AKP ភ្នំពេញ ថ្ងៃទី១៨ ខែមិថុនា ឆ្នាំ២០២៦--ព្រឹត្តិការណ៍កីឡាជាតិ លើកទី៥ និងកីឡាជាតិជនពិការ លើកទី៣ ឆ្នាំ២០២៦នឹងវិលត្រឡប់មកវិញនាដើមខែវិច្ឆិកា ឆ្នាំ២០២៦នេះហើយ ក្រោមប្រធានបទ «កីឡាជាតិដើម្បីឯកភាពជាតិ» ក្រោមការរៀបចំរបស់ក្រសួងអប់រំ យុវជន និងកីឡា ដោយគ្រោងប្រារព្ធធ្វើឡើងពីថ្ងៃទី០៦-១៥ ខែវិច្ឆិកា នៅរាជធានីភ្នំពេញ ខេត្តស្វាយរៀង កំពង់ឆ្នាំង កែប និងខេត្តព្រះសីហនុ ខណៈប្រភេទកីឡានឹងបង្ហាញជូនឆាប់ៗនេះ។

នេះបើតាមការគូសបញ្ជាក់របស់លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡានៃក្រសួងអប់រំ យុវជន និងកីឡា ប្រាប់ទីភ្នាក់ងារសារព័ត៌មានកម្ពុជា AKP នៅព្រឹកថ្ងៃទី១៨ ខែមិថុនា ឆ្នាំ២០២៦នេះ។ លោក ហួត សេងទ្រី បានលើកឡើងទៀតថា ព្រឹត្តិការណ៍កីឡាជាតិដ៏ធំនេះ ក្រសួងអប់រំ យុវជន និងកីឡាបានសហការជាមួយគណៈកម្មាធិការជាតិអូឡាំពិកកម្ពុជា គណៈកម្មាធិការជាតិប៉ារ៉ាឡាំពិកកម្ពុជា និងសហព័ន្ធកីឡាជាតិរៀបចំការប្រកួតកីឡាជាតិ និងកីឡាជាតិជនពិការ រៀងរាល់២ឆ្នាំម្តង ដើម្បីជាការវាស់ស្ទង់គុណផលកីឡាជាតិ ហ្វឹកហ្វឺនមន្ត្រីជំនាញកីឡាឱ្យមានចំណេះដឹង និងប្រើប្រាស់បទពិសោធន៍ បន្ទាប់ពីធ្វើជាម្ចាស់ផ្ទះព្រឹត្តិការណ៍កីឡា ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ ដែលបានរៀបចំកន្លងមកបានជោគជ័យ និងដើម្បីត្រៀមលក្ខណៈឆ្ពោះទៅធ្វើជាម្ចាស់ផ្ទះរៀបចំព្រឹត្តិការណ៍កីឡាយុវជនអាស៊ី លើកទី៥ (The 5th Asian Youth Games 2031) ជាពិសេសគឺការរៀបចំពិធីបើក-បិទ បដិសណ្ឋារកិច្ចឱ្យបានល្អ និងការដណ្តើមមេដាយ ដោយផ្តោតលើការរៀបចំបច្ចេកទេសប្រកួតឱ្យមានតម្លាភាព ភាពស្អាតស្អំ និងយុត្តិធម៌។ ជាក់ស្តែងការប្រកួតកីឡាជាតិបានរៀបចំចំនួន៤លើក និងកីឡាជាតិជនពិការបានចំនួន ២លើក បានទទួលជោគជ័យជាបន្តបន្ទាប់។

គួរបញ្ជាក់ថា នេះជាព្រឹត្តិការណ៍កីឡាថ្នាក់ជាតិដ៏ធំ ដែលត្រូវបានរៀបចំឡើងរៀងរាល់២ឆ្នាំម្តង អនុលោមតាមទម្រង់ហ្គេម ដូចការប្រកួតអន្តរជាតិ ជាពិសេសស៊ីហ្គេមផងដែរ។ ព្រឹត្តិការណ៍កីឡាជាតិ និងកីឡាជាតិជនពិការត្រូវបានចាត់ទុកជាការរៀបចំ និងការប្រកួតដ៏មានសារៈសំខាន់កម្រិតខ្ពស់បំផុតថ្នាក់ជាតិ ដែលជាការផ្តល់ឱកាសដល់មន្ត្រីបច្ចេកទេសតាមសហព័ន្ធកីឡាជាតិនានាបានដុសខាត់សមត្ថភាពបន្ថែម ក្នុងការចូលរួមបម្រើដល់ព្រឹត្តិការណ៍នេះ ហើយក៏ជាការស្វែងរកធនធានកីឡាករ កីឡាការិនីកម្ពុជាលើប្រភេទកីឡានានា ត្រៀមចូលរួមប្រកួតអន្តរជាតិនានាផងដែរ។ គួរបញ្ជាក់ថា ការរៀបចំកីឡាជាតិលើកទី១ត្រូវបានធ្វើឡើង កាលពីឆ្នាំ២០១៦ ដើម្បីត្រៀមឆ្ពោះមករៀបចំកីឡាស៊ីហ្គេម ឆ្នាំ២០២៣ កន្លងទៅប្រកបដោយភាពជោគជ័យយ៉ាងត្រចះត្រចង់ជាកំណត់ត្រាប្រវត្តិសាស្ត្រ។ ការប្រកួតកីឡាជាតិ និងកីឡាជាតិជនពិការ ឆ្នាំ២០២៦នេះនឹងមានប្រតិភូ គ្រូបង្វឹក កីឡាករ កីឡាការិនីមកក្រសួងស្ថាប័នចំនួន៣ និង២៥រាជធានីខេត្តទូទាំងប្រទេសចូលរួមប្រមាណ ជាង ៥០០០នាក់៕

ដោយ ហេង ណាលីន (រូបភាព៖ ឯកសារ ឆ្នាំ២០២៤)