AKP ភ្នំពេញ ថ្ងៃទី១០ ខែកញ្ញា ឆ្នាំ២០២៦ -- មេបញ្ជាការយោធាកំពូលៗរបស់កូរ៉េខាងត្បូង និងកងកម្លាំងសហរដ្ឋអាមេរិកនៅកូរ៉េ (USFK) បានទៅទស្សនកិច្ចអង្គភាពព្រំដែនជួរមុខភាគខាងកើតកាលពីថ្ងៃពុធ ដោយបានបញ្ជាក់សារជាថ្មីអំពីការត្រៀមខ្លួន និងការទប់ស្កាត់រួមគ្នា ចំពេលដែលមានការកើនឡើងនៃសកម្មភាពនៅព្រំដែនកូរ៉េខាងជើងក្នុងរយៈពេលប៉ុន្មានសប្តាហ៍ថ្មីៗនេះ។

អគ្គសេនាធិការចម្រុះ (JCS) បាននិយាយនៅក្នុងសេចក្តីប្រកាសព័ត៌មានមួយថា ប្រធាន JCS លោក ជីន យ៉ុងស៊ុង និងលោកឧត្តមសេនីយ៍Xavier Brunson មេបញ្ជាការនៃកងកម្លាំង USFK បានទៅទស្សនកិច្ចនៅប៉ុស្តិ៍ព្រំដែនភាគខាងកើត ដើម្បីត្រួតពិនិត្យប្រតិបត្តិការ និងការត្រៀមខ្លួនតាមបណ្តោយតំបន់គ្មានយោធា (DMZ) ដែលបំបែកកូរ៉េទាំងពីរ។

JCS បាននិយាយថា «មេបញ្ជាការបានបញ្ជាក់សារជាថ្មីអំពីជំហរការពារជាតិដ៏រឹងមាំរវាងកូរ៉េខាងត្បូង និងសហរដ្ឋអាមេរិក ហើយបានឯកភាពគ្នាទៅលើតម្រូវការក្នុងការបន្តពង្រឹងសមត្ថភាព ការត្រៀមខ្លួន និងអន្តរប្រតិបត្តិការ ដើម្បីឆ្លើយតបប្រកបដោយប្រសិទ្ធភាពចំពោះបរិយាកាសសន្តិសុខដែលកំពុងវិវត្តន៍ និងរក្សាការទប់ស្កាត់ដ៏រឹងមាំ»។

ដោយត្រួតពិនិត្យប៉ុស្តិ៍យាមភាគខាងកើត មេបញ្ជាការបានវាយតម្លៃប្រតិបត្តិការយោធាកូរ៉េខាងជើងនាពេលថ្មីៗនេះនៅជិតខ្សែបន្ទាត់កំណត់ព្រំដែនយោធា (MDL) នៅខាងក្នុងតំបន់ការពារ DMZ និងបានពិនិត្យមើលការត្រៀមខ្លួនរបស់អង្គភាពព្រំដែន។

ការត្រួតពិនិត្យនេះធ្វើឡើងបន្ទាប់ពីការកើនឡើងយ៉ាងខ្លាំងនៃការឈ្លានពានព្រំដែនដោយកងទ័ពកូរ៉េខាងជើងតាមបណ្តោយរណសិរ្សភាគខាងកើត ដោយយោធាកូរ៉េខាងត្បូងបានរកឃើញករណីបែបនេះជាង២០ករណីនៅក្នុងខែសីហាតែមួយ ដែលលើសពីឧប្បត្តិហេតុស្រដៀងគ្នានេះចំនួន ១៧ករណីដែលបានកត់ត្រាពេញមួយឆ្នាំ២០២៥។

ទីក្រុងព្យុងយ៉ាងក៏បានបង្កើនការសាងសង់របងលួសបន្លា និងបង្កប់មីនតាមបណ្តោយព្រំដែន ដែលជាចលនាមួយដែលត្រូវបានគេមើលឃើញថាជាការពង្រឹងព្រំដែនជាយុទ្ធសាស្ត្រស្របតាមគោលនយោបាយរបស់ខ្លួនដែលកំណត់ភាគខាងត្បូងថាជារដ្ឋអរិភាព៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)