AKP ភ្នំពេញ ថ្ងៃទី១៧ ខែសីហា ឆ្នាំ២០២៦--

ឯកឧត្តម អាន ពេជ្រ ហត្ថដា រដ្ឋលេខាធិការ និងជាប្រធានលេខាធិការដ្ឋាននៃគណៈកម្មាធិការគ្រប់គ្រងធនធានខ្សាច់ ក្រសួងធនធានទឹក និងឧតុនិយម និងជាប្រធានគណៈកម្មាធិការគ្រប់គ្រងធនធានខ្សាច់ នាព្រឹកថ្ងៃចន្ទ ទី១៧ ខែសីហា ឆ្នាំ២០២៦ បានដឹកនាំក្រុមការងារលេខាធិការដ្ឋាន ចុះសិក្សា ស្វែងយល់ និងពិនិត្យជាក់ស្តែងនៅទីតាំងធ្វើអាជីវកម្មធនធានខ្សាច់ ស្ថិតក្នុងភូមិក្បាលកោះ សង្កាត់កោះដាច់ ខណ្ឌជ្រោយចង្វារ រាជធានីភ្នំពេញ។

ដំណើរបេសកកម្មនេះមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ក្រសួងរ៉ែ និងថាមពល ក្រសួងបរិស្ថាន មន្ទីរសាធារណការ និងដឹកជញ្ជូនរាជធានីភ្នំពេញ មន្ទីរធនធានទឹក និងឧតុនិយមរាជធានីភ្នំពេញ ព្រមទាំងតំណាងក្រុមហ៊ុនអាជីវកម្មបូមខ្សាច់ និងអាជ្ញាធរមូលដ្ឋានពាក់ព័ន្ធ។

ឯកឧត្តមរដ្ឋលេខាធិការ និងក្រុមការងារអន្តរក្រសួង បានចុះពិនិត្យផ្ទាល់ដល់ទីតាំងអាជីវកម្មបូមខ្សាច់ និងបានដឹកនាំកិច្ចប្រជុំពិភាក្សា ដោយបានជម្រាបជូនសមាជិក សមាជិកានៃអង្គប្រជុំ អំពីតួនាទី និងភារកិច្ចស្នូលរបស់លេខាធិការដ្ឋានគ្រប់គ្រងធនធានខ្សាច់។ ឯកឧត្តមបានសង្កត់ធ្ងន់ថា ការសិក្សាផ្នែកជលវិទ្យា និងជលគតិ គឺជាកត្តាចាំបាច់បំផុតមិនអាចខ្វះបាន ក្នុងការគ្រប់គ្រងធនធានខ្សាច់ ការសម្រួលចរន្តទឹកហូរ និងជាមូលដ្ឋានគ្រឹះសម្រាប់ត្រួតពិនិត្យ តាមដានរាល់សកម្មភាពធ្វើអាជីវកម្មខ្សាច់ទាំងអស់។

ទន្ទឹមនឹងនេះ ឯកឧត្តមក៏បានផ្តល់ការណែនាំដល់មន្ទីរធនធានទឹក និងឧតុនិយមរាជធានីភ្នំពេញ ព្រមទាំងអាជ្ញាធរដែនដី ត្រូវបង្កើនការយកចិត្តទុកដាក់ និងជំរុញការផ្សព្វផ្សាយបន្ថែមដល់បណ្តាក្រុមហ៊ុនអាជីវកម្មបូមខ្សាច់ទាំងអស់ ដែលកំពុងប្រតិបត្តិការក្នុងដែនសមត្ថកិច្ចរបស់ខ្លួន ឱ្យប្រកាន់ខ្ជាប់នូវស្មារតីទទួលខុសត្រូវ ដោយត្រូវគោរព និងអនុវត្តតាមបទដ្ឋានគតិយុត្តិ ព្រមទាំងលក្ខខណ្ឌបច្ចេកទេសជាធរមានឱ្យបានម៉ឺងម៉ាត់បំផុត ដើម្បីធានាបាននូវការអភិវឌ្ឍធនធានធម្មជាតិប្រកបដោយចីរភាព និងកាត់បន្ថយផលប៉ះពាល់ផ្សេងៗឱ្យនៅកម្រិតទាបបំផុត៕

ដោយ ពេជ្រ សំអឿន (ប្រភព៖ ក្រសួងធនធានទឹកនិងឧតុនិយម)