AKP បន្ទាយមានជ័យ ថ្ងៃទី១០ ខែកញ្ញា ឆ្នាំ២០២៦ -- ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នៅព្រឹកថ្ងៃព្រហស្បតិ៍ ទី១០ ខែកញ្ញា ឆ្នាំ២០២៦ នេះ បានអញ្ជើញជួបសំណេះសំណាលជាមួយក្រុមការងាររាជរដ្ឋាភិបាលចុះមូលដ្ឋានឃុំឈ្នួរមានជ័យ ឃុំជប់វារី និងឃុំបុស្បូវ ក្នុងស្រុកព្រះនេត្រព្រះ ខេត្តបន្ទាយមានជ័យ ដើម្បីពិនិត្យវឌ្ឍនភាពការងារ និងពង្រឹងការចុះបំពេញបេសកកម្មនៅមូលដ្ឋានឱ្យកាន់តែមានប្រសិទ្ធភាព។

ក្នុងជំនួបនេះ ឯកឧត្តម ឌិត ទីណា បានផ្តោតសំខាន់លើតួនាទីរបស់ក្រុមការងាររាជរដ្ឋាភិបាលចុះមូលដ្ឋាន ក្នុងការក្លាយជាស្ពានភ្ជាប់ដ៏មានប្រសិទ្ធភាពរវាងរាជរដ្ឋាភិបាល និងប្រជាពលរដ្ឋ តាមរយៈការចុះជួបស្តាប់មតិយោបល់ សំណូមពរ និងបញ្ហាប្រឈមរបស់ប្រជាពលរដ្ឋដោយផ្ទាល់ ព្រមទាំងស្វែងរកដំណោះស្រាយឱ្យបានទាន់ពេលវេលា និងស្របតាមស្ថានភាពជាក់ស្តែងនៅមូលដ្ឋាន។

ឯកឧត្តមរដ្ឋមន្ត្រីបានគូសបញ្ជាក់ថា ការងារចុះមូលដ្ឋានមិនគួរត្រូវបានមើលឃើញត្រឹមតែជាការចុះជួប ឬការរាយការណ៍ពីស្ថានភាពនោះទេ ប៉ុន្តែត្រូវប្រែក្លាយទៅជាសកម្មភាពជាក់ស្តែងដែលអាចឆ្លើយតបនឹងតម្រូវការរបស់ប្រជាពលរដ្ឋ។ ដូច្នេះ ក្រុមការងារត្រូវយកចិត្តទុកដាក់ស្តាប់បញ្ហាពីប្រភពផ្ទាល់ ពិនិត្យមូលហេតុ និងកំណត់អាទិភាព ដើម្បីជំរុញការដោះស្រាយឱ្យចំគោលដៅ។

ជាមួយគ្នានេះ ឯកឧត្តម ឌិត ទីណា បានលើកទឹកចិត្តឱ្យក្រុមការងារបន្តពង្រឹងកិច្ចសហការជាមួយអាជ្ញាធរមូលដ្ឋាន គ្រប់ស្ថាប័នជំនាញ និងអ្នកពាក់ព័ន្ធ ដើម្បីរួមគ្នាដោះស្រាយបញ្ហាដែលកើតមាននៅតាមមូលដ្ឋាន ជាពិសេសបញ្ហាពាក់ព័ន្ធនឹងជីវភាពរស់នៅ កសិកម្ម ផលិតកម្ម ការប្រើប្រាស់ធនធានធម្មជាតិ និងការលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋ។

សម្រាប់តំបន់ជនបទ ការយកចិត្តទុកដាក់លើវិស័យកសិកម្ម និងជីវភាពកសិករត្រូវបានចាត់ទុកថា ជាកត្តាសំខាន់មួយក្នុងការរក្សាស្ថិរភាពសេដ្ឋកិច្ចគ្រួសារ។ ក្នុងន័យនេះ ក្រុមការងារចុះមូលដ្ឋានត្រូវបន្តជំរុញការផ្សព្វផ្សាយចំណេះដឹងបច្ចេកទេសកសិកម្ម ការបង្កើនផលិតភាព ការកាត់បន្ថយថ្លៃដើមផលិតកម្ម ការពង្រឹងគុណភាពផលិតផល និងការស្វែងរកទីផ្សារដែលអាចផ្តល់ផលប្រយោជន៍ប្រកបដោយចីរភាពដល់កសិករ។

ឯកឧត្តមរដ្ឋមន្ត្រីក៏បានសង្កត់ធ្ងន់ទៅលើសារៈសំខាន់នៃការធ្វើការងារដោយមានការទទួលខុសត្រូវ និងតម្លាភាព ព្រមទាំងការផ្តល់ព័ត៌មានត្រឹមត្រូវទៅដល់ប្រជាពលរដ្ឋ។ ការឆ្លើយតបចំពោះសំណូមពររបស់ប្រជាពលរដ្ឋ ត្រូវផ្អែកលើការពិត និងសមត្ថភាពដោះស្រាយជាក់ស្តែង ដោយត្រូវបន្តតាមដានលទ្ធផលការងារ មិនត្រឹមតែទទួលបញ្ហា និងបញ្ជូនបន្តប៉ុណ្ណោះទេ។

ការជួបសំណេះសំណាលនៅថ្ងៃនេះ ក៏ជាឱកាសសម្រាប់ក្រុមការងាររាយការណ៍ពីស្ថានភាព និងលទ្ធផលការងារដែលបានអនុវត្តនៅតាមឃុំទាំងបី ព្រមទាំងលើកឡើងនូវបញ្ហាប្រឈម និងសំណូមពរដែលត្រូវការការគាំទ្រ និងការសម្របសម្រួលពីថ្នាក់ខេត្ត និងថ្នាក់ជាតិ។ តាមរយៈការចុះមូលដ្ឋានជាប្រចាំ និងការដឹកនាំណែនាំរបស់ឯកឧត្តម ឌិត ទីណា ការងាររបស់ក្រុមការងាររាជរដ្ឋាភិបាលចុះមូលដ្ឋានត្រូវបានរំពឹងថា នឹងកាន់តែមានភាពជិតស្និទ្ធជាមួយប្រជាពលរដ្ឋ ព្រមទាំងអាចកំណត់បញ្ហាបានច្បាស់លាស់ និងជំរុញការដោះស្រាយបានកាន់តែមានប្រសិទ្ធភាព។

ជំនួបសំណេះសំណាលនេះបានឆ្លុះបញ្ចាំងពីការយកចិត្តទុកដាក់របស់រាជរដ្ឋាភិបាលចំពោះការងារមូលដ្ឋាន ដោយផ្តោតលើការស្តាប់សំឡេងប្រជាពលរដ្ឋ ការឆ្លើយតបតាមតម្រូវការជាក់ស្តែង និងការប្រែក្លាយបញ្ហាប្រឈមទៅជាកិច្ចការដែលអាចដោះស្រាយបាន។ សម្រាប់ឃុំឈ្នួរមានជ័យ ឃុំជប់វារី និងឃុំបុស្បូវ ការពង្រឹងសកម្មភាពរបស់ក្រុមការងារនៅមូលដ្ឋាន នឹងក្លាយជាចំណែកសំខាន់ក្នុងការជួយជំរុញការអភិវឌ្ឍមូលដ្ឋាន និងលើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើង៕

ដោយ៖ ឈុន សារ៉ាត