AKP ភ្នំពេញ ថ្ងៃទី១៧ ខែមិថុនា ឆ្នាំ២០២៦--ឯកឧត្តម ស្បោង សារ៉ាត ប្រធានក្រុមប្រឹក្សាខេត្ត និងឯកឧត្តម សួន សុម៉ាលីន ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រៃវែងនាថ្ងៃទី១៧ ខែមិថុនា ឆ្នាំ ២០២៦នេះ បានដឹកនាំគណៈកម្មាធិការសាខា ក្រុមប្រតិបត្តិសាខា បានរៀបចំប្រារព្ធព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្នុងព្រះរាជឱកាសដ៏មហានក្ខត្តឫក្សនៃព្រះរាជពិធីបុណ្យចម្រើនព្រះជន្មាយុគម្រប់៩០ យាងចូល ៩១ព្រះវស្សា ដែលប្រារព្ធធ្វើនៅសាលប្រជុំធំសាខាកាកបាទក្រហមកម្ពុជា ខេត្តព្រៃវែង សរុបអ្នកចូលរួមចំនួន ១៧៨អង្គ/រូប។

ឯកឧត្តម សួន សុម៉ាលីន ប្រធានគណៈកម្មាធិការសាខាកាកបាទក្រហមកម្ពុជាខេត្តព្រៃវែង បានអានសាលិខិដែលមានអត្ថន័យថា៖ សូមក្រាបថ្វាយនូវអំណរសាទរដោយស្មោះ អស់ពីដួងចិត្ត និងសូមថ្វាយនូវព្រះសព្ទសាធុការពរជ័យ សិរីសួស្តី ជ័យមង្គល វិបុលសុខ បវរមហាប្រសើរគ្រប់ប្រការ ថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់។

ទូលព្រះបង្គំជាខ្ញុំ ខ្ញុំម្ចាស់ ជាសមាជិក សមាជិកា គណៈកិត្តិយសសាខា គណៈកម្មាធិការ សាខាកាកបាទក្រហម កម្ពុជា ខេត្តព្រៃវែង គ្រប់លំដាប់ថ្នាក់រួមទាំងមន្ត្រីបុគ្គលិក យុវជន អ្នកស្ម័គ្រចិត្ត ទាំងអស់មានមនោសញ្ចេតនា និងក្តី សោមនស្សរីករាយ ឥតឧបមាដោយក្តីគោរព និងស្វាមីភក្តីដ៏ជ្រាលជ្រៅបំផុតសូមព្រះបរមរាជានុញ្ញាត ក្រាបបង្គំទូលថ្វាយ ព្រះពរបវរមហាប្រសើរ ថ្វាយ ចំពោះ សម្តេចព្រះមហាក្សត្រី ព្រះវររាជមាតាជាតិខ្មែរ ក្នុងព្រះរាជពិធីបុណ្យ ចម្រើនព្រះជន្មវស្សាគម្រប់ ៩០ យាងចូល ៩១ ព្រះវស្សាដែលនិងប្រារព្ធឡើង នៅថ្ងៃទី ១៨ ខែមិថុនា ឆ្នាំ២០២៦ នេះ។

ទូលព្រះបង្គំជាខ្ញុំ ខ្ញុំម្ចាស់មានសេចក្តីរំភើប និងកក់ក្តៅក្រៃលែង ចំពោះព្រះរាជវត្តមានដ៏ឧត្តុង្គឧត្តមរបស់ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់ ព្រះអង្គគង់ប្រថាប់ជាព្រះប្រធាន កិត្តិយសនៃកាកបាទក្រហមកម្ពុជា ហើយព្រះអង្គតែងតែប្រោសព្រះរាជទាននូវព្រះរាជទ្រព្យផ្ទាល់ព្រះអង្គ ទ្រទ្រង់ សកម្មភាព កាកបាទក្រហមកម្ពុជា និងប្រោសព្រះរាជទានព្រះរាជអំណោយដល់ប្រជារាស្ត្រជាកូនចៅ ចៅទួតរបស់ របស់ព្រះអង្គ នៅទូទាំងព្រះរាជាណាចក្រកម្ពុជា។

ក្នុងព្រះរាជទិវាចម្រើនព្រះជន្មវស្សាដ៏ឧត្តុងឧត្តមនាឆ្នាំនេះ ខ្ញុំម្ចាស់ទូលព្រះបង្គំជាខ្ញុំ សូមបួងសួងដល់គុណ ព្រះរតនត្រ័យគុណកែវទាំងបី បារមីថែរក្សាព្រះមហាស្វេតឆ័ត្រ និងវត្ថុសក្តិសិទ្ធក្នុងលោក សូមជួយបីបាច់ថែរក្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល សូមព្រះអង្គ ទ្រង់មានព្រះបរមសុខគ្រប់ប្រការដើម្បីគង់ប្រថាប់ជាម្លប់ដ៏ត្រជាក់ ដល់ប្រជារាស្ត្រជាកូនចៅ ចៅទូតរបស់ព្រះអង្គតរៀងទៅ។

បន្ទាប់ពីបានប្រារព្វពិធីសូត្រមន្ត ចម្រើនព្រះបរិត្តទៅតាមទំនៀមទំលាប់ប្រពៃណីរួចមក ឯកឧត្តមអនុប្រធានអចិន្ត្រៃយ៍គណៈកម្មាធិការសាខា និងសហការី បានប្រគេនបច្ខ័យសម្រាប់ព្រះសង្ឃ និងកសាងវត្ត ដល់ព្រះសង្ឃចំនួន ៩អង្គ និមន្តមកពីវត្តចំនួន ៥វត្ត ក្នុងក្រុងព្រៃវែង៕

ដោយ៖ ពេជ្រ សំអឿន, (ប្រភព៖កាកបាទក្រហមកម្ពុជា)