AKPបន្ទាយមានជ័យថ្ងៃទី១៤ខែកក្កដាឆ្នាំ២០២៦--ការទទួលបានបណ្ណកម្មសិទ្ធិដីធ្លីស្របច្បាប់ មិនត្រឹមតែជាការធានានូវសុវត្ថិភាពគតិយុត្តក្នុងការកាន់កាប់អចលនវត្ថុប៉ុណ្ណោះទេ ប៉ុន្តែវាក៏ជាសក្ខីភាពដ៏រស់រវើកដែលស្តែងឱ្យឃើញពីការយកចិត្តទុកដាក់ខ្ពស់បំផុតរបស់រាជរដ្ឋាភិបាលកម្ពុជា ក្នុងការគិតគូរពីសុខទុក្ខ និងការលើកកម្ពស់ជីវភាព រស់នៅរបស់ប្រជាពលរដ្ឋនៅមូលដ្ឋាន។ នេះជាការលើកឡើងរបស់ លោក លៀម សុដា អភិបាលរងខេត្ត និងជាតំណាងដ៏ខ្ពង់ខ្ពស់របស់ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ។   

ការថ្លែងបែបនេះរបស់លោកអភិបាលរង ខេត្ត បានធ្វើឡើងក្នុងឱកាសដែលលោកបានអញ្ជើញជាអធិបតីក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ (បណ្ណកម្មសិទ្ធិដីធ្លី) ជាលក្ខណៈប្រព័ន្ធ ជូនដល់ប្រជាពលរដ្ឋមកពីភូមិចំនួន០២ ក្នុងសង្កាត់ផ្សារកណ្តាល ក្រុងប៉ោយប៉ែត សរុបចំនួន ៣,៦៦០ បណ្ណ នាព្រឹកថ្ងៃទី១៤ ខែកក្កដា ឆ្នាំ២០២៦ នេះ។

ពិធីនេះត្រូវបានប្រារព្ធឡើងយ៉ាងឱឡារិកនៅបរិវេណវត្តជិនវ័នសិមារាម (ហៅវត្តម៉ុងចិន) ដោយមានការចូលរួមពីថ្នាក់ដឹក នាំមន្ទីរជំនាញ អាជ្ញាធរក្រុង-សង្កាត់ និងបងប្អូនប្រជាពលរដ្ឋជាម្ចាស់ដីធ្លីយ៉ាងច្រើនកុះករ។

 នៅក្នុងពិធីនោះ លោក លៀម សុដា បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏ដូចជាឯកឧត្តមអភិបាលខេត្ត ដែលតែងតែរួមសុខរួមទុក្ខ និងគិតគូរឥតឈប់ឈរលើការបង្ខិតសេវាសាធារណៈឱ្យកៀកជិតប្រជាពលរដ្ឋ។

លោកបានបញ្ជាក់យ៉ាងស៊ីជម្រៅថា បណ្ណកម្មសិទ្ធិដីធ្លីដែលបងប្អូនប្រជាព លរដ្ឋទទួលបាននៅថ្ងៃនេះ គឺជាទ្រព្យស កម្មដ៏មានតម្លៃ មហាសាល មានសុវត្ថិភា ពគតិយុទ្ធពេញលេញ និងត្រូវបានការពារដោយច្បាប់ ដែលអាចយកទៅប្រើ ប្រាស់ដើម្បីពង្រីកសេដ្ឋកិច្ចគ្រួសារ និងបង្កើនលំនឹងជីវភាពឱ្យកាន់តែប្រសើរឡើង។

   លោក លៀម សុដាបានបញ្ជាក់ថា«បណ្ណកម្មសិទ្ធិដីធ្លីដែលរាជរដ្ឋាភិបាលផ្តល់ជូននាពេលនេះ មិនត្រឹមតែបញ្ចប់នូវក្តីបារម្ភ ឬវិវាទដីធ្លីផ្សេងៗនោះទេ ប៉ុន្តែវាគឺជាការផ្តល់នូវសិទ្ធិស្របច្បាប់ពេញលេញ និងជាបង្អែកសេដ្ឋកិច្ចដ៏រឹងមាំសម្រាប់បងប្អូនប្រជាពលរដ្ឋ។ នេះជាផ្លែផ្កាកើតចេញពីនយោបាយគិតគូរពីប្រជាជនជាចម្បងរបស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត»។

ជាមួយគ្នានោះដែរ លោកអភិបាលរង ខេត្ត ក៏បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត មន្ត្រីបច្ចេកទេស អាជ្ញាធរក្រុងប៉ោយប៉ែត និងសហការីទាំងអស់ ដែលបានបំពេញភារកិច្ចយ៉ាង សកម្ម មិនខ្លាចនឿយហត់ រហូតឈានដល់ការចេញបណ្ណកម្មសិទ្ធិជាស្ថាពរនាពេលនេះ។  

ទន្ទឹមនឹងការអបអរសាទរ លោក លៀម សុដា ក៏បានអំពាវនាវដល់បងប្អូនប្រជា ពលរដ្ឋទាំងអស់ដែលទទួលបានបណ្ណកម្មសិទ្ធិនេះ សូមមេត្តាថែរក្សាបណ្ណនេះឱ្យបានល្អប្រសើរ កុំឱ្យមានការខូចខាត ឬបាត់បង់ និងត្រូវប្រើប្រាស់ទ្រព្យសម្ប ត្តិនេះឱ្យចំគោលដៅក្នុងការអភិវឌ្ឍគ្រួ សារ ព្រមទាំងត្រូវបន្តចូលរួមសហការជាមួយអាជ្ញាធរមូលដ្ឋាន ក្នុងការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» ដើម្បីរួមគ្នារក្សាសន្តិសុខ និងសណ្តាប់ធ្នាប់ក្នុងសហគមន៍ឱ្យបានកាន់តែល្អប្រសើរទ្វេឡើង៕

ដោយ៖ឈុនសារ៉ាត