AKP ភ្នំពេញ ថ្ងៃទី២១ ខែសីហា ឆ្នាំ២០២៦--ក្រុមសម្តែងកម្ពុជា «Epic Art Dance» បង្ហាញវត្តមានក្នុងកម្មវិធី «មហោស្រពរបាំអន្តរជាតិកូរ៉េសម្រាប់ជនពិការលើកទី១១» ក្នុងសាលសិល្បៈ Arko ក្នុងទីក្រុងសេអ៊ូល​ សាធារណរដ្ឋ​កូរ៉េ​។

ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការីកាលពីថ្ងៃទី១៣  ខែសីហា ឆ្នាំ២០២៦ បានអញ្ជើញចូលរួមទស្សនាការសម្តែងរបស់ក្រុមសម្តែងកម្ពុជា «Epic Arts Dance» ក្នុងកម្មវិធី «មហោស្រពរបាំអន្តរជាតិកូរ៉េសម្រាប់ជនពិការលើកទី១១» (11th Korea International Accessible Dance Festival- KIADA2026) ក្នុងសាលសិល្បៈ Arko ក្នុងទីក្រុងសេអ៊ូល សាធារណរដ្ឋ​កូរ៉េ​។

ក្រុម Epic Arts Dance ជាក្រុមសម្តែងកម្ពុជាដែលអញ្ជេីញមកពីខេត្តកំពត មានតួអង្គសម្តែងលោក​ សឿង​ ធឿន និងលោក​ ឡាយ​ សាន់ បានសហការសម្តែងរឿង «ក្មេងឃ្វាលក្របី» (Buffalo Boy) ដែលរឿងនេះបានដកស្រង់ចេញពីខ្សែជីវិតពិតរបស់តួអង្គទាំងពីរ ដែលធ្លាប់ត្រូវបានគេរើសអើងដោយសារពិការភាព តែតួអង្គទាំងពីរមិនបានចុះចាញ់ហើយបានតស៊ូជំនះរហូតទទួលបានជោគជ័យក្លាយជាអ្នកសម្តែង​ ដែលមានការទទួលស្គាល់លើឆាកអន្តរជាតិ ដោយសារភាពប៉ិនប្រសព្វ និងក្បាច់រាំដ៏រស់រវើករបស់ពួកគាត់ គួបផ្សំនឹងសាច់រឿងដែលបង្កប់នូវការអប់រំ ការតស៊ូ និងការលើកទឹកចិត្ត។

ក្រុមសម្តែងរបស់លោកធ្លាប់បានសម្តែងនៅប្រទេសអង់គ្លេស អូស្ត្រាលី សឹង្ហបុរី ជប៉ុន និងទីក្រុងហុងកុងជាដើម មុននឹងមកសម្តែងនៅប្រទេសកូរ៉េនេះ៕

ដោយ៖ ប៊ុនរិទ្ធ