AKP តាកែវ ថ្ងៃទី១០ ខែកញ្ញា ឆ្នាំ២០២៦--ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ បានអញ្ជើញជួបសំណេះសំណាល សួរសុខទុក្ខ និងនាំយកអំណោយមនុស្សធម៌ របស់កាកបាទក្រហមកម្ពុជា ចែកជូនប្រជាពលរដ្ឋរងគ្រោះនិងងាយរងគ្រោះ ចំនួន៣៩គ្រួសារនៅស្រុកអង្គរបូរី ដោយមានការអញ្ជើញចូលរួមពីអនុប្រធាន សមាជិក សមាជិកាគណៈកម្មាធិការសាខាកាកបាទក្រហមកម្ពុជាខេត្តតាកែវ ប្រធាន អនុប្រធាន សមាជិក សមាជិកាអនុសាខាកាកបាទក្រហមកម្ពុជាស្រុកអង្គរបូរី និងប្រជាពលរដ្ឋចូលរួមជាច្រើនរូប ក្នុងបរិវេណសាលាស្រុកអង្គបូរី ខេត្តតាកែវ កាលពីថ្ងៃទី៩ ខែកញ្ញា ឆ្នាំ២០២៦។

មានប្រសាសន៍សំណេះសំណាលនាឱកាសនោះ ឯកឧត្តម វ៉ី សំណាង បានពាំនាំនូវប្រសាសន៍ផ្ដាំផ្ញើសាកសួរសុខទុក្ខពីសំណាក់ឯកឧត្ដមបណ្ឌិត ជា វ៉ាន់ដេត ប្រធានកិត្តិយសសាខាកាកបាទក្រហមកម្ពុជាខេត្តតាកែវ ពិសេសពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្ដេចតែងតែយកចិត្តទុកដាក់ គិតគូរខ្ពស់ពីសុខទុក្ខរបស់ប្រជាពលរដ្ឋរងគ្រោះ និងងាយរងគ្រោះគ្រប់ប្រភេទ នៅគ្រប់ទីកន្លែង ដោយមិនប្រកាន់និន្នាការនយោបាយ ពូជសាសន៍ ឬសាសនាអ្វីឡើយ ស្របតាមទិសស្លោក "ទីណាមានការលំបាក ទីនោះមានកាកបាទក្រហមកម្ពុជា"។

ឯកឧត្តមបានមានប្រសាសន៍បន្តថា កាកបាទក្រហមកម្ពុជាតែងតែនៅកៀកជាប់ជាមួយបងប្អូន នៅពេលបងប្អូនជួបការលំបាក ជួបគ្រោះធម្មជាតិ និងជួបទុក្ខលំបាកផ្សេងៗ គឺមិនដែលទុកបងប្អូនចោលម្ដងណាឡើយ។ទីណាមានការលំបាកទីនោះតែងតែមានកាកបាទក្រហម ចុះយកអំណោយចែកជូនបងប្អូនភ្លាមៗ ដោយមិនទុកឱ្យពួកគាត់មានជីវភាពខ្វះខាត កាន់តែធ្ងន់ធ្ងរនោះទេ ពោលគឺត្រូវជួយពួកគាត់ ឱ្យមានជីវភាពរស់នៅសមរម្យគ្រប់គ្រាន់។

ឯកឧត្តមបានអំពាវនាវដល់បងប្អូនប្រជាពលរដ្ឋទាំងអស់ សូមបង្កើនការប្រុងប្រយ័ត្នខ្ពស់ ចំពោះបាតុភូតធម្មជាតិដូចជាផ្គរ រន្ទះ និងខ្យល់កន្ត្រាក់។ត្រូវថែទាំសុខភាពឱ្យបានល្អ ជាពិសេសត្រូវមើលថែកូនចៅតូចៗឱ្យបានដិតដល់ ចៀសវាងគ្រោះថ្នាក់ផ្សេងៗ។ បន្ថែមពីនេះត្រូវរួមគ្នា បង្កើនការប្រុងប្រយ័ត្នចំពោះជំងឺគ្រុនឈាម ដោយសាររដូវនេះជារដូវវស្សា អាចកើតមានមូសខ្លាគ្រប់ទីកន្លែង។ ឯកឧត្តមក៏បានណែនាំដល់អាជ្ញាធរមូលដ្ឋានគ្រប់លំដាប់ថ្នាក់ ពេលមានគ្រោះថ្នាក់ឬគ្រោះធម្មជាតិកើតឡើងជាយថាហេតុ ត្រូវដឹកនាំកម្លាំងចុះជួយអន្តរាគមន៍ ជួយសង្គ្រោះប្រជាពលរដ្ឋរងគ្រោះឱ្យបានទាន់ពេលវេលា។

អំណោយមនុស្សធម៌ដែលបានចែកជូនដល់គ្រួសារក្រីក្រ ចាស់ជរា រងគ្រោះ និងងាយរងគ្រោះ ទាំង៣៩គ្រួសារ ដោយក្នុងមួយគ្រួសារៗទទួលបាន អង្ករ២៥គីឡូក្រាម មី១កេស ត្រីខ១យួរ ប្រេងឆា១លីត្រ ទឹកត្រី៣ដប ទឹកស៊ីអ៊ីវ៣ដប នំ១កញ្ចប់ មុង១ ភួយ១ សារុង១ ក្រមា១  កន្ទេល១ និងថវិកាចំនួន៥០០០០រៀល (ប្រាំម៉ឺនរៀល)៕

ដោយ អ៊ុច សៀង