AKP កំពង់ចាម ថ្ងៃទី១០ ខែកញ្ញា ឆ្នាំ២០២៦ -- រដ្ឋបាលខេត្តកំពង់ចាម បានរៀបចំពិធីបើកវគ្គបណ្តុះបណ្តាលមន្ត្រីថ្នាក់មូលដ្ឋាន ស្តីពីការអនុវត្តកម្មវិធីអន្តរាគមន៍ឆ្លើយតបនឹងគ្រោះអាសន្នរបស់រាជរដ្ឋាភិបាល ជូនដល់ថ្នាក់មូលដ្ឋានរដ្ឋបាលក្រុង ស្រុក ឃុំ សង្កាត់ ក្នុងក្របខណ្ឌខេត្តកំពង់ចាម ដើម្បីត្រៀមលក្ខណៈអនុវត្តកម្មវិធីជាផ្លូវការទូទាំងប្រទេសនាពេលឆាប់ៗខាងមុខ ក្រោមអធិបតីភាពរបស់លោក អេង សុភ័ក្ត្រ ប្រធាននាយកដ្ឋានរដ្ឋបាល និងគ្រប់គ្រងធនធានមនុស្ស នៃមូលនិធិជាតិជំនួយសង្គមនិងលោកស្រី ប៉ាង ដានី អភិបាលរងនៃគណៈអភិបាលខេត្តកំពង់ចាម នៅថ្ងៃទី១០ ខែកញ្ញា ឆ្នាំ២០២៦ នេះ។

លោក អេង សុភ័ក្ត្រ ប្រធាននាយកដ្ឋានរដ្ឋបាល និងគ្រប់គ្រងធនធានមនុស្ស នៃមូលនិធិជាតិជំនួយសង្គម បានលើកឡើងថា វគ្គបណ្តុះបណ្តាលនេះ រៀបចំឡើងក្នុងគោលបំណងពង្រឹងសមត្ថភាពដល់ប្រតិបត្តិករក្នុងក្រុង ស្រុក ឃុំ សង្កាត់ ឱ្យបានយល់ដឹងច្បាស់នូវមូលនិធិជាតិជំនួយសង្គម ដើម្បីត្រៀមខ្លួនជាស្រេចក្នុងការអនុវត្តកម្មវិធីជំនួយសង្គមនេះឱ្យមានប្រសិទ្ធភាពខ្ពស់។

លោក អេង សុភ័ក្ត្រ បានបញ្ជាក់ថា យន្តការបច្ចេកទេស និងនិតិវិធីនៃការអនុវត្តកម្មវិធីអន្តរាគមន៍នេះ គឺត្រូវតែធ្វើការបណ្តុះបណ្តាល និងតម្រង់ទិសដល់អាជ្ញាធរ ក្រុង ស្រុក ឃុំ សង្កាត់ និងមន្ត្រីជំនាញពាក់ព័ន្ធទាំងអស់ឱ្យមានសមត្ថភាព និងការទទួលខុសត្រូវរបស់ប្រតិបត្តិករថ្នាក់មូលដ្ឋាន ដែលជាសោរគន្លឹះដ៏សំខាន់បំផុតក្នុងការធានាថា ជំនួយឧបត្ថម្ភរបស់រាជរដ្ឋាភិបាលនឹងត្រូវសម្រេចបានជោគជ័យ និងដល់ដៃប្រជាពលរដ្ឋដែលមានតម្រូវការចាំបាច់ពិតប្រាកដដោយឥតរើសអើង និងទាន់ពេលវេលា ចំគោលដៅ និងប្រកបដោយតម្លាភាព៕

ដោយ៖ ឆាយ ម៉ុត