AKP ភ្នំពេញ ថ្ងៃទី៣០ ខែកក្កដា ឆ្នាំ២០២៦ -- ចំនួនអ្នកស្លាប់ដោយសារគ្រោះរញ្ជួយដីដ៏ខ្លាំងក្លាមួយដែលបានវាយប្រហារខេត្តគូម៉ាម៉ូតុនៅភាគនិរតីរបស់ប្រទេសជប៉ុន បានកើនឡើងដល់យ៉ាងហោចណាស់ ១៣នាក់ដោយមានអ្នករងរបួសរាប់សិបនាក់ និងមនុស្ស ០៧នាក់នៅតែបាត់ខ្លួន។ នេះបើយោងតាមការចុះផ្សាយរបស់ទូរទស្សន៍រដ្ឋ NHK។

គ្រោះរញ្ជួយដីកម្រិត ៧,១រ៉ិចទ័របានបង្កការខូចខាតយ៉ាងទូលំទូលាយរួមទាំងភ្លើងឆេះផ្ទះ ការដួលរលំស្ពាន ការដួលរលំអគារ និងការបំផ្លាញប៉មដែក។ វាក៏បានធ្វើឱ្យប្រជាជនប្រហែល ៤៨.០០០គ្រួសារគ្មានអគ្គិសនីប្រើប្រាស់ផងដែរ។ មន្ត្រីបាននិយាយថា មនុស្ស ៣៣នាក់បានរងរបួស។

គ្រោះរញ្ជួយដីនេះបានកត់ត្រាកម្រិតអតិបរមា៧ លើមាត្រដ្ឋានអាំងតង់ស៊ីតេរញ្ជួយដីរបស់ប្រទេសជប៉ុន ដែលជាកម្រិតខ្ពស់បំផុត។ គ្រោះរញ្ជួយដីចុងក្រោយដែលឈានដល់កម្រិតនេះ គឺគ្រោះរញ្ជួយដីឧបទ្វីបណូតូ(Noto) កាលពីឆ្នាំ២០២៤ នៅថ្ងៃចូលឆ្នាំថ្មី។

រោងចក្រក្រដាសមួយនៅក្នុងទីក្រុងយ៉ាតស៊ុស៊ីរ៉ូ គឺជាកន្លែងដែលរងផលប៉ះពាល់ខ្លាំងបំផុត។ មន្ត្រីបាននិយាយថា កម្មករ ១១នាក់ជាប់គាំងបន្ទាប់ពីការរញ្ជួយដី។ មនុស្ស ០៤នាក់ត្រូវបានជួយសង្គ្រោះ រួមទាំងពីរនាក់ត្រូវបានរកឃើញថាមានជំងឺគាំងបេះដូង និងពីរនាក់រងរបួសធ្ងន់ធ្ងរ។

ប្រតិបត្តិការស្វែងរក និងជួយសង្គ្រោះកំពុងបន្តសម្រាប់កម្មករដែលនៅសេសសល់។

ទីភ្នាក់ងារស្ទង់ភូមិសាស្ត្រសហរដ្ឋអាមេរិក (USGS) ដំបូងឡើយបានរាយការណ៍ថា ការរញ្ជួយដីនេះមានទំហំ ៧,១រ៉ិចទ័រ មុនពេលកែសម្រួលមកនៅត្រឹម ៦,៨រ៉ិចទ័រវិញ៕

ដោយ៖ យា ចិន្ដាខន្ដី (ប្រភព៖ AA-AKP)