AKP ភ្នំពេញ ថ្ងៃទី១៧ ខែមិថុនា ឆ្នាំ២០២៦--ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានបញ្ជាក់ពីការប្តេជ្ញាចិត្តរបស់រាជរដ្ឋាភិបាលក្នុងការគាំទ្រ និងសម្របសម្រួលជូនវិនិយោគិនបរទេសនៅក្នុងវេទិកាផ្សព្វផ្សាយវិនិយោគ អ៊ីនឆុន-កម្ពុជា ឆ្នាំ២០២៦» (2026 Incheon-Cambodia Investment Roadshow )នៅប្រទេសកូរ៉េ។

នារសៀលថ្ងៃទី១៦ ខែមិថុនា ឆ្នាំ២០២៦  ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី អមដំណើរ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា អញ្ជើញជាអធិបតី និងថ្លែងសុន្ទរកថាគន្លឹះក្នុង «វេទិកាផ្សព្វផ្សាយវិនិយោគ អ៊ីនឆុន-កម្ពុជា ឆ្នាំ២០២៦» 2026 Incheon-Cambodia Investment Roadshow ដែលរៀបចំឡើងដោយកិច្ចសហការរវាងក្រុមប្រឹក្សា​អភិវឌ្ឍន៍កម្ពុជា​ និងសភាពាណិជ្ជកម្ម និងឧស្សាហកម្មទីក្រុងអ៊ីនឆុន (ICCI) ដោយមានការចូលរួមពីវិនិយោគិន និងធុរជនកូរ៉េជាច្រើនរូប។

ក្នុងឱកាសនោះ ឯកឧត្តមឧបនាយករដ្ឋមន្ត្រី បានបង្ហាញពីសក្តានុពលវិនិយោគ កាលានុវត្តភាពធុរកិច្ច និងបរិយាកាសវិនិយោគដ៏អំណោយផលរបស់កម្ពុជា ព្រមទាំងបញ្ជាក់ពីការប្តេជ្ញាចិត្តរបស់រាជរដ្ឋាភិបាលក្នុងការគាំទ្រ និងសម្របសម្រួលជូនវិនិយោគិនបរទេស។

ឯកឧត្តមបានគូសបញ្ជាក់ថា ច្បាប់វិនិយោគថ្មីរបស់កម្ពុជា ផ្តល់នូវការលើកទឹកចិត្ត និងអត្ថប្រយោជន៍ជាច្រើនសម្រាប់វិនិយោគិន។

វេទិកានេះក៏មានការចែករំលែកបទពិសោធន៍ពីធុរជនកូរ៉េ​ ដែលកំពុងវិនិយោគនៅកម្ពុជា និងការធ្វើបទបង្ហាញអំពីបរិយាកាសវិនិយោគដោយថ្នាក់ដឹកនាំក្រុមប្រឹក្សា​អភិវឌ្ឍន៍កម្ពុជា ព្រមទាំងវេទិកាសំណួរ-ចម្លើយ​ ជាមួយវិនិយោគិនផងដែរ។

ព្រឹត្តិការណ៍នេះ​ បានបញ្ចប់ដោយជោគជ័យ និងទទួលបានការចាប់អារម្មណ៍យ៉ាងខ្លាំងពីសហគមន៍ធុរកិច្ចកូរ៉េ ដែលជាការរួមចំណែកដ៏សំខាន់ក្នុងការពង្រឹងកិច្ចសហប្រតិបត្តិការសេដ្ឋកិច្ច និងជំរុញលំហូរវិនិយោគពីសាធារណរដ្ឋកូរ៉េ​ មកកម្ពុជាកាន់តែច្រើននាពេលខាងមុខ៕

ដោយ៖ ប៊ុនរិទ្ធ