AKP ឧត្តរមានជ័យ ថ្ងៃទី១៧ ខែមិថុនា ឆ្នាំ២០២៦--លោកស្រី ត្រាន់ សុគ៌ា ប្រធានលេខាធិ ការដ្ឋានរៀបចំការបោះឆ្នោតខេត្តឧត្តរ មានជ័យ (ល.ខ.ប) កាលពីរសៀលថ្ងៃទី១៦ ខែមិថុនា ឆ្នាំ២០២៦ បើកកិច្ចប្រជុំផ្សព្វផ្សាយ និងពង្រឹងកិច្ចស ហការលើការងារស្រង់ស្ថិតិប្រជាពលរដ្ឋប៉ាន់ស្មាន សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៦ នៅក្នុងសាលប្រជុំសាលាក្រុងសំរោង។

កិច្ចប្រជុំមានការអញ្ជើញចូលរួមពីសំណាក់ , លោកស្រី ហេង សុជាតិ អភិបាលរង នៃគណៈអភិបាលក្រុងសំរោង ថ្នាក់ដឹកនាំនិងមន្ត្រីបច្ចេកទេស ល.ខ.ប, អាជ្ញាធរសង្កាត់ទាំង៥ និងផ្នែកពាក់ព័ន្ធនានាជាច្រើនរូបទៀត ។

លោកស្រី ហេង សុជាតិ បានថ្លែងថា ការរៀបចំទិន្នន័យស្ថិតិប្រជាពលរដ្ឋឱ្យបានត្រឹមត្រូវ និងគ្រប់ជ្រុងជ្រោយ ជាគ្រឹះស្ថានដ៏មានសារៈសំខាន់ក្នុងការធានានូវសិទ្ធិនយោបាយ និងសិទ្ធិបោះឆ្នោតស្របច្បាប់របស់ប្រជាពលរដ្ឋគ្រប់រូប ។

លោកស្រីថ្លែងបន្តថា កិច្ចប្រជុំនេះបានធ្វើការផ្សព្វផ្សាយយ៉ាងលម្អិតនូវសេចក្ដីណែនាំស្ដីពីការស្រង់ស្ថិតិប្រជាពលរដ្ឋប៉ាន់ស្មាន ឆ្នាំ២០២៦ ព្រមទាំងពង្រឹងកិច្ចសហការយ៉ាងជិតស្និទ្ធរវាងរដ្ឋបាលមូលដ្ឋាន និងអាជ្ញាធរពាក់ព័ន្ធ ដើម្បីធានាឱ្យដំណើរការចុះស្រង់ស្ថិតិជាក់ស្តែងប្រព្រឹត្តទៅដោយមានប្រសិទ្ធភាព ត្រឹមត្រូវ យុត្តិធម៌ និងតម្លាភាព។

បន្ទាប់ពីអង្គប្រជុំបានពិភាក្សាយ៉ាងផុសផុល លោកស្រី ត្រាន់ សុគ៌ា មានប្រសាសន៍ដាក់ចេញនូវការណែនាំលើការងារបច្ចេកទេស ក្នុងការប្រមូលទិន្នន័យប្រជាពលរដ្ឋដែលមានឈ្មោះក្នុងបញ្ជីបោះឆ្នោតចាស់ ការកំណត់អត្តសញ្ញាណប្រជាពលរដ្ឋដែលទើបគ្រប់អាយុបោះឆ្នោត (អាយុ ១៨ឆ្នាំឡើង) និងការធ្វើបច្ចុប្បន្នភាពទិន្នន័យប្រជា ពលរដ្ឋដែលបានផ្លាស់ប្ដូរទីលំនៅចូល ឬចេញ ដើម្បីទទួលបានទិន្នន័យគ្រប់ ជ្រុងជ្រោយនេះ នឹងជួយសម្រួលដល់ការរៀបចំបញ្ជីបោះឆ្នោតឱ្យបានត្រឹមត្រូវ សុក្រឹត ជៀសវាងការបាត់បង់សិទ្ធិ និងបង្កលក្ខណៈងាយស្រួលបំផុតជូនបង ប្អូនប្រជាពលរដ្ឋក្នុងការចូលរួមបោះ ឆ្នោតនាពេលខាងមុខ។

លោកស្រីប្រធានលេខាធិការដ្ឋាន ក៏សូមអំពាវនាវដល់អាជ្ញាធរសង្កាត់ មេភូមិ ព្រមទាំងបងប្អូនប្រជាពលរដ្ឋទាំងអស់ក្នុងក្រុងសំរោង មេត្តាផ្តល់ការសហការខ្ពស់ជាមួយក្រុមការងារចុះស្រង់ស្ថិតិ ដើមី្បរួមគ្នាបំពេញកាតព្វកិច្ចជាពលរដ្ឋល្អ និងធានាបាននូវបញ្ជីបោះឆ្នោតមួយដែលមានគុណភាព និងភាពជឿទុកចិត្តខ្ពស់បំផុត ៕

ដោយ៖ ទិត ស្រ៊