AKP ភ្នំពេញ ថ្ងៃទី១៧ ខែសីហា ឆ្នាំ២០២៦​ -- ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានលើកឡើងថា ការកែទម្រង់ និងពង្រឹងធនធានមនុស្ស គឺជាគន្លឹះដ៏សំខាន់ក្នុងការកសាង ស្ថាប័នឱ្យកាន់តែរឹងមាំ មានប្រសិទ្ធភាព និងអាចឆ្លើយតបបានទាន់ពេលវេលាទៅនឹងតម្រូវការការងារក្នុងវិស័យព័ត៌មាន និងសោតទស្សន៍។ ការលើកឡើងរបស់ឯកឧត្ដមរដ្ឋមន្រ្ដីនេ ក្នុងឱកាសអញ្ជើញដឹកនាំកិច្ចប្រជុំថ្នាក់ដឹកនាំ ដើម្បីវាយតម្លៃលទ្ធផល និងសមិទ្ធផលពាក់កណ្តាលអាណត្តិ ព្រមទាំងពិនិត្យផែនការការងារសម្រាប់ឆ្នាំ២០២៧-២០២៨ របស់ក្រសួងព័ត៌មាន នាថ្ងៃទី១៧ ខែសីហា ឆ្នាំ២០២៦ នៅទីស្ដីការក្រសួងព័ត៌មាន។

ឯកឧត្តម នេត្រ ភក្ត្រា បានគូសបញ្ជាក់ថា ការពង្រឹងធនធានមនុស្ស គឺជាមូលដ្ឋានដ៏សំខាន់សម្រាប់កសាងស្ថាប័នឱ្យមានភាពរឹងមាំ និងប្រសិទ្ធភាព ហើយក្រសួងព័ត៌មាន ត្រូវមានមន្ត្រីដែលមានចំនួនគ្រប់គ្រាន់ និងមានសមត្ថភាពសមស្រប ដើម្បីបំពេញភារកិច្ចដែលកាន់តែមានទំហំធំ និងស្មុគស្មាញ។ ឯកឧត្តមរដ្ឋមន្ត្រីបានលើកឡើងថា ចំណុចសំខាន់មួយដែលត្រូវពិនិត្យ តើក្រសួងមានធនធានមនុស្សគ្រប់គ្រាន់ ដើម្បីឆ្លើយតបទៅនឹងបន្ទុកការងារដែរឬ ទេ។ ឯកឧត្ដមរដ្ឋមន្រ្ដីបន្ដថា ហេតុនេះ ការពង្រឹងសមត្ថភាពមន្ត្រីត្រូវធ្វើឱ្យស្របតាមទំហំ និងតម្រូវការការងាររបស់ក្រសួង។

ឯកឧត្តមបានថ្លែងបញ្ជាក់ថា ការជ្រើសរើស និងការតែងតាំងមន្ត្រី ត្រូវផ្អែកលើគុណវុឌ្ឍិ សមត្ថភាព និងស្នាដៃការងារ ហើយក្រសួងក៏បានដាក់ឱ្យអនុវត្តន៍ប្រព័ន្ធលើកទឹកចិត្ត ដើម្បីជំរុញមន្ត្រីឱ្យខិតខំបំពេញការងារ និងបង្កើនប្រសិទ្ធភាពការងាររបស់ខ្លួន។ ឯកឧត្តមរដ្ឋមន្ត្រីបានឱ្យដឹងទៀតថា កំណែទម្រង់ស្ថាប័នត្រូវដើរទន្ទឹមគ្នាជាមួយនឹងការពង្រឹងវិន័យរបស់មន្ត្រី ដើម្បីធានាឱ្យការអនុវត្តការងារមានប្រសិទ្ធភាព តម្លាភាព និងការទទួលខុសត្រូវ។ ឯកឧត្តមក៏បានជំរុញឱ្យបន្តពង្រឹងស្ថាប័ន និងពង្រីកមុខងាររបស់អង្គភាពនានា ឱ្យអាចឆ្លើយតបបានកាន់តែមានប្រសិទ្ធភាពទៅនឹងការវិវត្ត និងតម្រូវការថ្មីៗ ក្នុងវិស័យព័ត៌មាន និងសោតទស្សន៍។

ជាមួយគ្នានេះដែរ ឯកឧត្តមរដ្ឋមន្ត្រីក៏បានថ្លែងបន្ថែមថា កំណែទម្រង់ដែលបានអនុវត្តក្នុងរយៈពេល៣ឆ្នាំកន្លងមក ត្រូវបង្ហាញជាលទ្ធផលជាក់ស្តែង តាមរយៈការធ្វើឱ្យស្ថាប័ន មានសមត្ថភាពកាន់តែប្រសើរ និងការផ្តល់សេវាសាធារណៈជូនប្រជាពលរដ្ឋកាន់តែមានប្រសិទ្ធភាព។ ឯកឧត្ដមរដ្ឋមន្រ្ដីបញ្ជាក់ទៀតថា ក្នុងកិច្ចប្រជុំនេះដែរ គឺជាផ្នែកមួយនៃការបន្តអនុវត្តន៍កំណែទម្រង់ស្ថាប័ន និងធនធានមនុស្សរបស់ក្រសួងព័ត៌មាន ក្នុងគោលដៅកសាងស្ថាប័នឱ្យកាន់តែរឹងមាំ មានវិន័យ ប្រសិទ្ធភាព និងអាចបំពេញតួនាទី និងភារកិច្ចបានស្របតាមការវិវត្តនៃវិស័យព័ត៌មាន និងសោតទស្សន៍ក្នុងយុគសម័យឌីជីថល៕

ដោយ៖ រិទ្ធី រូបថត៖ ខឹម សុវណ្ណារ៉ា