AKP កំពង់ធំ ថ្ងៃទី១០ ខែកញ្ញា ឆ្នាំ២០២៦--លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានជំរុញដល់កម្លាំងប៉ុស្តិ៍នគរបាលរដ្ឋបាលបង្កើនប្រសិទ្ធភាពការងារផ្ដល់សេវាសាធារណៈជូនប្រជាពលរដ្ឋប្រកបដោយភាពកក់ក្ដៅ។ ឧត្តមសេនីយ៍ទោស្នងការបានជំរុញដូចនេះក្នុងឱកាសអញ្ជើញចុះសាកសួរសុខទុក្ខកងកម្លាំងនគរបាលប៉ុស្តិ៍រដ្ឋបាលព្រមទាំងត្រួតពិនិត្យស្ថានភាព និងទីតាំងប៉ុស្តិ៍នគរបាលរដ្ឋបាលដែលគ្រោងសាងសង់ថ្មីក្នុងគម្រោងឆ្នាំ២០២៧ ស្ថិតក្នុងភូមិសាស្ត្រស្រុកបារាយណ៍ ខេត្តកំពង់ធំ កាលពីថ្ងៃទី៩ ខែកញ្ញា ឆ្នាំ២០២៦។

លោកឧត្តមសេនីយ៍ទោ ហេង សុផល បានមានប្រសាសន៍ថា ដោយអនុវត្តតាមការដឹកនាំតម្រង់ទិសដ៏ខ្ពង់ខ្ពស់ពីឯកឧត្តមនាយឧត្តមសេនីយ៍ ស ថេត អគ្គស្នងការនគរបាលជាតិ ថ្នាក់ដឹកនាំគ្រប់លំដាប់ថ្នាក់ត្រូវយកចិត្តទុកដាក់ចំពោះសុខទុក្ខរបស់កងកម្លាំងក្រោមឱវាទដែលកំពុងមមាញឹកខិតខំប្រឹងប្រែងបំពេញភារកិច្ចសំដៅរួមចំណែកថែរក្សាសន្តិសុខ សុវត្ថិភាព និងសណ្តាប់ធ្នាប់សង្គមឱ្យកាន់តែល្អប្រសើរ។

ជាមួយគ្នានេះ លោកឧត្តមសេនីយ៍ទោស្នងការបានកោតសរសើរចំពោះថ្នាក់ដឹកនាំ និងកងកម្លាំងដែលបានខិតខំរៀបចំនិងកែលម្អអង្គភាពឱ្យមានភាពស្រស់បំព្រង និងមានរបៀបរៀបរយ ក្រោមម្លប់នៃសាមគ្គីភាព ឯកភាពផ្ទៃក្នុងនិងកិច្ចសហការល្អ។ ទន្ទឹមនឹងនេះ លោកស្នងការបានដាក់ទិសដៅការងារសំខាន់ៗសម្រាប់កងកម្លាំងយកទៅអនុវត្តបន្តដើម្បីធានាបាននូវប្រសិទ្ធភាពខ្ពស់ ដោយផ្តោតសំខាន់លើការពង្រឹងបទវិន័យកងកម្លាំងនគរបាលជាតិកម្ពុជា និងរបៀបរបបការងារជំនាញ ឱ្យអនុវត្តតាមតួនាទី ភារកិច្ច និងឋានានុក្រម ប្រកបដោយស្មារតីទទួលខុសត្រូវខ្ពស់។

លោកឧត្តមសេនីយ៍ទោស្នងការបានណែនាំឱ្យរៀបចំផែនការសកម្មភាពសម្រាប់អនុវត្តការងារជាប្រចាំថ្ងៃ រួមទាំងការរៀបចំវេនប្រចាំការ ដើម្បីត្រៀមផ្តល់សេវារដ្ឋបាលជូនប្រជាពលរដ្ឋតាមដានសភាពការណ៍ រក្សាសន្តិសុខ សុវត្ថិភាព និងសណ្តាប់ធ្នាប់សាធារណៈព្រមទាំងបង្កើនការល្បាតនៅតាមគោលដៅងាយរងគ្រោះក្នុងភូមិសាស្ត្រទទួលខុសត្រូវ ដោយសហការជាមួយកម្លាំងប្រជាការពារសំដៅបង្ការនិងទប់ស្កាត់បទល្មើសគ្រប់ប្រភេទ។ ជាមួយគ្នានោះដែរ ត្រូវពង្រឹងរបៀបរបបកិច្ចប្រជុំដើម្បីត្រួតពិនិត្យ និងវាយតម្លៃលទ្ធផលការងារដែលបានអនុវត្តនាពេលកន្លងមក ដោះស្រាយបញ្ហាប្រឈមនិងការងារដែលនៅសេសសល់ ព្រមទាំងលើកទិសដៅការងារថ្មីៗ ឆ្ពោះទៅសម្រេចបានជោគជ័យបន្ថែមទៀត។ សហការជាមួយអាជ្ញាធរមូលដ្ឋានឃុំ-សង្កាត់ ក្នុងការបង្កើនការផ្សព្វផ្សាយគោលនយោបាយ «ភូមិ-ឃុំ-សង្កាត់មានសុវត្ថិភាព» តាមរយៈការរៀបចំវេទិកាសាធារណៈ និងផ្សព្វផ្សាយអំពីលក្ខណៈសម្បត្តិទាំង៧យ៉ាងដល់ប្រជាពលរដ្ឋគ្រប់ស្រទាប់វណ្ណៈ នៅតាមគោលដៅងាយរងគ្រោះដើម្បីលើកកម្ពស់ការយល់ដឹង និងការចូលរួមអនុវត្តឱ្យទទួលបានលទ្ធផលល្អប្រសើរ។ការផ្សព្វផ្សាយគោលនយោបាយនេះត្រូវសហការជាមួយអាជ្ញាធរមូលដ្ឋានឃុំ-សង្កាត់ រៀបចំធ្វើវេទិកាសាធារណៈដើម្បីទទួលយកមតិយោបល់ បញ្ហាប្រឈម និងក្តីកង្វល់នានារបស់ប្រជាពលរដ្ឋ សំដៅស្វែងរកដំណោះស្រាយឱ្យបានទាន់ពេលវេលានិងប្រកបដោយប្រសិទ្ធភាព។ ពង្រឹងការគ្រប់គ្រងមនុស្ស មធ្យោបាយ អាវុធជាតិផ្ទុះនិងមុខរបរពិសេស ព្រមទាំងគ្រប់គ្រងវត្តមានជនបរទេសក្នុងមូលដ្ឋាន តាមរយ:លិខិតឆ្លងដែន ទិដ្ឋាការស្នាក់នៅ និងមុខរបរ ជាពិសេសត្រូវពង្រឹងការអនុវត្តអនុក្រឹត្យលេខ០៣ ស្តីពីការគ្រប់គ្រងសន្តិសុខតាមទីតាំងរស់នៅប្រមូលផ្តុំ ដើម្បីបង្ការ ទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញក្នុងភូមិសាស្ត្រទទួលខុសត្រូវរបស់ខ្លួន។ ត្រូវពង្រឹងការងារនគរបាល និងសហគមន៍ដោយបង្កើតទំនាក់ទំនងយ៉ាងជិតស្និទ្ធជាមួយអាជ្ញាធរមូលដ្ឋាន ក្រុមប្រឹក្សាឃុំ-សង្កាត់ មេភូមិ និងប្រជាពលរដ្ឋ តាមរយៈការរៀបចំផែនការចុះជួបនិងផ្សព្វផ្សាយខ្លឹមសារសំខាន់ៗនៅតាមគោលដៅដែលបានកំណត់ជាប្រចាំ។

ចំពោះការផ្តល់សេវាសាធារណៈ លោកស្នងការបានណែនាំឱ្យបង្កើនការផ្តល់សេវាជូនប្រជាពលរដ្ឋ រួមមានសៀវភៅស្នាក់នៅ សៀវភៅគ្រួសារ និងអត្តសញ្ញាណប័ណ្ណសញ្ជាតិខ្មែរ ឱ្យបានរហ័ស ទាន់ពេលវេលានិងមានប្រសិទ្ធភាព ដើម្បីផ្តល់ភាពងាយស្រួលជូនប្រជាពលរដ្ឋ។ ត្រូវពង្រឹងចលនាប្រជាការពារនៅតាមឃុំនីមួយៗ និងបំផុសឱ្យមានការចូលរួមពីប្រជាពលរដ្ឋក្នុងមូលដ្ឋាន ដើម្បីរួមគ្នាពង្រឹងសន្តិសុខសណ្តាប់ធ្នាប់និងសុវត្ថិភាពសង្គម។ ពាក់ព័ន្ធនឹងការទប់ស្កាត់បទល្មើសពង្រឹងគោលដៅបទល្មើសលើផែនទីកដោយប្រើប្រាស់ទិន្នន័យបទល្មើសដែលប្រមូលបានពីទម្រង់ទី១ដើម្បីកំណត់ប្រភេទបទល្មើសជាអាទិភាពនិងរៀបចំផែនការទប់ស្កាត់ បង្ការ និងលុបបំបាត់បទល្មើសដែលកើតមានក្នុងមូលដ្ឋានឱ្យមានប្រសិទ្ធភាព។

លោកឧត្តមសេនីយ៍ទោ ហេង សុផល បានសង្កត់ធ្ងន់ថាចំពោះកម្លាំងប៉ុស្តិ៍នគរបាលរដ្ឋបាលហាមដាច់ខាតការផ្ទេរកម្លាំងចេញពីប៉ុស្តិ៍នគរបាលរដ្ឋបាល។ ចំណែកប៉ុស្តិ៍នគរបាលរដ្ឋបាលដែលខ្វះកម្លាំង ត្រូវបញ្ចុះកម្លាំងពីអធិការដ្ឋាននគរបាលក្រុង-ស្រុក ទៅជួយបំពេញតាមរយៈពេលនិងការកំណត់ជាក់ស្តែង ដើម្បីធានាបាននូវប្រសិទ្ធភាពក្នុងការបំពេញភារកិច្ច និងរួមចំណែកថែរក្សាសន្តិសុខសុវត្ថិភាពនិងមានសណ្ដាប់ធ្នាប់ឱ្យកាន់តែប្រសើរ៕

ដោយ ស៊ុម វណ្ណា