួរថា តើលោក ត្រាំ និងលោក ពូទីន បានពិភាក្សាគ្នាអំពីគំនិតនៃកិច្ចប្រជុំត្រីភាគីនៅទីក្រុងសិនជិន ក្នុងអំឡុងពេលនៃការសន្ទនាគ្នាតាមទូរស័ព្ទរបស់ពួកគេកាលពីថ្ងៃអង្គារដែរឬទេ អ្នកនាំពាក្យវិមានក្រឹមឡាំងលោក ឌីមីទ្រី ប៉េស្កូវ បាននិយាយថា «វាគ្មានភាពមន្ទិលនោះទេ»។

លោក ប៉េស្កូវ បានប្រាប់អ្នកសារព័ត៌មានថា «លទ្ធភាពដែលអាចកើតមាននេះត្រូវបានលើកឡើងពីមុនមក ហើយនឹងមានឱកាសបែបនេះ»។

APEC គឺជាវេទិកាអន្តររដ្ឋាភិបាលដែលមានតាំងពីទសវត្សរ៍ឆ្នាំ១៩៨០ មក។

ក្រុមនេះ ដែលរួមមានទាំងរុស្ស៊ី ចិន និងសហរដ្ឋអាមេរិកផងនោះ គឺជាវេទិកាមួយក្នុងចំណោមវេទិកាសំខាន់បំផុតសម្រាប់កិច្ចសហប្រតិបត្តិការសេដ្ឋកិច្ចនៅអាស៊ីប៉ាស៊ីហ្វិក៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)