AKP ភ្នំពេញ ថ្ងៃទី១៤ ខែកក្កដា ឆ្នាំ២០២៦--លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា រសៀលថ្ងៃទី១៣ ខែកក្កដា ឆ្នាំ២០២៦ បានដឹកនាំកិច្ចប្រជុំស្ដីពីការរៀបចំគណៈកម្មការ និងអនុគណៈកម្មការសម្រាប់រៀបចំសកម្មភាពក្នុងព្រឹត្តិការណ៍អមកិច្ចប្រជុំកំពូលហ្វ្រង់កូហ្វូនី ដោយមានការចូលរួមពីសំណាក់ថ្នាក់ដឹកនាំក្រសួង និងមន្ត្រីពាក់ព័ន្ធជាច្រើនរូប។

ក្នុងកិច្ចប្រជុំនេះ លោកជំទាវបណ្ឌិតរដ្ឋលេខាធិការប្រចាំការបានលើកឡើងថា តាមរយៈ «ភូមិហ្វ្រង់កូហ្វូនឆ្នាំ២០២៦» កម្ពុជាមិនត្រឹមតែបង្ហាញមុខមាត់ជាម្ចាស់ផ្ទះប៉ុណ្ណោះទេ ប៉ុន្តែថែមទាំងជាមជ្ឈមណ្ឌលវប្បធម៌ដ៏សកម្មមួយនៅក្នុងបណ្ដាញហ្វ្រង់កូហ្វូនសកលផងដែរ។

ព្រឹត្តិការណ៍នេះនឹងប្រមូលផ្ដុំសិល្បករ សហគ្រិន យុវជន អ្នកអប់រំ និងភ្ញៀវជាតិ-អន្តរជាតិ ដើម្បីលើកកម្ពស់ការផ្លាស់ប្ដូរវប្បធម៌ និងឱកាសសេដ្ឋកិច្ច។ ក្នុងក្របខ័ណ្ឌនេះ កិច្ចប្រជុំកំពូលលើកទី២០ គឺជាឱកាសដ៏សំខាន់សម្រាប់ក្រសួងអប់រំ យុវជន និងកីឡា ក្នុងការបង្ហាញពីសមិទ្ធផល និងទិសដៅអភិវឌ្ឍន៍វិស័យអប់រំ ព្រមទាំងឆ្លុះបញ្ចាំងពីអាទិភាពរបស់កម្ពុជាជាមួយដៃគូហ្វ្រង់កូហ្វូន ជាពិសេសលើការសិក្សាភាសាបារាំង ការអប់រំមធ្យមសិក្សាចំណេះទូទៅ និងការអប់រំកម្រិតឧត្តមសិក្សា។

ក្នុងនាមជាវេទិកាប្រមូលផ្ដុំប្រមុខរដ្ឋ និងប្រមុខរដ្ឋាភិបាលមកពីបណ្ដាប្រទេសជាសមាជិកអង្គការអន្តរជាតិហ្វ្រង់កូហ្វូនី(OIF) ព្រះរាជាណាចក្រកម្ពុជាកំពុងត្រៀមខ្លួនធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ នាចុងឆ្នាំ២០២៦នេះ ដែលព្រឹត្តិការណ៍អមនានានឹងដើរតួនាទីយ៉ាងសំខាន់ក្នុងការជំរុញការចែករំលែកចំណេះដឹង បទពិសោធ ការស្រាវជ្រាវ និងការបង្ហាញសមិទ្ធផល ដើម្បីផ្សារភ្ជាប់ទំនាក់ទំនងរវាងប្រទេសជាសមាជិកឱ្យកាន់តែរឹងមាំ៕

ដោយ៖ ចាន់ សុភឿន (ប្រភព៖ ក្រសួងអប់រំ)