AKP ឧត្តរមានជ័យ ថ្ងៃទី១៨ ខែមិថុនា ឆ្នាំ២០២៦-- លោក ផុន ចាន់និល អភិបាលនៃគណៈអភិបាលក្រុងសំរោង នៅថ្ងៃទី១៧ ខែមិថុនា ឆ្នាំ២០២៦ បានចុះពិនិត្យស្ថានភាពជាក់ស្តែងដោយផ្ទាល់ នៅតាមទីតាំងលំនៅឋានរបស់បងប្អូនប្រជាពលរដ្ឋ ស្ថិតក្នុងភូមិឈូក សង្កាត់សំរោង ក្រុងសំរោង ខេត្តឧត្តរមានជ័យ បន្ទាប់ពីទទួលបានព័ត៌មាន និងសំណូមពរពីប្រជាពលរដ្ឋពាក់ព័ន្ធនឹងស្ថានភាពលិចទឹកជំនន់ទឹកភ្លៀង។

លោក ផុន ចាន់និល បានលើកឡើងថា ការគិតគូរពីសុខទុក្ខ និងការចុះអន្តរាគមន៍ដោះស្រាយរាល់បញ្ហាប្រឈមនានារបស់បងប្អូនប្រជាពលរដ្ឋនៅតាមមូលដ្ឋាន បានទាន់ពេលវេលា គឺជាបេសកកម្មចម្បងដែលរដ្ឋបាលក្រុងសំរោងតែងតែអនុវត្តយ៉ាងសកម្ម និងទាន់ពេលវេលា។

លោកអភិបាលក្រុងបានសម្របសម្រួលជាមួយជំនាញ ចុះកាយបើកមុខទឹកដែលកកស្ទះ ដើម្បីរំដោះទឹកភ្លៀងដែលលិចផ្ទះសម្បែងពលរដ្ឋ ឱ្យហូរចូលទៅក្នុងប្រព័ន្ធលូរំដោះទឹកសាធារណៈឱ្យបានលឿន ហើយដើម្បីជៀសវាង និងបង្ការនូវបញ្ហាការកកស្ទះចរន្តទឹកហូរ ដែលបង្កឱ្យមានការលិចលង់ខូចខាតសម្ភារ ផ្ទះសម្បែងនាពេលខាងមុខទៀត។

លោកអភិបាលក្រុងក៏បានធ្វើការណែនាំ និងអំពាវនាវយ៉ាងទទូចដល់បងប្អូនប្រជាពលរដ្ឋទាំងអស់ មេត្តាចូលរួមចំណែកជាមួយអាជ្ញាធរ ដោយត្រូវដាក់លូមុនចាក់ដី សូមបងប្អូនប្រជាពលរដ្ឋ ចូលរួមចំណែកក្នុងការដាក់បង្កប់លូឱ្យបានត្រឹមត្រូវតាមបច្ចេកទេស មុននឹងធ្វើការចាក់បំពេញអាចម៍ដីធ្វើផ្លូវ ឬចំណតសម្រាប់ចេញ-ចូលលំនៅឋានរបស់ខ្លួន ជៀសវាងការចាក់ដីលុបមុខទឹកហូរ។ លោកបន្ថែមថា យើងរួមគ្នាថែរក្សាប្រព័ន្ធរំដោះទឹក សូមបងប្អូនប្រជាពលរដ្ឋទាំងអស់ ចូលរួមថែទាំ សំអាត និងកាប់ឆ្ការកំប្លោក កាកសំណល់ និងសំរាមនានាចេញពីប្រឡាយ ចង្អូរ ឬមុខលូរំដោះទឹកនៅមុខផ្ទះរៀងៗខ្លួន ដើម្បីបញ្ចៀសការកកស្ទះចរន្តទឹកហូរ និងការពារការលិចលង់ខូចខាតទ្រព្យសម្បត្តិផ្សេងៗក្នុងរដូវវស្សានេះ៕

ដោយ ទិត ស្រ៊