AKP បន្ទាយមានជ័យ ថ្ងៃទី១៧ ខែសីហា ឆ្នាំ២០២៦--

ការអប់រំ និងសុខុមាលភាពរបស់កុមារដែលជាកូនចៅប្រជាពលរដ្ឋភៀសសឹក នៅតែជាអាទិភាពចម្បងដែលមិនអាចមើលរំលងបានឡើយ បើទោះបីជាស្ថិតក្នុងស្ថានភាពលំបាកយ៉ាងណាក៏ដោយ។ ឆ្លុះបញ្ចាំងពីការគិតគូរយ៉ាងស៊ីជម្រៅចំពោះអនាគតនៃទំពាំងស្នងឫស្សីទាំងនេះ នាព្រឹកថ្ងៃទី១៧ ខែសីហា ឆ្នាំ២០២៦ លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ បានដឹកនាំសហការី ចុះពិនិត្យទីតាំងរោងចម្អិនអាហារ និងបរិស្ថានជុំវិញសាលារៀន ស្ថិតក្នុងមណ្ឌលភៀសសឹកភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ។

បេសកកម្មចុះផ្ទាល់ដល់ទីតាំងនេះមានគោលបំណងវាយតម្លៃស្ថានភាពជាក់ស្តែងនៃរោងចម្អិន ដំណើរការរៀបចំ និងការចែកចាយអាហារជូនដល់សិស្សានុសិស្ស ព្រមទាំងពិនិត្យមើលបរិស្ថានជុំវិញសាលា ដើម្បីធានាឱ្យបានដាច់ខាតនូវបទដ្ឋានអនាម័យ សុវត្ថិភាពចំណីអាហារ និងបង្កើតបរិយាកាសសិក្សាដ៏សមរម្យមួយ ដែលអាចគាំទ្រដល់ការលូតលាស់ទាំងផ្នែកប្រាជ្ញា និងស្មារតីរបស់កុមារ។

ក្នុងឱកាសនោះ ក្រុមការងារជំនាញបានរួមគ្នាតុមតិ ពិភាក្សា និងស្វែងរកលទ្ធភាពកែលម្អទីតាំងបន្ថែមទៀត ដើម្បីឱ្យការផ្តល់សេវាអាហារូបត្ថម្ភដល់កុមារតូចៗប្រព្រឹត្តទៅប្រកបដោយគុណភាព អនាម័យខ្ពស់ និងសុវត្ថិភាពល្អប្រសើរ។

លោក ឈូ ប៊ុនរឿង បានផ្តាំផ្ញើអាណាព្យាបាល និងជំរុញយ៉ាងម៉ឺងម៉ាត់ដល់គណៈគ្រប់គ្រងសាលា លោកគ្រូ អ្នកគ្រូ ព្រមទាំងភាគីពាក់ព័ន្ធទាំងអស់ ឱ្យបន្តយកចិត្តទុកដាក់ទ្វេដងលើកិច្ចការអនាម័យ និងសុវត្ថិភាពសិស្សានុសិស្ស នៅក្នុងបរិបទពិសេសនៃមណ្ឌលភៀសសឹកនេះ។ ជាមួយគ្នានោះ លោកប្រធានមន្ទីរក៏បានផ្តល់កម្លាំងចិត្ត និងក្រើនរម្លឹកដល់ក្មួយៗសិស្សានុសិស្ស ឱ្យខិតខំប្រឹងប្រែងរៀនសូត្រឱ្យពូកែ ដើម្បីកសាងអនាគតដ៏រឹងមាំសម្រាប់ខ្លួនឯង និងគ្រួសារ។

លោកប្រធានមន្ទីរអប់រំខេត្តបានគូសបញ្ជាក់ជាថ្មីថា រាជរដ្ឋាភិបាល ក្រសួងអប់រំ យុវជន និងកីឡា ព្រមទាំងអាជ្ញាធរដែនដីគ្រប់លំដាប់ថ្នាក់ តែងតែយកចិត្តទុកដាក់ខ្ពស់បំផុតចំពោះសុខទុក្ខ និងជីវភាពរស់នៅរបស់ប្រជាពលរដ្ឋភៀសសឹក ដោយជាពិសេសមិនបោះបង់ចោលនូវការសិក្សារៀនសូត្រ និងការអភិវឌ្ឍសមត្ថភាពរបស់កូនចៅពួកគាត់ឡើយ។ ការធានាបាននូវអាហាររូបត្ថម្ភគ្រប់គ្រាន់ និងបរិស្ថានសិក្សាប្រកបដោយសុវត្ថិភាពនាពេលនេះ គឺជាគ្រឹះយ៉ាងសំខាន់ក្នុងការជ្រោមជ្រែងអនាគតកុមារភៀសសឹក ឱ្យមានឱកាសស្មើភាពគ្នាក្នុងការលូតលាស់ និងក្លាយជាទំពាំងស្នងឫស្សីដ៏មានសក្តានុពលសម្រាប់ជាតិមាតុភូមិ៕

ដោយ ឈុន សារ៉ាត