‎AKP កំពង់ស្ពឺ ថ្ងៃទី១៨ ខែសីហា ឆ្នាំ២០២៦--លោកស្រី គារ សុភូ អភិបាលរងខេត្តកំពង់ស្ពឺបានអញ្ជើញជាអធិបតីក្នុងពិធីប្រារព្ធខួបលើកទី២៧ នៃទិវាអន្តរជាតិ សម្រាប់យុវជន ១២ សីហា ឆ្នាំ២០២៦ រៀបចំឡើងដោយមន្ទីរអប់រំយុវជន និងកីឡាខេត្តកំពង់ស្ពឺ ពិធីនេះមានការអញ្ជើញចូលរួមពីលោក ថន ថារិន ប្រធានមន្ទីរអប់រំ យុវជន និងកីឡាខេត្ត លោក លោកស្រីប្រធានអង្គភាពពាក់ព័ន្ធ កងកម្លាំងទាំង៣ លោកគ្រូ អ្នកគ្រូ សិស្សានុសិស្ស ជាច្រើនកុះករ។ ពិធីនេះដែរប្រារព្ធធ្វើនៅបណ្ណាល័យកំពង់ស្ពឺនាព្រឹកថ្ងៃទី១៨ ខែសីហា ឆ្នាំ២០២៦នេះ។
‎
‎

ក្នុងឱកាសនោះ លោក ថន ថារិន ប្រធានមន្ទីរអប់រំ យុវជន និងកីឡាខេត្ត បានឡើងមានមតិស្វាគមន៍ និងអានរបាយការណ៍សង្ខេបស្តីពីស្ថានភាពវិស័យអប់រំក្នុងខេត្តកំពង់ស្ពឺ។ លោកបានបញ្ជាក់ថា ការប្រារព្ធទិវានេះឡើងក្រោមប្រធានបទ «បរិបទខុសគ្នា ក្តីប្រាថ្នារួមគ្នា» ក្នុងគោលបំណងលើកកម្ពស់ការចូលរួមរបស់យុវជនក្នុងសកម្មភាពសង្គម មនុស្សធម៌ បរិស្ថាន ការបញ្ចេញមតិ និងការអភិវឌ្ឍន៍សមត្ថភាព ជាពិសេសបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក៏ដូចជាក្រសួងអប់រំ យុវជន និងកីឡា ចំពោះកម្លាំងយុវជនក្នុងការរួមចំណែកអភិវឌ្ឍប្រទេសជាតិ។
‎
‎ឆ្លៀតក្នុងឱកាសនោះដែរ លោកស្រី គារ សុភូ អភិបាលរងខេត្តកំពង់ស្ពឺ បានកោតសរសើរចំពោះការខិតខំ ប្រឹងប្រែងរបស់មន្ទីរអប់រំ យុវជន និងកីឡាខេត្ត ព្រមទាំងមន្ត្រីអប់រំគ្រប់លំដាប់ថ្នាក់ ដែលបានរួមសហការគ្នា យ៉ាងល្អ ក្នុងការរៀបចំប្រារព្ធទិវាអន្តរជាតិសម្រាប់យុវជន ១២សីហា នេះឡើង ក្នុងគោលបំណងឱ្យយុវជនយល់ដឹង ពីការអភិវឌ្ឍន៍សង្គម និងយល់ដឹងកាន់តែច្បាស់នូវតម្រូវការ របស់ខ្លួន ក្នុងការចូលរួមអភិវឌ្ឍប្រទេសជាតិ និងការធ្វើ សេចក្តីសម្រេចចិត្តនានារបស់យុវជនគ្រប់កម្មវិធី គ្រប់សកម្មភាព នៅក្នុងសហគមន៍។
‎
‎

លោកស្រីបានបន្តទៀតថា ការប្រារព្ធខួបអនុស្សាវរីយ៍ នៃទិវាយុវជនអន្តរជាតិ ១២សីហា បានចាប់ផ្តើមឡើងតាំងពីឆ្នាំ១៩៩៨ ក្នុងក្របខ័ណ្ឌអន្តរជាតិ ជាលើកដំបូងក្រោយពីសេចក្តីប្រកាសអំពីគោលនយោបាយ និងកម្មវិធីសម្រាប់យុជន យុវតី នៅទីក្រុងលីស្បូន (Lisbon) ប្រទេសព័រទុយហ្គាល់ ឆ្នាំ១៩៩៨ និងសេចក្តីត្រូវការរបស់យុវជនជូន មហាសន្និបាតអង្គការសហប្រជាជាតិ ពិនិត្យ និងអនុម័ត។ ដោយឡែកនៅកម្ពុជា ទិវានេះត្រូវបានប្រារព្ធធ្វើឡើងជារៀងរាល់ឆ្នាំ ដើម្បីបញ្ជាក់ឱ្យឃើញពី ការយកចិត្តទុកដាក់របស់ រាជរដ្ឋាភិបាលកម្ពុជាចំពោះយុវជន ពិសេសរាជរដ្ឋាភិបាលកម្ពុជា ដែលមាន សម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាអគ្គមគ្គុទេសក៍ ប្រកបដោយគតិបណ្ឌិត ដែលសម្តេចបានចាត់ទុក “យុវជនជាកម្លាំងស្នូល ជាកោសិកា ដ៏រឹងមាំ និងជាសសរទ្រូង របស់ប្រទេសជាតិ”។
‎
‎ជាមួយគ្នានេះ លោកស្រីអភិបាលរងខេត្ត បានផ្តាំផ្ញើ និងលើកទឹកចិត្តដល់ក្មួយៗសិស្សានុសិស្ស និងយុវជនទាំងអស់ ត្រូវខិតខំអភិវឌ្ឍសមត្ថភាពផ្ទាល់ខ្លួនតាមរយៈការសិក្សារៀនសូត្រ ការស្រាវជ្រាវ និងការអនុវត្តន៍ជាក់ស្តែង ដើម្បីពង្រឹងទាំងជំនាញបច្ចេកទេស និងជំនាញទន់ សំខាន់ៗមួយចំនួន រួមមាន៖ ការសិក្សាជំនាញបច្ចេកទេសឱ្យបានស្ទាត់ជំនាញ ,ការបណ្តុះគំនិតច្នៃប្រឌិត និងការបង្កើតថ្មី, ការគិត និងពិចារណាយ៉ាងល្អិតល្អន់មុនធ្វើការសម្រេចចិត្ត, ការប្រើប្រាស់ប្រព័ន្ធព័ត៌មានវិទ្យា (កុំព្យូទ័រ និងបច្ចេកវិទ្យាឌីជីថល), ការបង្កើតការងារ និងមុខរបរដោយខ្លួនឯង ,ការពង្រឹងទំនាក់ទំនង និងកិច្ចសហការធ្វើការងារជាក្រុម, ការបង្កើនចំណេះដឹងភាសាបរទេស (ភាសាអង់គ្លេស និងភាសាក្នុងតំបន់), និង ការយោគយល់គ្នាទៅវិញទៅមក ដោយយល់ដឹងពីវប្បធម៌ និងទំនៀមទម្លាប់របស់ប្រទេសជិតខាង។

‎លោកស្រី បានគូសបញ្ជាក់បន្ថែមថា ពិភពលោកក្នុងសតវត្សទី២១នេះគឺជាយុគសម័យនៃការរស់នៅក្នុងចំណេះដឹង និងជាបណ្តុំនៃសមត្ថភាព ដូច្នេះយុវជនដែលជាទំពាំងស្នងឫស្សីត្រូវតែខិតខំបំពាក់បំប៉នសមត្ថភាពខ្លួនឯងជាប្រចាំ ដើម្បីក្លាយជាកម្លាំងចលករដ៏រឹងមាំក្នុងការចូលរួមអភិវឌ្ឍសង្គមជាតិឱ្យកាន់តែរីកចម្រើននាពេលអនាគតផងដែរ៕

ដោយ ម៉ែន ប៊ុនធីម