AKP កំពង់ចាម ថ្ងៃទី ១៦ ខែមិថុនា ឆ្នាំ២០២៦--សាខាកាកបាទក្រហមកម្ពុជាខេត្តកំពង់ចាមដែលដឹកនាំដោយ លោកស្រី ប៉ាង ដានី អនុប្រធានអចិន្ត្រៃយ៍ តំណាងឲ្យ ឯកឧត្តម អ៊ុន ចាន់ដា ប្រធានគណៈកម្មាធិការសាខា នៅព្រឹក ថ្ងៃទី ១៦ ខែមិថុនា ឆ្នាំ២០២៦ នេះ បាននាំយកអំណោយសង្គ្រោះបន្ទាន់ទៅផ្តល់ជូនពលរដ្ឋ រងគ្រោះដោយខ្យល់កន្ត្រាក់ ចំនួន៦៨ គ្រួសារ នៅឃុំ ក្រូច និងឃុំបឹងណាយ ក្នុងស្រុកព្រៃឈរ ខេត្តកំពង់ចាម ដែលជួបឧបទ្ទវហេតុ ខ្យល់កន្ត្រាក់កាលពីថ្ងៃទី១៤ ខែមិថុនា ឆ្នាំ២០២៦កន្លងទៅ បណ្តាលឲ្យផ្ទះប្រជាពលរដ្ឋចំនួន៦៨គ្រួសាររងផលប៉ះពាល់ កម្រិតធ្ងន់ ៤ខ្នង មធ្យម ២៤ខ្នង និងកម្រិតស្រាល ៤០ ខ្នង។

ក្នុងឱកាសជួបសំណេះសំណាល និងសួរសុខទុក្ខដោយផ្ទាល់ លោកស្រី ប៉ាង ដានី អនុប្រធាន អចិន្ត្រៃយ័សាខា បានពាំនាំនូវការចូលរួមសោកស្តាយ និងការសាកសួរសុខទុក្ខ របស់ថ្នាក់ដឹកនាំ គ្រប់លំដាប់ថ្នាក់ជាមួយក្រុមគ្រួសាររងគ្រោះ ដែលបង្កឡើង ដោយគ្រោះមហន្តរាយពីធម្មជាតិ ស្មានមិនដល់ និងបានអំពាវនាវដល់ប្រជាពលរដ្ឋ ទាំងអស់ ត្រូវតែបង្កើនការប្រុងប្រយ័ត្នខ្ពស់ ចំពោះគ្រោះថ្នាក់ ជាយថាហេតុណាមួយ ពិសេសនៅពេលមេឃរកកលភ្លៀង និងមានភ្លៀងធ្លាក់តែងតែមានបាតុភូតធម្មជាតិដូចជា ផ្គរ រន្ទះ ខ្យល់កន្ត្រាក់ ជាដើម។

ចូរបងប្អូន ត្រូវតែមានការប្រុងប្រយ័ត្នខ្ពស់បំផុត ទើបយើងបង្ការបានការការពារខ្លួន ចៀសផុតពីគ្រោះថ្នាក់ដល់រាងកាយ និងអាយុជីវិត និងចូលរួមថែទាំសុខភាពឲ្យបានល្អដោយប្រកាន់នូវអនាម័យបីប្រការគឺ ហូបស្អាត ផឹកស្អាត និងរស់នៅស្អាត។

ចំពោះអំណោយដែលសាខាកាកបាទក្រហមកម្ពុជាខេត្តកំពង់ចាមផ្ដល់ជូននាពេលនេះ ជាថវិកាទៅតាមទំហំនៃការខូចខាតជាក់ស្តែងចាប់ពី ពី ៥០០០០ រៀល ដល់ ៥០០០០០រៀល ៕

ដោយ ឆាយ ម៉ុត